​ប្រែ​សម្រួលៈ​បំណង​(​ដេល្លី​ម៉េល​)៖ បេក្ខជន​នាំមុខ​ក្នុង​ការបោះឆ្នោត​នៅ​អូស្ត្រាលី លោក អ៊ែន​ថូ​នី អាល់​ប៊ែរ​នី​ស​(Anthony Albanese)​បាន​ស្នើ​សុំ​អ្នក​បោះឆ្នោត​អូស្ត្រាលី​ចេញមក​បោះឆ្នោត​នៅ​ថ្ងៃ​សៅរ៍​​ទី​២១​ឧសភា​នេះ​ដើម្បី​ផ្តល់​អោយ​គណបក្ស​កណ្តាល​លម្អៀង​ឆ្វេង​របស់លោក​ដឹកនាំ​ប្រទេស​ម្តងក្រោយ​ស្ថិត​ក្រោ​ម​ការដឹកនាំ​របស់​ក្រុម​អភិរក្ស​អស់​ពេល​មួយ​ទសវត្សរ៍​មក​ហើយ​។​

​ប្រជាជន​អូស្ត្រាលី​ចាប់ផ្តើម​បោះឆ្នោត​សហព័ន្ធ​កាលពី​ថ្ងៃ​សៅរ៍​ដើម្បី​កំណត់​ថា​នរណា​គ្រប់គ្រង​សភា ព្រឹទ្ធសភា ហើយ​នឹង​នរណា​នៅក្នុង​តំណែង​នាយករដ្ឋមន្ត្រី​

​លោក អាល់​ប៊ែរ​នី​ស មេដឹកនាំ​គណបក្ស​ការងារ អាយុ​៥៧​ឆ្នាំរូបនេះ​បាន​អំពាវនាវ​អោយ​ប្រជាជន​ងាក​ចេញ​ពី​នាយក​រដ្ឋមន្ត្រី​បង្ក​ការបែកបាក់​លោក ស្កុត ម៉ូ​រី​សុន​( Scott Morrison)​ដែលមាន​​សម្លេង​នៅ​ពី​ក្រោយ​លោក​ក្នុង​ការស្ទង់មតិ​។​លោក​បាន​សន្យា​បញ្ចប់​គោលជំហរបែប​ជ្រែងជើង​របស់​អូស្ត្រាលី​ស្តី​ពី​អាកាសធាតុ ជួយ​ប្រជាជន​ដែល​កំពុងត​ស៊ូនឹង​ទំនិញ​ឡើងថ្លៃ ហើយ​នឹងធ្វើការ​បោះ​ប្រជាមតិ​មួយ​ស្តីពី​ការ​​ផ្តល់​អោយ​ក្រុម​ជនជាតិដើម​នូវ​សម្លេង​មួយ​ក្នុង​ការបង្កើត​គោលនយោបាយ​ជាតិ​។​

​លោក​បាន​និយាយ​ក្នុងពេល​ទៅ​មើល​ស្ថានីយបោះឆ្នោត​មួ​យ​និង​ថត​សែ​ល​ហ្វី​ជាមួយ​អ្នក​មូលដ្ឋាន​ក្នុង​ទីក្រុង​មែ​ល​ប៊ឺន​ថា «​ខ្ញុំ​មាន​អារម្មណ៍​ថា​កំពុង​មាន​សម្ទុះ​គាំទ្រ​។​សូម​ផ្តល់​អោយ​គណបក្ស​ការងារ​នូវ​ឳ​កា​​ស​ម្តង​។​យើង​មាន​ផែនការ​សំរាប់​ប្រទេស​នេះ»​។​

​លោក​បាន​ពណ៌នា​នាយក​រដ្ឋមន្ត្រី​បច្ចុប្បន្ន​ថា ជា​«​បុគ្គល​បង្ក​ការបែកបាក់​បំផុត​ដែល​ខ្ញុំ​មិនដែល​ជួប​។​យើង​មាន​ផែនការ​ឆក់​ឳ​កាស​ចាត់ការ​ចាប់ពី​បញ្ហា​អាកាសធាតុ​ឡើង​»​។​

