​ប្រែ​សម្រួលៈបំណង (CHINA DAILY,Xinhua,ASIA NEWS NETWORK)៖ ប្រធានាធិបតី​ចិន​លោក ស៊ី ជីន​ភីង​បាន​អំពាវនាវ​អោយ​បណ្តា​ប្រទេស​កំពុង​អភិវឌ្ឍន៍​ឈានមុខ​គេ​ក្នុង​ក្រុម​ប្រ៊ិ​កស៍​(Brics)​ដែល​រួមមាន ប្រេ​ស៊ីល រុស្ស៊ី ឥណ្ឌា ចិន​និង​អាហ្វ្រិក​ខាងត្បូង ជួយ​ផ្តល់​ស្ថិរភាព​និង​វិបុលភាព​នៅក្នុង​ទំនាក់ទំនង​អន្តរជាតិ ចំ​ពេល​ពិភពលោក​ជួប​ចលាចល​និង​អន្តរកាល​មួយ​។​

​ក្រុម​ប្រទេស​កំពុងអភិវឌ្ឍន៍​ធំ​ទាំង​ប្រាំ​ហៅថា​Brics​ត្រូវ​រំពឹងថា​នឹង​ពង្រឹង​ជំនឿ​ចិត្ត​របស់​គេ​ឆ្លងកាត់​ព្យុះភ្លៀង​និង​រលក ដោយ​ចាត់​វិធានការ​ជាក់ស្តែង​ដើម្បី​ជំរុញ​សន្តិភាព​និង​ការអភិវឌ្ឍ ប្រកាន់ខ្ជាប់​​ភាពត្រឹមត្រូវ​និង​យុត្តិធម៌ ព្រមទាំង​គាំទ្រ​លទ្ធិប្រជាធិបតេយ្យ​និង​សេរីភាព នេះ​បើ​តាម​លោក​ស៊ី​។​

​លោក​បាន​មានប្រសាសន៍​ដូច្នេះ​ក្នុងការ​ថ្លែង​តាម​វីដេអូ​បន្ត​ផ្ទាល់​មួយ​នៅពេល​បើក​សម័យប្រជុំរ​បស់​រដ្ឋមន្ត្រីការបរទេស​ក្រុម​ប្រទេស​Brics​កាលពី​ថ្ងៃ​ព្រហស្បតិ៍​ទី​១៩​ឧសភា​។​

​ឆ្នាំនេះ ចិន​ជា​ប្រទេស​ម្ចាស់ផ្ទះ​នៃ​ជំនួប​កំពូល​ប្រចាំឆ្នាំ​របស់​Brics និង​ពួក​មន្ត្រី​ជាន់​ខ្ពស់​មក​ពី​ប្រទេស​ទាំង​ប្រាំ បាន​ជួបប្រជុំ​នៅ​ប៉ុន្មាន​ខែ​មក​នេះ​ដើម្បី​ត្រៀម​រៀបចំ​ព្រឹត្តិការណ៍​ធំ​នេះ​។​ពួក​មន្ត្រី​និង​​អ្នកជំនាញការ​បាន​និយាយថា ជំនួប​កំពូល​ឆ្នាំ​នេះ​ត្រូវ​រំពឹងថា​នឹង​ពង្រឹង​ឯកភាព​និង​ចំណាត់ការ​រួម​ក្នុងចំណោម​ទីផ្សារ​កំពុង​ស្ទុះ​ឡើង​និង​ប្រទេស​កំពុងអភិវឌ្ឍន៍​ចំ​ពេល​ពិភពលោក​ជួប​ការ​ប្រឈម​ជា​​ច្រើន​។​

​ក្នុងការ​ថ្លែង​តាម​វីដេអូ លោក​ស៊ី​បាន​កត់សំគាល់ថា ផល​ប៉ះពាល់​មក​ពី​ការផ្លាស់ប្តូរ​ធំៗ​និង​ជំងឺ​ឆ្លងកូវី​ដ​១៩ ដែល​ពិភពលោក​ពុំ​ធ្លាប់​ជួប​ក្នុង​រយៈពេល​មួយ​សតវត្សរ៍​មក​នេះ​កំពុង​រួម​កម្លាំង​គ្នា​ហើយ​គួប​​ផ្សំ​នឹង​កក្តា​អស្ថិរភាព ភាពមិនប្រាកដប្រជា​និង​អសន្តិសុខ​កំពុង​កើនឡើង​នៅក្នុង​ស្ថានការណ៍​ពិភពលោក​។​

