​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អ្នកវិទ្យាសាស្ត្រ ដែល​បាន​តាមដាន​ការរីក​រាលដាល​ច្រើនឡើង​នៃ​ជំងឺឃ្លង់​ស្វា​(​អុត​ស្វា​)​នៅ​ទ្វីបអាហ្វ្រិក បាន​និយាយថា​ពួកគេ​កំពុង​ទាល់​តម្រិះ​ចំពោះ​ការរីក​រាល​​ដាល​នៃ​ជំងឺ​នេះ​នៅ​ទ្វីបអឺរ៉ុប​និង​អាម៉េរិក​ខាងជើង​។​

​ករណី​នៃ​ជំងឺ​ដែល​ទាក់ទង​នឹង​ជំងឺ​អុត​ស្វា​នេះ​ពី​មុន​ត្រូវ​បាន​រកឃើញ​តែ​ក្នុងចំណោម​មនុស្ស​ដែលមាន​ទំនាក់ទំនង​ជាមួយ​អាហ្វ្រិក​កណ្តាល​និង​ខាងលិច​ប៉ុណ្ណោះ​។ ប៉ុន្តែ​កាលពី​សប្តាហ៍​មុន ចក្រភព​អង់គ្លេស អេ​ស្ប៉ាញ ព័រ​ទុយ​ហ្គាល់ អ៊ីតាលី សហរដ្ឋ​អាម៉េរិក ស៊ុយអែត និង​កាណាដា សុទ្ធតែ​បាន​រាយការណ៍​ពី​ការឆ្លង​ជំងឺ​នេះ​ដែរ ដែល​ភាគច្រើន​ឆ្លង​ចំពោះ​បុរស​វ័យក្មេង​ដែល​មិនបាន​ធ្វើ​ដំណើរ​ទៅ​អាហ្វ្រិក​ពីមុន​។​

​អង្គការ​សុខភាព​ពិភពលោក (WHO)​បាន​និយាយថា​មាន​ករណី​ដែល​បានបញ្ជាក់​ប្រហែល ៨០ នៅ​ទូទាំង​ពិភពលោក និង ករណី​សង្ស័យ ៥០ ផ្សេងទៀត​។ ប្រទេស​បារាំង អាល្លឺម៉ង់ បែលហ្ស៊ិក​និង​អូស្ត្រាលី​​បាន​រាយការណ៍​ករណី​ដំបូង​របស់​ពួកគេ​កាលពី​ថ្ងៃ​សុក្រ​ទី​២០​ឧសភា​។​

​លោក អូ​យ៉េ​វែល តូ​ម៉ូ​រី (Oyewale Tomori) ជា​អ្នកឯកទេស​ខាង​មេរោគ ដែល​ធ្លាប់​ជា​ប្រធាន​បណ្ឌិត្យសភា​វិទ្យាសាស្ត្រ​នី​ហ្សេ​រី​យ៉ា និង​ដែល​អង្គុយ​នៅ​ក្រុមប្រឹក្សា​ជាច្រើន​របស់ WHO បាន​និយាយថា “​ខ្ញុំ​ស្រឡាំងកាំង​នឹង​រឿង​នេះ​។ រាល់ថ្ងៃ​ខ្ញុំ​ភ្ញាក់ឡើង​មាន​ប្រទេស​ជាច្រើន​បាន​ឆ្លង​មេរោគ​នេះ​”​។​

​លោក​បាន​និយាយថា “​នេះ​មិនមែន​ជា​ប្រភេទ​នៃ​ការរីក​រាលដាល​ដែល​យើង​បានឃើញ​នៅ​អាហ្វ្រិក​ខាងលិច​ទេ ដូច្នេះ​ប្រហែល​ជា​មាន​អ្វី​ថ្មី​កើត​ឡើង​នៅ​លោកខាងលិច​”​។​

​រហូតមកទល់​ពេលនេះ​មិន​មាន​អ្នកណាម្នាក់​ស្លាប់​ដោយសារ​ជំងឺ​នេះ​ទេ​។ ជំងឺឃ្លង់​ស្វា​ជាធម្មតា​បណ្តាល​ឱ្យ​ក្តៅខ្លួន ញាក់ កន្ទួល និង​ដំបៅ​នៅ​លើ​មុខ ឬ​ប្រដាប់ភេទ​។ WHO ប៉ាន់ប្រមាណ​ថា​ជំងឺ​នេះ​អាច​​បណ្តាលឱ្យ​ស្លាប់​ម្នាក់​ក្នុងចំណោម​មនុស្ស ១០ នាក់ ប៉ុន្តែ​វ៉ាក់សាំង​ជំងឺ​អុតស្វាយ​គឺ​អាច​ការពារ​បាន ហើយ​ថ្នាំ​ប្រឆាំង​មេរោគ​មួយចំនួន​កំពុង​ត្រូវបាន​បង្កើតឡើង​៕

​ឃ្លង់​ស្វា​កំពុង​រាលដាល​លើ​ពិភពលោក​យ៉ាង​រហ័ស​ជាពិសេស​នៅ​អឺរ៉ុប​និង​សហរដ្ឋ​អាម៉េរិក