ដោយ​:​សុវណ្ណ​កុម្ភៈ​/​ភ្នំពេញ​: ការប្រកួត​កីឡា​ម៉ូតូ​ទឹក​ជើងឯក​អាស៊ីអាគ្នេយ៍ ឆ្នាំ​២០២២ ដែល​កម្ពុជា​ធ្វើជា​ម្ចាស់ផ្ទះ លើកដំបូង​ត្រូវបាន​កីឡាករ​បរទេស និង​គណៈកម្មការ​ជំនាញ​អន្តរជាតិ​វាយតម្លៃថា «​ស្របតាម​ស្តង់ដារ​អន្តរជាតិ​»​។​

​លោក​ណុះ ស្លេះ ប្រធាន​សហព័ន្ធ​កីឡា​ម៉ូតូ​ទឹក​កម្ពុជា អះអាងថា ទាំង​ការត្រួតពិនិត្យ​បច្ចេកទេស​ផ្សេងៗ​ក្នុងការ​ប្រកួត ដូចជា​ការរៀបចំ​ទីលាន​ប្រកួត ការផ្តល់​ពិន្ទុ ការវាយតម្លៃ​អាជ្ញាកណ្តាល ចៅក្រម និង​ការត្រួតពិនិត្យ​គ្រឿង​ម៉ាស៊ីន​ក៏​ទទួលបាន​ការកោតសរសើ​រ ពី​អ្នកជំនាញ​អន្តរជាតិ​ដែរ​។​


លោក​ប្រធាន​សហព័ន្ធ​បន្តថា ដំបូង​គណៈកម្មការ​ក​ម្ពុ​ជា​រៀបចំ​ការប្រកួត​៤​វិញ្ញាសារ ក្នុងចំណោម​៧​វិញ្ញាសារ គឺ​ទទួលបាន​លទ្ធផល​ល្អ​មិន​រអាក់រអួល​អ្វី​នោះទេ​។ ការប្រកួត​នេះដែរ កីឡាករ​កម្ពុជា​ធ្វើ​បានល្អ​ដូច​ការគ្រោងទុក​របស់​សហព័ន្ធ​ដែល​បានដាក់​ចេញ​នូវ​គោលការណ៍​បង្កើន​សិទ្ធ​ផល​អត្ត​ព​លិ​ក និង​ពង្រឹងសមត្ថភាព​មន្ត្រី​រៀបចំ​ការប្រកួត​របស់​សហព័ន្ធ​ឲ្យ​កាន់តែ​ល្អ ត្រៀម​រៀបចំ​ការប្រកួត​ថ្នាក់ជាតិ និង​អន្តរជាតិ​។ ជាពិសេស​ព្រឹត្តិការណ៍​កីឡា​ស៊ី​ហ្គេម​លើក​ទី​៣២ នា​ឆ្នាំ​២០២៣ ដែល​កម្ពុជា​ធ្វើជា​ម្ចាស់ផ្ទះ​លើកដំបូង​។​

ប្រមុខ​សហព័ន្ធ​កីឡា​ម៉ូតូ​ទឹក​រូបនេះ​បញ្ជាក់ទៀតថា​ក្នុងចំណោម​៤​វិញ្ញាសារ កីឡាករ​កម្ពុជា​ធ្វើបាន​ល្អ​លើ​៣​វិញ្ញាសារ ដោយ​ទទួលបាន​ចំណាត់ថ្នាក់​លេខ​១ លេខ​២ និង​លេខ​៣​។​

ទាំងនេះ​ស​បញ្ជាក់ថា​សហព័ន្ធ​កីឡា​ម៉ូតូ​ទឹក​កម្ពុជា​បាន​ត្រៀមខ្លួន​រួចជាស្រេច​ក្នុងការ​រៀបចំ​ព្រឹត្តិការណ៍​ប្រកួត​ជាពិសេស​ការដណ្តើម​មេដាយ​ជូន​ជាតិ​ពី​ព្រឹត្តិការណ៍​ប្រកួត​អន្តរជាតិ​នានា​។​

ការប្រកួត​អន្តរជាតិ​នេះ​កម្ពុជា​បាន​អញ្ជើញ​គណៈកម្មការ​អន្តរជាតិ​ដែលមាន​សមាជិក​១៣​នាក់​មកជួយ​បង្រៀន​និង​ពង្រឹង​ចំណេះ​ជំនាញ​មន្ត្រី​បច្ចេកទេស​រៀបចំ​ការប្រកួត តាំងពី​បណ្តុះបណ្តាល​នៅ​ប្រទេស​ថៃ​រហូត​ដល់ពេល​កម្ពុជា​ធ្វើជា​ម្ចាស់ផ្ទះ​។​

​ព្រឹត្តិការណ៍​នេះ​មាន​កីឡាករ​៦០​នាក់​មកពី​៤​ប្រទេស​ចូលរួម គឺ​ម្ចាស់ផ្ទះ​កម្ពុជា ឥណ្ឌូនេស៊ី ម៉ាឡេស៊ី និង​ថៃ​៕​