​បើ​តាម​លោក​ស៊ីន សន្តិភាព​និង​ការអភិវឌ្ឍ​នៅ​តែ​ជា​ប្រធានបទ​សំខាន់​គ្រប់ពេល ហើយ​បំណងប្រាថ្នា​របស់​មនុស្ស​គ្រប់​ប្រទេស​សំរាប់​ជីវិត​ប្រសើរ​ឡើង​នៅ​តែ​មិន​ផ្លាស់ប្តូរ​។​បេសកកម្ម​ជា​ប្រវត្តិសាស្ត្រ​សំរាប់​​សហគមន៍​អន្តរជាតិ​ក្នុង​ការបន្ត​សាមគ្គីភាព​និង​កិច្ចសហការ​ឈ្នះ​ឈ្នះ​ក៏​នៅតែ​មិន​ប្រែប្រួល​។​

​អំពី​សន្តិសុខ លោក​ស៊ី​បាន​និយាយ​អំពី​គំនិត​ផ្តួចផ្តើម​សន្តិសុខ​សកល​Global Security Initiative​ដែល​លោក​បាន​ស្នើឡើង​នៅពេល​បើក​កិច្ចប្រជុំ​ប្រចាំឆ្នាំ​របស់​វេទិកា​បូ​អាវ​សំរាប់​អាស៊ី​(Boao Forum for Asia)​កាល​ពី​មួយ​ខែ​មុន​។​

​លោក​ថា ទាំង​ប្រវត្តិសាស្ត្រ​និង​តថភាព​បង្ហាញ​ថា​ការ​ស្វះស្វែង​រក​សន្តិសុខ​ផ្ទាល់​របស់​នរណា​ម្នាក់​ដោយ​មិន​គិត​អំពី​ផលប៉ះពាល់​អ្នកដទៃ​នឹង​គ្រាន់តែ​បង្កបង្កើត​ភាព​តានតឹង​ថ្មីៗ​និង​ហានិភ័យ​ថែម​តែ​​ប៉ុណ្ណោះ​ដូច្នេះ «​ក្រុម​ប្រទេស​Brics​ត្រូវការ​ពង្រឹង​ការជឿទុកចិត្ត​ផ្នែក​នយោបាយ​ទៅវិញទៅមក​និង​កិច្ចសហប្រតិបត្តិកា​រ​សន្តិសុខ រក្សា​ការទាក់ទង​ជិតដិត​ហើយ​សម្របសម្រួល​គ្នា​លើ​បញ្ហា​អន្តរជាតិ​​និង​តំបន់​ធំៗ សម្របសម្រួល​ផលប្រយោជន​ស្នូល​ផង​គ្នា​និង​ការព្រួយបារម្ភ​ធំៗ​របស់គេ ព្រមទាំង​គោរព​អធិបតេយ្យភាព សន្តិសុខ​និង​ផលប្រយោជន៍​អភិវឌ្ឍ​ផង​គ្នា​»​។​

​លោក​ស៊ី​បាន​បន្ថែមថា ពួកគេ​ក៏​ត្រូវ​ប្រឆាំង​អនុត្តរភាព​និយម​និង​នយោបាយ​មហាអំណាច ច្រាន​ចោល​គំនិត​សង្គ្រាមត្រជាក់​និង​ការ​ប្រឈម​គ្នា​ដោយ​ប្លុក ហើយ​ធ្វើការ​រួមគ្នា​ដើម្បី​ស្ថាបនា​សហគមន៍​សន្តិ​​សុខ​សកល​មួយ​សំរាប់​ទាំងអស់គ្នា​៕

​ស៊ី អំពាវនាវ​អោយ​ក្រុម​ប្រទេស BRICS​ស្ថាបនា​សហគមន៍​សកល​មួយ​សំរាប់​សន្តិសុខ​ទាំងអស់គ្នា ហើយ​ប្រឆាំង​ការ​ស្វះស្វែង​រក​សន្តិសុខ​ផ្ទាល់​របស់​នរណា​ម្នាក់​ដោយ​មិន​គិត​អំពី​ផលប៉ះពាល់​អ្នកដទៃ​