ដោយៈ អង្គារ៍ហេង / ភ្នំពេញៈ មន្ដ្រីយោធា ពាក់ផ្កាយពីរម្នាក់ បានសម្រេចចិត្តយកកាំភ្លើងខ្លី បាញ់សម្លាប់ខ្លួនឯង បង្កឱ្យមានការភ្ញាក់ផ្អើល នៅព្រឹកថ្ងៃទី១៨ ខែឧសភាឆ្នាំ២០២២ នៅចំណុចក្នុងផ្ទះលេខ១៣៩ ផ្លូវលេខ៦៥៦ ភូមិព្រះពន្លា សង្កាត់ព្រែកប្រា ខណ្ឌច្បារអំពៅ។
តាមសេចក្ដីរាយការណ៍ពី សមត្ថកិច្ច បានឱ្យដឹងថាៈ អត្តឃាតជន ឈ្មោះ ហេង សារ៉ាន់អាយុ ៥០ ឆ្នាំ មុខរបរយោធា មានតួនាទីជា នាយករង នៃនាយកដ្ឋានភូមិសាស្ត្រទទួលបន្ទុក មជ្ឈមណ្ឌលហ្វឹកហ្វឺន ភូមិសាស្ត្រយោធា មានឋានន្តរស័ក្តិ ឧត្តមសេនីយ៍ទោនិងមានទីលំនៅផ្ទះកើតហេតុ ខាងលើ។
យោងតាមការបំភ្លឺពីឈ្មោះ អ៊ុ សុផានី អាយុ ៤២ ឆ្នាំ ជាប្រពន្ធរបស់អត្តឃាតជននោះបានបញ្ជាក់ថាៈ ប្តីរបស់ខ្លួន មានអាការៈឈឺ និងតឹងក្នុងក្បាល រយៈពេលជាង ១០ ថ្ងៃមកហើយ លុះនៅព្រឹកកើតហេតុ ប្តីរបស់គាត់ នៅតែមានអាការៈឈឺក្បាលហើយខ្លួនបានប្រាប់ឱ្យគាត់ ទៅមន្ទីរពេទ្យ តែគាត់មិនព្រម ទើបខ្លួនបានដើរទៅទិញផ្លែឈើនៅផ្សារ ដើម្បីយកមកឱ្យប្ដីពិសា។ លុះដល់ម៉ោងជិត ១០ ពេលត្រឡប់មកផ្ទះវិញហើយចូលតាមទ្វារខាងក្រោយ ដើរចូលមកក្នុងផ្ទះ ស្រាប់តែឃើញប្តី ស្លាប់នៅលើគ្រែហើយនៅក្បែរខ្លួន មានកាំភ្លើងខ្លី មួយដើម។
ដោយឡែក ឈ្មោះ ហែម ប៊ុនថន ភេទប្រុស អាយុ ៤៥ ឆ្នាំ ជាអ្នកធ្វើការជាមួយអត្តឃាតជន បានអះអាងថាៈ មុនពេលកើតហេតុ អត្តឃាតជន បានដើរចេញពីក្នុងផ្ទះតាមទ្វារខាងក្រោយ មកអង្គុយលេង នៅលើបង់ ក្នុងបរិវេណនាយកដ្ឋានភូមិសាស្ត្រយោធា ហើយខ្លួនក៏បានទៅអង្គុយ ជជែកគ្នាលេងជាមួយអត្តឃាតជនដោយអត្តឃាតជន បានប្រាប់ថា គាត់ឈឺក្បាលខ្លាំងណាស់ ហើយក៏បានដើរចូលទៅក្នុងផ្ទះវិញ។ បន្តិចក្រោយមក ខ្លួនក៏ឮសំឡេងផាំង តែមិនចាប់អារម្មណ៍។ មួយសន្ទុះក្រោយមក ប្រពន្ធរបស់គាត់ បានមកពីក្រៅវិញ ដើរចូលផ្ទះតាមទ្វារខាងក្រោយ
ស្រាប់តែផ្អើលឆោឡោថា ប្តីរបស់គាត់ ស្លាប់បាត់ទៅហើយ។
តាមការសន្និដ្ឋាន បុរសនោះ បានស្លាប់ដោយត្រូវគ្រាប់កាំភ្លើង (ធ្វើអត្តឃាតបាញ់សម្លាប់ខ្លួនឯង)។ ក្រោយពិនិត្យសពចប់សព្វគ្រប់ហើយ សាកសពត្រូវបានសមត្ថកិច្ចប្រគល់ឱ្យក្រុមគ្រួសារ ធ្វើបុណ្យតាមប្រពៃណី៕/V
