ដោយ​៖ ម៉េង​ឆៃ / ភ្នំពេញ​៖ នៅក្នុង​សប្តាហ៍​នេះ មាន​ព្រឹត្តិការណ៍​ជាតិ​ជាច្រើន បានកើត​ឡើង ក្នុងនោះ មាន​សម្តេច​តេ​ជោ ហ៊ុន សែន បានបញ្ចប់​ដំណើរ​អញ្ជើញ​ទៅ​ចូលរួម កិច្ចប្រជុំ​កំពូល ពិសេស អាស៊ាន​-​អាមេរិក នៅ​ទីក្រុង​វ៉ាស៊ីនតោន ហើយ​សម្តេច​តេ​ជោ ហ៊ុន សែន នៅ​ចុង​សប្តាហ៍​នេះ បាន​អញ្ជើញ​ទៅ​ចូលរួម​កិច្ចប្រជុំ នៅ​អឺរ៉ុប ក្នុង​វេទិកា​សេដ្ឋកិច្ចពិភពលោក ឆ្នាំ​២០២២ នៅ​ប្រទេស​ស្វី​ស រួមទាំង​ព្រឹត្តិការណ៍​ជាតិ​សំខាន់ៗ ជាច្រើន​ទៀត​។​

១- មេដឹកនាំ​អាស៊ាន​-​អាមេរិក ប្តេជ្ញា​បង្កើត​ភាពជា​ដៃគូ​យុទ្ធសាស្ត្រ គ្រប់​ជ្រុងជ្រោយ និង​រក្សា​សន្តិភាព សន្តិសុខ ស្ថិរភាព​ក្នុង​តំបន់
​ក្នុង​កិច្ចប្រជុំ​កំពូល​ពិសេស កាលពី​ថ្ងៃទី​១២-១៣ ខែឧសភា ឆ្នាំ​២០២២ មេដឹកនាំ​អាស៊ាន និង​ប្រធានាធិបតី​សហរដ្ឋអាមេរិក បាន​អះអាង​ជាថ្មី​នូវ​ការប្តេជ្ញាចិត្ត​រួមគ្នា ក្នុងការ​ពង្រឹង និង​កសាង​ទំនាក់ទំនង​ដៃគូ​សន្ទនា អាស៊ាន​-​សហរដ្ឋអាមេរិក ឱ្យ​កាន់តែ​ទូលំទូលាយ​ថែមទៀត ដែល​មិនអាច​ខ្វះ​បាន ចំពោះ​អាស៊ាន និង​សហរដ្ឋអាមេរិក ក៏ដូចជា សម្រាប់​តំបន់ និង​សហ​គន៍​អន្តរជាតិ​។ ភាគី​ទាំងពីរ អាស៊ាន​-​សហរដ្ឋអាមេរិក យល់ឃើញថា ទំនាក់ទំនង​ទាំងនេះ គឺជា​មូលដ្ឋានគ្រឹះ សម្រាប់​លើកកម្ពស់ និង​រក្សា​សន្តិភាព សន្តិសុខ ស្ថិរភាព និង​វិបុលភាព ក្នុង​តំបន់​។​

២- គ​.​ជ​.​ប អំពាវនាវ​ដល់​ប្រជាពលរដ្ឋ និង​អ្នកពាក់ព័ន្ធ​ទាំងអស់ ត្រៀមខ្លួន ដើម្បី​ចូលរួម បោះឆ្នោត​ជ្រើសរើស​ក្រុមប្រឹក្សា ឃុំ សង្កាត់ អាណត្តិ​ទី​៥
​កាលពី​ថ្ងៃទី​១៦ ខែឧសភា គណៈកម្មាធិការ​ជាតិ រៀបចំ​ការបោះឆ្នោត (​គ​.​ជ​.​ប​) បាន​អំពាវនាវ ដល់​ប្រជាពលរដ្ឋ គណៈកម្មការ​ឃុំ​-​សង្កាត់ រៀបចំ​ការបោះឆ្នោត មេឃុំ​-​ចៅសង្កាត់ និង​មេភូមិ ឲ្យ​ត្រៀមខ្លួន និង​ត្រៀម​អត្តសញ្ញាណប័ណ្ណ​សញ្ជាតិ​ខ្មែរ ឬ​ឯកសារ​បញ្ជាក់​អត្តសញ្ញាណ បម្រើ​ឲ្យ​ការបោះឆ្នោត ដើម្បី​ចូលរួម​ការបោះឆ្នោត​ជ្រើសរើស ក្រុមប្រឹក្សាឃុំ សង្កាត់ អាណត្តិ​ទី​៥ ឆ្នាំ​២០២២ នា​ថ្ងៃអាទិត្យ ទី​៥ ខែមិថុនា​ខាងមុខ​។​

