ដោយៈ ប​.​ជ័យ / បន្ទាយ​មាន​ជ័​យៈ រដ្ឋបាល​ក្រុង​ប៉ោយប៉ែត បាន​បើក​ការដ្ឋាន សាងសង់ សួន​ដាក់ឈ្មោះថា ” ប៉ោយប៉ែត​តេ​ជោ ឈ្នះ ឈ្នះ ” នៅ​ចន្លោះ​ផ្លូវ ជាតិ​លេខ​៥ និង​ផ្លូវដែក​ប្រវែង ២៥០ ម៉ែត្រ ។​

​ពិធី​នេះ បានធ្វើ​ឡើង ក្រោម​អធិបតីភាព លោក ប៉ាន់​ខែម ប៊ុនថន នាយករង ខុទ្ទកាល័យ សម្តេច​តេ​ជោ ហ៊ុន សែន នាយករដ្ឋមន្ត្រី និង​មានការ​អញ្ជើញ ចូលរួម​ពី​មន្ត្រីរាជការ កងកម្លាំង អាជីវករ ប្រជាពលរដ្ឋ ជាច្រើន​នាក់ ។​

​លោក គាត ហ៊ុល អភិបាលក្រុង​ប៉ោយប៉ែត បានឱ្យដឹង​កាលពី​ថ្ងៃទី​១៩ ខែឧសភា​ថាៈ រដ្ឋបាល​ក្រុង និង​មន្ត្រី​ថ្នាក់ដឹកនាំ មន្ត្រី​ពាក់ព័ន្ធ បាន​នឹង​កំពុង​ធ្វើ​ហើយ នូវ​គម្រោង​ស្ថាបនា ” សួន​ប៉ោយប៉ែត តេ​ជោ​ឈ្នះ​ឈ្នះ ” ស្ថិតនៅ​ចន្លោះ​បណ្តោយ​ផ្លូវជាតិ​លេខ​៥ និង​ផ្លូវដែក ភូមិ​គីឡូ​លេខ​៤ សង្កាត់​ផ្សារកណ្ដាល នៃ​ទីប្រជុំជន ក្រុង​ប៉ោយប៉ែត ។​

​លោក​បាន​បន្តថាៈ អាច​ស្ថាបនា​សួន​នេះ​បាន គឺ​បន្ទាប់ពី​មានការ​សម្របសម្រួល រវាង​អាជ្ញាធរ និង​ប្រជាពលរដ្ឋ ដែល​បាន​តាំង​លំនៅ សង់​សំណង់​មិន​រៀបរយ នៅលើ​ចំណីផ្លូវ​សាធារណៈ ទាំង​២​ប្រភេទ​ខាងលើ​។ ពលរដ្ឋ យល់ព្រម​រុះរើ​ចេញពី​ទីតាំង​នេះ ដើម្បីឱ្យ​អាជ្ញាធរ ធ្វើការ អភិវឌ្ឍន៍​តំបន់​នេះ ទៅជា​ប្រយោជន៍​សាធារណៈ ហើយ​ពួកគេ ក៏​ទទួលបាន​ការសណ្ដោស ប្រណី ពីស​ម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ កម្ពុជា និង​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ផ្តល់នូវ​ដី​លំនៅឋាន​ស្របច្បាប់ ក្នុង​១​គ្រួសារ ១​ឡូ​តិ៍​ក្បាលដី គ្រាន់តែ​នៅ​ឆ្ងាយ គឺ​នៅ​ភូមិ​បឹង​ជង្រុក​តេ​ជោ​ឈ្នះ ឈ្នះ តាមរយៈ លោក ប៉ាន់​ខែម ប៊ុនថន នាយករង​ខុទ្ទកាល័យ សម្តេច​តេ​ជោ និង​ជា​ប្រធាន​ក្រុមការងារ សម្របសម្រួល ដោះស្រាយ​ទំនាស់​ដីធ្លី នៅ​ទីនោះ ៕/V-PC