​ប​.​ជ័យ / បន្ទាយមានជ័យ ដូច​រាល់​ឆ្នាំ​ដែរ គណៈ​:​អចិន្ត្រៃយ៍​គណបក្ស​ប្រជាជន​កម្ពុជា​ខេត្តបន្ទាយមានជ័យ​បានរៀបចំ​ទិវា​រំលឹក​វិញ្ញាណក្ខន្ធ​២០​ឧសភា​២០២២ នៅ​ទី​តម្កល់​អដ្ឋិធាតុ​ជនរងគ្រោះ​ក្នុង​របប​ប្រល័យពូជសាសន៍​ប៉ូល ពត​នៅ​បរិវេណ​វត្ត​សុភមង្គល​ភូមិ​-​សង្កាត់​អូរ​អំបិល​ក្រ​-​សិរីសោភ័ណ ក្រោម​អធិបតី​ដោយ លោក​អ៊ុ រាត្រី អភិបាលខេត្ត ព្រះសង្ឃ មន្ត្រី និង ប្រជាជន​ជាច្រើនរូប ។​

លោក​អ៊ុ រាត្រី បាន​ថ្លែងថា ថ្ងៃ ២០ ឧសភា ១៩៧៥ ជា​ថ្ងៃ​ដែល​ប៉ុលពត បានសម្រេច​ដាក់ចេញ​នយោបាយ​ប្រល័យពូជសាសន៍ ទើប​ក្រោយមក​ប្រជាជន​និង​រដ្ឋអំណាច​នៃ​សាធារណរដ្ឋ​ប្រជាមានិត​កម្ពុជា​បានកំណត់​ថ្ងៃនេះ​ជា​”​ទិវា​ចងកំហឹង “​ក្រោយ​មកជា​”​ទិវា​ចងចាំ​” និង​ជា​”​ទិវា​គោរព​វិញ្ញាណ​ក្ខ័​ន្ធ​”​ក្នុងន័យ រំលឹក​ឡើងវិញ​នូវ​បណ្ដា​ថ្ងៃ​ដ៏​ខ្មៅ​ងងឹត ក្នុង​នរក​លោកីយ៍​ប្រល័យពូជសាសន៍ ក្នុង​របប ៣ ឆ្នាំ ៨​ខែ​និង ២០ ថ្ងៃ ហើយក៏​ជា​
​ថ្ងៃ​គោរព​វិញ្ញាណ​ក្ខ័​ន្ធ​ចំពោះ​ប្រជាជន​កម្ពុជា​និង​ជនរងគ្រោះ​ឯទៀត ដែល​បាន​ស្លាប់ ក្រោយ​រង​ទទួល​ទារុណកម្ម​យ៉ាង​សែន​ខ្លោចផ្សារ​និង​អយុត្តិធម៌ ទាំង​ផ្លូវកាយ ផ្លូវចិត្ត ។​

​លោក​បាន​បន្ថែមថា របប​ប្រល័យពូជសាសន៍ ប៉ុលពត បាន​សាបព្រោះ​នូវ​ឧក្រិដ្ឋកម្ម​រាប់មិនអស់​មកលើ​រចនាសម្ព័ន្ធ​សង្គម​ទាំងមូល ត្រូវ​ច្របូកច្របល់​ក្រឡាប់​ចក្រ រលំរលាយ​។​
ប្រជាជន​ត្រូវគេ​ដកហូត​នូវ​សិទ្ធិសេរីភាព សូម្បីតែ​ការរស់នៅ​ជា​មនុស្ស​ក៏​គ្មាន​ផង ។​គឺ​មានតែ​ទារុណកម្ម ការកាប់សម្លាប់ និង​ការបំផ្លិចបំផ្លាញ​ប៉ុណ្ណោះ​ដែល​ប្រជាជន​ត្រូវ​ទទួល​។

​លោក បាន​បន្តថា : ដោយ​ក្តាប់បាន​នូវ​ចរិត និង​ផែនការ​ប្រកបដោយ​មហន្ត​រាយ ដែល​នាំទៅដល់​ការ​ការ​រលំរលាយ​សាបសូន្យ​សំរាប់​ប្រជាជាតិ​កម្ពុជា​ទាំងមូល កម្លាំង​សាមគ្គី​ប្រជាជាតិ​មួយ​ដែល​ដឹកនាំ​ដោយ​គណបក្ស​ប្រជាជន​កម្ពុជា និង​ការជួយឧបត្ថម្ភ គាំទ្រ​ពី​បក្ស រដ្ឋ​និង​ប្រជាជន​វៀតណាម ក៏​ដូច​អ្នក​ស្នេហា​ប្រជាជន​លើ​លោក​ត្រូវបាន​ប្រមូលផ្ដុំ​ជា​ចលនា​តស៊ូ​ប្រឆាំងនឹង​របប​កម្ពុជា​ប្រជាធិបតេយ្យ នៅ​តំបន់​មួយចំនួន​រហូត​បានទទួល​ជ័យជំនះ នា​ថ្ងៃទី ៧ ខែមករា ឆ្នាំ ១៩៧៩​។​.mara