៣- សម្តេច​តេ​ជោ ហ៊ុន សែន ជួប​សំណេះសំណាល​ជាមួយ ក្រុមគ្រូពេទ្យ​ស្ម័គ្រចិត្ត​យុវជន សម្តេច​តេ​ជោ ប្រយុទ្ធ​នឹង​ជំងឺ​កូ​វីដ
​កាលពី​ថ្ងៃទី​១៧ ខែឧសភា សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បាន​អញ្ជើញ​ជួប សំណេះសំណាល​ជាមួយ​ក្រុមគ្រូពេទ្យ​ស្ម័គ្រចិត្ត​យុវជន​សម្ដេច​តេ​ជោ​ប្រឆាំងនឹង​ជំងឺ​កូ​វីដ​១៩​។ ពិធី​សំណេះសំណាល នៅ​សាល​ពិព័រណ៍​ជ្រោយចង្វារ ក្នុង​រាជធានី​ភ្នំពេញ បានធ្វើ​ឡើង ដើម្បី​ជាការ​លើកទឹកចិត្ត ដល់​ក្រុមគ្រូពេទ្យ​ស្ម័គ្រចិត្ត​ទាំងអស់ ដែល​បាន​ចូលរួមចំណែក ប្រកបដោយ​ការទទួលខុសត្រូវ ក្នុង​បេសកកម្ម​ប្រយុទ្ធ​ប្រឆាំងនឹង​ជំងឺ​កូ​វីដ​១៩ នាពេល​កន្លងមក ដែល​បច្ចុប្បន្ន រាជរដ្ឋាភិបាល​កម្ពុជា អះអាងថា បានទទួល​ជោគជ័យ មួយ​ភាគ​ធំ រួចជាស្រេច​ហើយ​។

៤- សម្ដេច​តេ​ជោ ហ៊ុន សែន ពន្យល់​សាធារណជន និង​រម្លឹក​សហរដ្ឋអាមេរិក ពី​ទិដ្ឋភាព​ច្បាប់ និង​នយោបាយ ពាក់ព័ន្ធ​នឹង​អ្នក​គប់​ស្បែកជើង មកលើ​សម្ដេច នៅ​សហរដ្ឋ​អា​មេ​រិច
​ក្នុង​ពិធី​សំណេះសំណាល ជាមួយ​ក្រុមគ្រូពេទ្យ​ស្ម័គ្រចិត្ត​យុវជន​សម្ដេច​តេ​ជោ នៅ​មជ្ឈមណ្ឌល​ពិព័រណ៍​ជ្រោយចង្វារ កាលពី​ថ្ងៃទី​១៧ ខែឧសភា សម្ដេច​តេ​ជោ ហ៊ុន សែន នាយករដ្ឋមន្ត្រី បាន​មានប្រសាសន៍ ពន្យល់​សាធារណជន និង​រម្លឹក​សហរដ្ឋអាមេរិក ពី​ទិដ្ឋភាព​ច្បាប់ និង​នយោបាយ ពាក់ព័ន្ធ​នឹង​បុរស​ម្នាក់ ដែល​បាន​គប់​ស្បែកជើង លើ​រូប​សម្ដេច នៅ​សហរដ្ឋអាមេរិក​។ ពលរដ្ឋ​ខ្មែរ ភាគច្រើន បាន​ថ្លែង​ប្រតិកម្ម​ថ្កោលទោស និង​ប្រកាសថា ជា​ទង្វើ ដែល​មិនអាច​អត់ឱន​ឲ្យ​បាន​។ បុរស​ដែល​គប់​ស្បែកជើង​លើស​ម្ដេច​តេ​ជោ ហ៊ុន សែន ត្រូវបាន​គេ​ស្គាល់ ឈ្មោះថា អ៊ុក ទូច វ័យ ៧១​ឆ្នាំ ជា​ពលរដ្ឋ​ខ្មែរ រស់នៅ​រដ្ឋ​កាលីហ្វ័រ​ញ៉ា សហរដ្ឋអាមេរិក​។ បុរស​រូបនេះ បាន​គប់​ស្បែកជើង សំដៅ​មក​សម្ដេច​តេ​ជោ ហ៊ុន សែន នៅ​យប់​ថ្ងៃទី​១១ ខែឧសភា ឆ្នាំ​២០២២ គ្រា​ដែល​សម្ដេចនាយក​រដ្ឋមន្ត្រី កំពុង​ត្រូវបាន ស្វាគមន៍ និង​ថតរូប​អនុ​ស្សវ​រី​យ៍ ជាមួយ​ពលរដ្ឋ​ខ្មែរ​ជាច្រើន ដែល​គាំទ្រ​សម្ដេច អញ្ជើញ​ចូលរួម កិច្ចប្រជុំ​ពិសេស​អាស៊ាន​-​សហរដ្ឋ​អា​មេ​រិច នៅ​ទីក្រុង​វ៉ាស៊ីនតោន សហរដ្ឋអាមេរិក កាលពី​សប្តាហ៍​មុន​។​

