ដោយៈ ប​.​ខុន / ភ្នំពេញៈ ភ្លៀង​ធ្លាក់​រយៈពេល ២៤ ម៉ោង ត្រឹម​ព្រឹក​ថ្ងៃទី​២០ ខែឧសភា ដល់​កម្រិត ១៣១ មី​លី​ម៉ែត្រ លើ​ក្រុងព្រះសីហនុ ធ្វើឱ្យ​ស្ថានភាព​ទឹក នៅតាម​ប្រឡាយ និង​អូរ​ក្នុង​ក្រុង​នេះ ពេញ​ពោរ តែ​មិន​បង្កឱ្យមាន​ការលិចលង់ ដូច​ការ​ធ្លាក់ភ្លៀង ក្នុង​រដូវវស្សា នៃ​បណ្តា​ឆ្នាំមុនៗ​នោះឡើយ សូម្បីតែ​តំបន់ ម្លប់​តាប៉ាង ក៏​មិន​មានទឹក​លិច​ដែរ ដោយសារ​ភ្លៀង ធ្លាក់ មិន​គំហុក ក្រោយពី​អូរ ប្រឡាយ នាំ​ទឹក​ចូល​សមុទ្រ បាន​កាយ​ស្តារ​រួច​ជា​បន្តបន្ទាប់ តែ​ចាប់បាន​សំរាម នៅតាម​អូរ និង​ប្រឡាយ រហូតដល់ ៤ កុងតឺន័រ​។​

​លោកស្រី Maggie Eno ប្រធាន​អង្គការ​ម្លប់​តាប៉ាង ដែលជា​អង្គការ​មនុស្សធម៌​មួយ ជួយ​ដល់​ជន​គ្មាន​ទីពឹង នៅ​ក្រុងព្រះសីហនុ បាន​ថ្លែងប្រាប់ និង​អរគុណ​លោក គួច ចំរើន អភិបាលខេត្ត ព្រះសីហនុ នៅ​ព្រឹក​ថ្ងៃទី​២០ ខែឧសភា ឆ្នាំ​២០២២​ថាៈ ភ្លៀង​ធ្លាក់​ច្រើន កាលពី​យប់​ថ្ងៃទី​១៩ ឆ្លង​ចូល​ថ្ងៃទី​២០ ខែឧសភា មិនបាន​ធ្វើ ឱ្យមាន​ការ​លិច​ចូល ដល់​មណ្ឌល​ទៀតឡើយ សូម​អរគុណ​។​

​អង្គការ​ម្លប់​តាប៉ាង ជា​អង្គការ​មនុស្សធម៌​មួយ ដែលមាន​សកម្មភាព ជួយ​ដល់ ជន​គ្មាន​ទីពឹង មាន​ទីតាំងនៅ​ក្នុងភូមិ​៤ សង្កាត់​លេខ​៤ ក្រុងព្រះសីហនុ ដែលជា​តំបន់​ទំនាប កន្លងទៅ ពេល​មាន​ភ្លៀង​ធ្លាក់ មក​ច្រើន​ម្តងៗ តែងតែ លិចលង់ ដល់​ជម្រៅ​ជាង ១​ម៉ែត្រ និង​មាន​រយៈពេល ជាច្រើន​ម៉ោង តែ​ភ្លៀង​ដល់​កម្រិត ១៣១ មី​លី​ម៉ែត្រ កាលពី​យប់​ថ្ងៃទី​១៩ ឧសភា​នេះ មិនបាន​ធ្វើ ឱ្យ​តំបន់​នេះ មានការ​លិចលង់​ទេ បន្ទាប់ពី​ប្រឡាយ (​អូរ​) កាត់​តំបន់​នេះ ត្រូវបាន​រដ្ឋបាលខេត្ត​ព្រះសីហនុ សាងសង់​ជញ្ជាំង​បេតុង​ខ្ពស់ ឱ្យ​ទឹក​ហូរ​ចុះ ទៅកាន់ សមុទ្រ​។​តំបន់​នេះ​នៅ ទទួល​តែ​របប​ទឹកភ្លៀង ដែល​ធ្លាក់​ពីលើ ដោយ​ត្រូវដាក់​ម៉ាស៊ីន​បូម ចេញ​នៅពេល​ខ្លះ​។​

​លោក ហេង សោភ័ណ​រិ​ទ្ធ ប្រធាន​មន្ទីរ​ធនធានទឹក និង​ឧតុនិយម ខេត្ត​ព្រះសីហនុ បាន​ប្រាប់ ឱ្យ​រស្មី​កម្ពុជា​ដឹង នៅ​ថ្ងៃទី​២០ ខែឧសភា ឆ្នាំ​២០២២​ថា ភ្លៀង​ធ្លាក់ រយៈពេល ២៤ ម៉ោង ត្រឹម​ព្រឹក​ថ្ងៃទី​២០ ខែឧសភា ដល់​កម្រិត ១៣១ មី​លី​ម៉ែត្រ លើ​ក្រុងព្រះសីហនុ មិនបាន​ធ្វើ ឱ្យមាន​ការលិចលង់​ទេ ដោយសារ​ភ្លៀ​ធ្លាក់ មិន​គំហុក តែ​ស្ថានភាព​ទឹក​ពេញប្រៀប តាម​អូរ និង​ប្រឡាយ មាន​ជញ្ជាំង​បេតុង ដែល​ទើប​សាងសង់​រួច ដោយ​រដ្ឋបាលខេត្ត ធ្លាក់ចូល​ទៅក្នុង​សមុទ្រ​។​

​ប្រធាន​មន្ទីរ​ខាងលើ បាន​និយាយ​ដោយ​ទទួលស្គាល់ថា ការធ្លាក់​ភ្លៀង​ដល់ កម្រិត​ជាង ១០០ មី​លី​ម៉ែត្រ​បែបនេះ ចៀស​មិន​ផុតពី​មានការ​ប៉ះពាល់ នៅ​កន្លែង​ខ្លះ មិន​ផុត​ទេ ពិសេស នៅតាម​ការដ្ឋាន កំពុង​សាងសង់​លូ​ស្ពាន និង​ប្រឡាយ ។ ភ្លៀង​មួយ​មេ​ធំ កាលពី​ថ្ងៃទី​១៩ ឧសភា ចាប់​សំរាម​ដោយ​ទ្រុង នៅតាម​អូរ និង​ប្រឡាយ មិនឱ្យ​ហូរ​ចូល​សមុទ្រ​បាន ចំនួន​បួន កុងតឺន័រ ខ្លីៗ ជា​ប្រភេទ​សំរាម​ដូចជា​សំបក​ដប ប្រអប់​ស្នោ ស្បោង​ប្លា​ស្ទីក​ជាដើម​។​

​របាយ​ទឹកភ្លៀង​ធ្លាក់ រយៈពេល ២៤ ម៉ោង លើ​ខេត្ត​ព្រះសីហនុ ត្រឹម​ព្រឹក​ថ្ងៃទី​២០ ឧសភា មាន​កម្រិត​ដល់ ១៣១ មី​លី​ម៉ែត្រ នៅ​ក្រុងព្រះសីហនុ​,១១២ មី​លី​ម៉ែត្រ លើ​ស្រុក ស្ទឹងហាវ​, ៣១​មី​លី​ម៉ែត្រ​លើ​ស្រុក​ព្រៃនប់ និង ៦​មី​លី​ម៉ែត្រ​លើ​ស្រុក កំពង់សីលា​៕/V​-PC