លោក​ប៊ូ​ស​ច្រឡំ​និយាយថា ការឈ្លានពាន​អ៊ីរ៉ាក់ គឺ “​ឃោរឃៅ​” និង “​អយុត្តិធម៌​” ដែល​តាមពិត​ចង់​និយាយ​អំពី​ការឈ្លានពាន​អ៊ុ​យក្រែន​

​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ អតីត​ប្រធានាធិបតី​អាម៉េរិក​លោក ច​ច ដាប់​ប៊​ល​យូ ប៊ូ​ស បាន​ពណ៌នា​ច្រឡំ​ថា ការឈ្លានពាន​អ៊ីរ៉ាក់​គឺ “​ឃោរឃៅ​” និង “​អយុត្តិធម៌​”​មុន​ពេល​កែ​កំហុស​​ខ្លួន​គាត់​វិញ​ថា គាត់​ចង់​សំដៅលើ​ការឈ្លានពាន​របស់​រុស្ស៊ី​លើ​អ៊ុ​យក្រែន​។​

​លោក​ប៊ូ​ស​បាន​ធ្វើ​ការអត្ថាធិប្បាយ​បែបនេះ​នៅក្នុង​សុន្ទរកថា​មួយ​ក្នុងអំឡុង​ព្រឹត្តិការណ៍​មួយ​នៅ​ទីក្រុង​ដាល់​ឡាស​កាលពី​ថ្ងៃ​ពុធ ទី​១៨ ឧសភា ខណៈ​គាត់​រិះគន់​ប្រព័ន្ធ​នយោបាយ​របស់​រុស្ស៊ី​។​

​លោក​ប៊ូ​ស​បាន​និយាយថា “​លទ្ធផល​នេះ​គឺ​មកពី​អវត្តមាន​នៃ​ការត្រួតពិនិត្យ​និង​សមតុល្យ​នៅក្នុង​ប្រទេស​រុស្ស៊ី​និង​ការសម្រេចចិត្ត​រប​ស់បុ​រស​ម្នាក់​ដើម្បី​ចាប់ផ្តើម​ការ​លុកលុយ​ដោយ​អយុត្តិធម៌​និង​ឃោរ​​ឃៅ​ទាំងស្រុង​ទៅលើ​អ៊ីរ៉ាក់​” មុន​ពេល​កែតម្រូវ​និង​គ្រវីក្បាល​ហួសចិត្ត​ខ្លួនឯង​។ លោក​ប៊ូ​ស​និយាយថា “​ខ្ញុំ​ចង់​មានន័យថា​អ៊ុ​យក្រែន​”​។ លោក​បាន​បន្ទោស​កំហុស​នេះ​ទៅលើ​អាយុ​ច្រើន​របស់​គាត់ ខណៈ​ទស្សនិកជន​នាំគ្នា​ផ្ទុះ​សំណើច​។​

​នៅ​ឆ្នាំ ២០០៣ នៅពេល​ប៊ូ​ស​នៅ​ជា​ប្រធានាធិបតី សហរដ្ឋ​អាម៉េរិក​បាន​ដឹកនាំ​ការ​លុកលុយ​ប្រទេស​អ៊ីរ៉ាក់​ជុំវិញ​អាវុធ​ប្រល័យ​លោក ដែល​មិន​ត្រូវបាន​រកឃើញ​ទាល់តែសោះ​។ ជម្លោះ​ដ៏​រ៉ាំរ៉ៃ​នេះ​បាន​សម្លាប់​មនុស្ស​រាប់សែន​នាក់​និង​បណ្តាលឱ្យ​មនុស្ស​ជាច្រើន​នាក់​ទៀត​ផ្លាស់​ទីលំនៅ​។​

​សម្តី​របស់​លោក​ប៊ូ​ស​បាន​រីក​រាលដាល​យ៉ាង​រហ័ស​នៅលើ​បណ្តាញ​សង្គម ដោយ​ប្រមូល​បាន​ការ​ចូល​មើល​ជាង​បី​លាន​ដង​នៅលើ Twitter តែឯង បន្ទាប់​ពី​ឃ្លីប​នេះ​ត្រូវ​បាន​ចែកចាយ​លើ Twitter ដោយ​អ្នកយកព័ត៌មាន Dallas News៕

​លោក​ប៊ូ​ស​ច្រឡំ​និយាយថា ការឈ្លានពាន​អ៊ីរ៉ាក់​ពិតជា​ឃោរឃៅ​និង​អយុត្តិធម៌

​