៥-​សម្តេច​ក្រឡាហោម ស ខេង ពិនិត្យ​លទ្ធភាព​បើក​ច្រកព្រំដែន និង​បញ្ជាក់​ពី​គម្រោង​កសាង ស្ពាន​កម្ពុជា​-​ឡាវ ក្នុង​ពិធី​សម្ពោធ​ដាក់​ឲ្យ​ប្រើប្រាស់​ជា​ផ្លូវការ វេទិកា​អុំទូក និង​សំណង់ សិល្បការ​ផ្សេងៗ ស្ថិតក្នុង​ភូមិ​កំពង់​ស្រឡៅ ឃុំ​កំពង់​ស្រឡៅ​មួយ ស្រុក​ឆែប ខេត្តព្រះវិហារ កាលពី​ថ្ងៃទី​១៧ ខែឧសភា សម្ដេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួង មហាផ្ទៃ បានបញ្ជាក់​ថាៈ សម្តេច​នឹង​ពិនិត្យ​លទ្ធភាព​បើក​ច្រកព្រំដែន ជាមួយ​ភាគី​ឡាវ ឡើងវិញ​។ ក្នុងនោះ ក៏មាន​គម្រោង​កសាង​ស្ពាន​ឆ្លង​ព្រំដែន រវាង​ប្រទេស​ទាំងពីរ​ផងដែរ​។​

៦- ក្រសួងសុខាភិបាល ប្រកាស​ផ្អាក​ការចាក់​វ៉ាក់សាំង​កូ​វីដ ៣​ថ្ងៃ ក្នុងអំឡុងពេល​បោះឆ្នោត​ឃុំ​សង្កាត់ នៅ​ដើមខែ​ក្រោយ ក្រសួងសុខាភិបាល បានប្រកាស ផ្អាក​ជា​បណ្តោះអាសន្ន នូវ​ការចាក់​វ៉ាក់សាំង​កូ​វីដ​១៩ ចំនួន ៣​ថ្ងៃ គឺ​នៅ​ថ្ងៃទី​៤-៥ និង​ថ្ងៃទី​៦ ខែមិថុនា ក្នុងអំឡុងពេល​បោះឆ្នោត​ក្រុមប្រឹក្សា ឃុំ​សង្កាត់ អាណត្តិ​ទី​៥ ដែល​ប្រព្រឹត្តទៅ នៅ​ថ្ងៃទី​៥ ខែមិថុនា ឆ្នាំ​២០២២ ខាងមុខនេះ​។ នៅ​ថ្ងៃទី​៧ មិថុនា ដំណើរ​ការចាក់​វ៉ាក់សាំង បង្ការ​ជំងឺ​កូ​វីដ​១៩ នៅ​ទូទាំងប្រទេស នឹង​ចាប់ផ្តើម​ឡើងវិញ​។​