​នៅលើ​ទឹកដី​ដែល​កំពុង​ខ្លាច​នឹង​ភ្លើង​ឆេះ​ព្រៃ ទឹកជំនន់ និង​ភាពរាំងស្ងួត ការប្រែប្រួល​អាកាសធាតុ​ជា​អ្វី​ដែល​ស្ថិតនៅ​ក្នុង​ចិត្ត​របស់​អ្នកបោះឆ្នោត​។​លោក​ថា «​ខ្ញុំ​ធំ​ដឹងក្តី​នៅក្នុង​សហគម​ន៍​មួយ​ដែល​រង​​គ្រោះ​ខ្លាំង​ពី​ភ្លើងព្រៃ​និង​ទឹកជំនន់​នៅ​ប្រាំ​ឆ្នាំ​មកនេះ ។​ការ​ឃើញ​ចំណាត់ការ​លើ​បញ្ហា​នេះនិង​បញ្ឈប់​កុំអោយ​វា​កើត​ឡើង​ជា​ថ្មី ជា​រឿង​អស្ចារ្យ​ណាស់​»​។​

​លោក អ៊ែន​ថូ​នី អាល់​ប៊ែរ​នី​ស សុំ​អោយ​អ្នកបោះឆ្នោត​ផ្តល់​ឳ​កាស​ដល់​ក្រុម​លោក​ដឹកនាំ​ប្រទេស​ម្តង​

​នៅ​ពេល​អ្នក​បោះឆ្នោត​កំពុង​ឈរ​ជា​ជួរ​វែងៗ​នៅ​ស្ថានីយបោះឆ្នោត​ជាច្រើន លោក​ម៉ូ​រី​សុន​បាន​ចោទប្រកាន់​គូប្រជែង អាល់​ប៊ែរ​នី​ស ថា​«​មាន​ជំនឿ​លើ​ខ្លួនឯង​ខ្លាំងពេក​» ក្នុងការ​ទាយ​ទុក​ថា​គណបក្ស​​ការងារ​នឹង​ឈ្នះ​ការបោះឆ្នោត​នេះ​។​

​មេដឹកនាំ​វ័យ​៥៤​ឆ្នាំ​នេះ​បាន​និយាយ​នៅ​មុន​ការបោះឆ្នោត​ចាប់ផ្តើម​ថា «​អ្នក​មិន​អាច​មាន​ជំនឿ​ចិត្ត​ជា​មុន​ជ្រុល​ពេក​ទេ​»​និង​ថា​លោក​មិន​មាន​ជំនឿ​ថា​គណបក្ស​ការងារ​អាចដឹកនាំ​សេដ្ឋកិច្ច​បាន​​ល្អ​ទេ​។​

​ការបោះឆ្នោត​នេះ​ដូច​ជា​ការ​ចាប់បង្ខំ ដោយ​ត្រូវ​ពិន័យ​២០​ដុល្លារ​អូស្ត្រាលី​(១៤​ដុល្លារ​អាម៉េរិក​) តែ​ក៏​នឹង​ត្រូវ​បាន​លើកទឹកចិត្ត​ដោយកន្លែង​បោះឆ្នោត​ជាច្រើន​មាន​កន្លែង​ទទួល​អាហា​រសាច់​អាំងសំរាប់អ្នកបោះឆ្នោតថែមទៀត​។​ការបោះ​​ឆ្នោត​នេះ​នឹង​កំណត់​ថា​នរណា​គ្រប់គ្រង​សភា ព្រឹទ្ធសភា ហើយ​នឹង​នរណា​នៅក្នុង​តំណែង​នាយករដ្ឋមន្ត្រី​។​

​ការស្ទង់មតិ​ពីរ​លើក​ចុងក្រោយ បង្ហាញ​គណបក្ស​ការងារ​នាំមុខ​ក្រុមចំរុះ​ដឹកនាំ​ដោយ​គណបក្ស​សេរីនិយម​របស់​លោក​ម៉ូ​រី​សុន​ចំនួនប្រាំមួយ​ពិន្ទុះ តែ​ខណៈ​ការប្រកួតប្រជែង​នៅ​ប្រកៀក​ប្រកិត គ្មាន​គណ​​បក្ស​ណា​ធានា​ជោគជ័យ​ដាច់​ឡើយ​៕

​ម៉ូ​រី​សុន អួត​អំពី​អត្រា​ការងារ​ធ្វើ​ខ្ពស់​ក្រោម​ការដឹកនាំ​របស់​លោក​