៧-​សម្តេច​តេ​ជោ ហ៊ុន សែន នឹង​អញ្ជើញ​ទៅ​ចូលរួម​កិច្ចប្រជុំ នៃ​វេទិកា​សេដ្ឋកិច្ចពិភពលោក នៅ​ប្រទេស​ស្វី​ស ចាប់ពី​ថ្ងៃទី​២២-២៦ ខែឧសភា​
​ក្រសួងការបរទេស បានប្រកាសថា សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា នឹង​ដឹកនាំ គណៈប្រតិភូ​ជាន់ខ្ពស់ អញ្ជើញ​ទៅ​ចូលរួម​កិច្ចប្រជុំ ប្រចាំឆ្នាំ​២០២២ នៃ​វេទិកា​សេដ្ឋកិច្ច ពិភពលោក ចាប់ពី​ថ្ងៃទី​២២ ដល់​ថ្ងៃទី​២៦ ខែឧសភា ឆ្នាំ​២០២២ នៅ​ទីក្រុង​ដា​វ៉ស​-​ក្លូ​ស្ទ័​រ ប្រទេស​ស្វី​ស​។ កិច្ចប្រជុំ​នៃ​វេទិកា​សេដ្ឋកិច្ចពិភពលោក នឹង​រៀបចំ​ធ្វើ ក្រោម​ប្រធានបទ «​ការត្រៀមខ្លួន សម្រាប់​យុគសម័យ ក្រោយ​ជំងឺ​កូ​វីដ​»​។ កាលពី​ម៉ោង ១​កន្លះ កណ្តាលអធ្រាត្រ យប់​ថ្ងៃទី​២០ ឈានចូល​ថ្ងៃទី​២១ ខែឧសភា​នេះ សម្តេច​តេ​ជោ ហ៊ុន សែន បាន​អញ្ជើញ​ចាក​ចេញពី​ភ្នំពេញ ឆ្ពោះទៅកាន់​ប្រទេស​ស្វី​ស​ហើយ​។ នៅពេល​ទៅដល់​ប្រទេស ស្វី​ស សម្តេច ជួប​ជាមួយ​ប្រជាពលរដ្ឋ​ខ្មែរ រស់នៅ​អឺរ៉ុប​។​

៨- កម្ពុជា ស្នើ​ឥណ្ឌា ព​ន្លឿ​ន​ដំណើរ​ការចុះ​កិច្ចព្រមព្រៀង ពាណិជ្ជកម្ម​សេរី​ទ្វេភាគី
​ក្នុងឱកាស​ទទួល​ជួបពិភាក្សា​ការងារ ជាមួយ​ឯកឧត្តម ណារិន​ដ្រា ម៉ូ​ឌី (Narendra Modi) នាយករដ្ឋមន្ត្រី​ឥណ្ឌា តាមរយៈ​ប្រព័ន្ធ​វីដេអូ ពី​ភូមិគ្រឹះ​ក្រុង​តាខ្មៅ ខេត្តកណ្តាល កាលពី​ល្ងាច ថ្ងៃទី​១៨ ខែឧសភា សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បានស្នើ​ឱ្យ ឥណ្ឌា ព​ន្លឿ​ន​ការចុះ​កិច្ចព្រមព្រៀង​ពាណិជ្ជកម្ម​សេរី រវាង​ប្រទេស​ទាំងពីរ ឱ្យបាន​ឆាប់ ដើម្បី​ជំរុញ​កំណើន​ពាណិជ្ជកម្ម ដែលជា​ប្រយោជន៍​រួម រវាង​ប្រទេស​ទាំងពីរ​។ ក្នុងជំនួប​កាលពី​ម្សិលមិញ ថ្នាក់ដឹកនាំ​ប្រទេស​ទាំងពីរ កម្ពុជា​-​ឥណ្ឌា ក៏បាន​ពិភាក្សា​បញ្ហា ជាច្រើន​ទៀត ពាក់ព័ន្ធ​នឹង​ទំនាក់ទំនង​ទ្វេភាគី បញ្ហា​សមុទ្រ​ចិន​ខាងត្បូង បញ្ហា​មី​យ៉ាន់​ម៉ា បញ្ហា​រុស្ស៊ី និង​អ៊ុយ​ក្រែ​ន ក៏ដូចជា បញ្ហា​ពាក់ព័ន្ធ​ដទៃ​ផ្សេងទៀត ដែលជា​ប្រយោជន៍ និង​ជា​ក្តី​ព្រួយបារម្ភ​រួម​។​

៩- សម្តេច​តេ​ជោ ហ៊ុន សែន ជំរុញ​បណ្តា​ប្រទេស​អាស៊ាន និង BRICS ស្តារឡើងវិញ នូវ​ពហុភាគី​និយម ដើម្បី​រួមគ្នា​ដោះស្រាយ​បញ្ហា​ប្រឈម​នានា ទាំង​ក្នុង​តំបន់ និង​ពិភពលោក
​សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បាន​ជំរុញ​ឱ្យ​បណ្តា​ប្រទេស​អាស៊ាន និង ប្រ៊ី​ក ស្តារឡើងវិញ​នូវ​ពហុភាគី​និយម ដើម្បី​រួមគ្នា​ដោះស្រាយ​បញ្ហា​ប្រឈម​នានា ខណៈដែល​ពិភព លោក កំពុងមាន​បញ្ហា​ប្រែប្រួល និង​ស្មុគស្មាញ​។ សម្តេច​តេ​ជោ​នាយករដ្ឋមន្ត្រី បាន​ថ្លែង​បែប នេះ នៅក្នុង​បទ​អន្តរាគមន៍ «​វេទិកា​លើក​ទី​២ នៃ​គណបក្សនយោបាយ ក្រុម​ស្រាវជ្រាវ និង​អង្គការ​សង្គម​ស៊ីវិល មកពី​បណ្តា​ប្រទេស​ប្រ៊ី​ក (BRICS) ក្រោម​មូលបទ «​សាមគ្គីភាព និង​កិច្ចសហប្រតិបត្តិការ ឆ្ពោះទៅរក​ការអភិវឌ្ឍ​រួម និង​អនាគត​ដ៏​ភ្លឺស្វាង​» ពីថ្ងៃ​ទី​១៩-២០ ខែឧសភា​។​

១០- ព្រះ​រាជពិធី​ច្រត់ព្រះនង្គ័ល នៅ​ឆ្នាំនេះ មិន​ប្រារព្ធ​ពិធី​ជួបជុំ​ទេ
​កាលពី​ថ្ងៃ​៤ រោច ខែ​ពិសាខ ត្រូវ​នឹង​ថ្ងៃទី​១៩ ខែឧសភា ជា​ព្រះរាជ​ពិធីបុណ្យ​ច្រត់ព្រះនង្គ័ល​។ មន្ត្រី​បាន​ពន្យល់ថា ដើម្បី​អាចធ្វើ​ព្រះ​រាជពិធី​ច្រត់ព្រះនង្គ័ល​នេះ គេ​ត្រូវការ​ពេលវេលា​រៀបចំ មុន​ជាច្រើន​ខែ​។ ប៉ុន្តែ​ដោយសារ​ឆ្នាំនេះ កម្ពុជា​មិនទាន់​ប្រាកដប្រជា អំពី​ស្ថានភាព​កូ​វីដ​-១៩ នៅឡើយ ទើប​ឆ្នាំនេះ ព្រះ​រាជពិធី​ច្រត់ព្រះនង្គ័ល​នេះ ពុំ​ត្រូវបាន​ប្រារព្ធ​ពិធី​ជួបជុំ​ទេ​។​

១១-​ទិវា​ជាតិ​នៃ​ការចងចាំ ថ្ងៃ​២០​ឧសភា​៖ សម្តេច​តេ​ជោ ហ៊ុន សែន អំពាវនាវ​ដល់​ពលរ​ដ្ឋ ឱ្យ​ចូលរួម​ថែរក្សា និង​ការពារ​សន្តិភាព​ឱ្យបាន​គង់វង្ស
​ក្នុង​ថ្ងៃ​រម្លឹក​ទិវា​ជាតិ នៃ​ការចងចាំ ថ្ងៃ​២០ ឧសភា​នេះ ប្រមុខ​រាជរដ្ឋាភិបាល​កម្ពុជា សម្តេច​តេ​ជោ ហ៊ុន សែន បាន​ស្នើឱ្យ​ប្រជាពលរដ្ឋ​ទាំងអស់ ចូលរួម​ថែរក្សា​ការពារ​សន្តិភាព ឱ្យបាន​គង់វង្ស ពីព្រោះ​មានតែ​សន្តិភាព​ទេ ដែល​អាច​ផ្តល់ឱកាស គ្រប់យ៉ាង ក្នុង​ការកសាង​សង្គម​គ្រួសារ សហគមន៍ និង​ប្រទេសជាតិ ឱ្យ​កាន់តែ​រីកចម្រើន ទៅមុខទៀត​។​

១២-​អាមេរិក បើក​ការស៊ើបអង្កេត លើ​ករណី​គប់​ស្បែកជើង ដាក់​សម្តេច​តេ​ជោ ហ៊ុន សែន​
​សហរដ្ឋអាមេរិក កំពុងបើក​ការស៊ើបអង្កេត លើ​ករណី​គប់​ស្បែកជើង ពី​សំណាក់​បុរស​អាមេរិកាំង ដើមកំណើត​ខ្មែរ​ម្នាក់ មកលើ​សម្តេច​តេ​ជោ នាយករដ្ឋមន្ត្រី ហ៊ុន សែន នៅ​រដ្ឋធានី វ៉ាស៊ីនតោន សហរដ្ឋអាមេរិក កាលពី​សប្តាហ៍​មុន​។ នេះ​បើតាម​អ្នកនាំពាក្យ ស្ថានទូត​អាមេរិក ប្រចាំ​កម្ពុជា ដែល​ត្រូវបាន​ស្រង់​សម្តី ផ្សាយ​ដោយ​ទីស្តីការគណៈរដ្ឋមន្ត្រី​។​

១៣-​ការឃោសនាបោះឆ្នោត​ជ្រើសរើស ក្រុមប្រឹក្សាឃុំ​សង្កាត់ អាណត្តិ​ទី​៥ ឆ្នាំ​២០២២ ចាប់ផ្តើម​ធ្វើឡើង ពីថ្ងៃ​ទី​២១ ឧសភា រហូតដល់​ថ្ងៃទី ៣​មិថុនា
​យុទ្ធនាការ​ឃោសនាបោះឆ្នោត ឃុំ សង្កាត់ រយៈពេល ១៤​ថ្ងៃ បានចាប់ផ្តើម​ហើយ កាលពី​ថ្ងៃទី​២១ ខែឧសភា​។ កាលពី​ថ្ងៃទី​២០ ឧសភា គ​.​ជ​.​ប បាន​បើក​កិច្ចប្រជុំ ដោយ​ប្រកាសថា គណបក្សនយោបាយ​មួយចំនួន ក្នុងចំណោម ១៧ គណបក្ស ដែល​ចូលរួម ការបោះឆ្នោត​ឃុំ​សង្កាត់ លើក​នេះ ធ្វើ​សកម្មភាព​ឃោសនាបោះឆ្នោត ជ្រើសរើស​ក្រុមប្រឹក្សា ឃុំ សង្កាត់ នៅ​ថ្ងៃទី​២១ ខែឧសភា ដែលជា​ការចាប់ផ្តើម​យុទ្ធនាការ​ឃោសនាបោះឆ្នោត​។ ក្នុង​រយៈពេល​ឃោសនាបោះឆ្នោត​នេះ គ​.​ជ​.​ប​. ក៏បាន​ប្រកាសថា នឹងមាន​ការសម្របសម្រួល ពី​អាជ្ញាធរ​មូលដ្ឋាន ដើម្បី​អាច​រក្សា​នូវ​សន្តិសុខ សណ្តាប់ធ្នាប់ និង​របៀបរៀបរយ​សាធារណៈ​។​

១៤-​កម្ពុជា សម្រេច​ឱ្យ​ចាក់​វ៉ាក់សាំង​បង្ការ ជំងឺ​កូ​វីដ​១៩ ដូ​ស​ទី​៥ ចាប់ពី​ថ្ងៃទី​៩ មិថុនា​
​ក្នុង​សារ​ជា​សំឡេង ជូន​ជនរួមជាតិ មុន​ចាក​ចេញពី​កម្ពុជា ទៅកាន់​ប្រទេស​ស្វី​ស​កាលពី​យប់ ថ្ងៃទី​២០ ខែឧសភា សម្តេច​តេ​ជោ ហ៊ុន សែន បានប្រកាស​ពី​ការសម្រេច​របស់​រាជរ​ដ្ឋា​ភិ​បាល ឱ្យ​ចាក់​វ៉ាក់សាំង បង្ការ​ជំងឺ​កូ​វីដ​១៩ ដូ​ស​ទី​៥ ចាប់ពី​ថ្ងៃទី​៩ ខែមិថុនា ឆ្នាំ​២០២២ តទៅ​។ ការចាក់​វ៉ាក់សាំង ដូ​ស​ទី​៥ នេះ ត្រូវមាន​គម្លាត​យ៉ាងតិច ៣ ខែ​ឡើង រាប់​ពី​ចាក់​វ៉ាក់សាំង ដូ​ស​ទី​៤​។ តាម​សម្តេច​តេ​ជោ អ្នក​ត្រូវ​ចាក់​វ៉ាក់សាំង ដូ​ស​ទី​៥​នេះ ជា​ក្រុម​ជួរមុខ ដែលមាន ប្រមាណ កន្លះ​លាន​នាក់ ជា​មន្ត្រីរាជការ កងកម្លាំងប្រដាប់អាវុធ ភ្នាក់ងារ​អង្គការ​សហ​ប្រជា ជាតិ ស្ថានទូត​បរទេស អង្គការ​ជាតិ​អន្តរជាតិ អ្នកសារព័ត៌មាន និង​សិល្បករ ជាដើម​។​

១៥-​សម្តេច​តេ​ជោ ហ៊ុន សែន អញ្ជើញ​ទៅ​ចូលរួម​កិច្ចប្រជុំ នៃ​វេទិកា​សេដ្ឋកិច្ចពិភពលោក នៅ​ប្រទេស​ស្វី​ស​
​កាលពី​ម៉ោង​ជិត ១ រំលងអធ្រាត្រ នា​ថ្ងៃទី​២០ ឆ្លង​ចូល​ថ្ងៃទី​២១ ខែឧសភា ឆ្នាំ​២០២២ សម្តេច​តេ​ជោ នាយករដ្ឋមន្ត្រី ហ៊ុន សែន បាន​ដឹកនាំ​គណៈប្រតិភូ​ជាន់ខ្ពស់​អញ្ជើញ​ចាកចេញ ពី​ភ្នំពេញ ឆ្ពោះទៅ​ចូលរួម​កិច្ចប្រជុំ ប្រចាំឆ្នាំ​២០២២ នៃ​វេទិកា​សេដ្ឋកិច្ចពិភពលោក នៅ​ប្រទេស​ស្វី​ស​។ វេទិកា​សេដ្ឋកិច្ចពិភពលោក​នេះ ចាប់ពី​ថ្ងៃទី​២២ ដល់​ថ្ងៃទី​២៦ ខែឧសភា​។ ពេល​អញ្ជើញ​ដល់​ប្រទេស​ស្វី​ស នៅ​ល្ងាច​ថ្ងៃទី​២១ ខែឧសភា សម្តេច​តេ​ជោ នាយករដ្ឋមន្ត្រី ហ៊ុន សែន បាន​ជួប​បងប្អូន​ខ្មែរ ដែល​រស់នៅ​អឺរ៉ុប ហើយ​កម្មវិធី​ជួបជុំ​នេះ ធ្វើឡើង នៅ​សូ​រិ​ក ប្រទេស​ស្វី​ស​។

១៦-​រាជរដ្ឋាភិបាល សម្រេច​ឱ្យ​ផ្អាក​លក់ដូរ និង​ពិសា​គ្រឿង​ស្រវឹង ២​ថ្ងៃ អំឡុងពេល​បោះឆ្នោត ជ្រើសរើស​ក្រុមប្រឹក្សា ឃុំ​-​សង្កាត់ ថ្ងៃ​៥ មិថុនា​

​ដើម្បីឱ្យ​ដំណើរការ​បោះឆ្នោត​ជ្រើសរើស ក្រុមប្រឹក្សាឃុំ សង្កាត់ អាណត្តិ​ទី​៥ ឆ្នាំ​២០២២ ដែល​កម្ពុជា បានកំណត់​រៀបចំ​ធ្វើ នៅ​ថ្ងៃទី​៥ ខែមិថុនា ឆ្នាំ​២០២២ ប្រព្រឹត្ត​ទៅដោយ​សេរី ត្រឹមត្រូវ និង​យុត្តិធម៌ គ្មាន​អំពើហិង្សា គ្មាន​ការគំរាមកំហែង គ្មាន​ការបំភិតបំភ័យ និង​គ្មាន​បាតុភាព​នានា ដែល​អាច​កើតមានឡើង ដោយសារតែ​ការ​ពិសា​គ្រឿង​ស្រវឹង​នោះ កាលពី​ថ្ងៃទី​២០ ខែឧសភា ឆ្នាំ​២០២២ រាជរដ្ឋាភិបាល បាន​ណែនាំ​ឱ្យ​ផ្អាក​លក់ និង​ពិសា គ្រឿង​ស្រវឹង មួយថ្ងៃ​មុន​ថ្ងៃ​បោះឆ្នោត និង​នៅ​បោះឆ្នោត គឺ​ថ្ងៃទី​៤ និង​ថ្ងៃទី​៥​មិថុនា ឆ្នាំ​២០២២​។​

១៧-​យុទ្ធនាការ​ឃោសនាបោះឆ្នោត​ជ្រើសរើស ក្រុមប្រឹក្សា ឃុំ​សង្កាត់ នៅ​ថ្ងៃទី​១ ប្រព្រឹត្តិ​ទៅ តាម​ការគ្រោងទុក ដោយ​មិនមាន​បញ្ហា​អ្វី​ទេ​
​ដូច​ការគ្រោងទុក នៅ​ថ្ងៃ​បើក​យុទ្ធនាការ​ឃោសនាបោះឆ្នោត ជ្រើសរើស​ក្រុមប្រឹក្សាឃុំ សង្កាត់ នា​ថ្ងៃទី​២១ ខែឧសភា គឺ​គណបក្សនយោបាយ​ជាច្រើន បាន​ជួបជុំ​ហែ​ក្បួន​ឃោសនាបោះឆ្នោត ទ្រង់ទ្រាយ​ធំ​។ ក្នុងនោះ នៅ​រាជធានី​ភ្នំពេញ និង​តាម​បណ្ដា​ខេត្ត ស្រុក ក្រុង ខណ្ឌ និង​ឃុំ សង្កាត់ នៅ​ទូទាំងប្រទេស គណបក្ស​ប្រជាជន​កម្ពុជា បាន​ជួបជុំ ហែ​ក្បួន​ឃោសនា ទ្រង់ទ្រាយ​ធំ នៅតាម​រាជធានី​ភ្នំពេញ និង​បណ្តា​ខេត្ត ស្រុក ក្រុង ខណ្ឌ និង​ឃុំ សង្កាត់​។ ក្រៅពី​គណបក្សកាន់អំណាច ក៏មាន​គណបក្សនយោបាយ​ផ្សេងទៀត ក៏បាន​ជួបជុំ​ហែ​ក្បួន ឃោសនាបោះឆ្នោត នៅ​ថ្ងៃ​ចាប់ផ្តើម​យុទ្ធនាការ​ឃោសនាបោះឆ្នោត រយៈពេល ១៤ ថ្ងៃ កាលពី​ថ្ងៃទី​២១ ខែឧសភា ផងដែរ​។ ស្ថានការណ៍​ជាទូទៅ នៅ​ថ្ងៃទី​១ នៃ​ដំណើរ​ការឃោសនា បោះឆ្នោត នៅ​ទូទាំងប្រទេស ត្រូវបាន​គេ​មើលឃើញថា មិនមាន​បញ្ហា​អ្វី​កើតឡើង គួរឱ្យ​កក​ត់ សម្គាល់​នោះទេ ទោះបីជា​អ្នកចូលរួម ហែ​ក្បួន​ឃោសនាបោះឆ្នោត ដែល​បានធ្វើ​ដំណើរ តាម​ម៉ូតូ​ភាគច្រើន មិនបាន​ពាក់មួក​សុវត្ថិភាព​ក៏ដោយ​៕/V​