ដោយ​: បាយ័ន / សៀមរាប​: នៅ​ថ្ងៃទី​២១ ខែឧសភា ឆ្នាំ​២០២២​នេះ ក្រុង​សៀមរាប ក៏ដូចជា​តាម​បណ្តា​ស្រុក​ទាំង​១១ បាន​បើក​យុទ្ធនាការ​ឃោសនាបោះឆ្នោត ជ្រើសរើស​ក្រុមប្រឹក្សាឃុំ សង្កាត់​អាណត្តិ​ទី​៥ ដើម្បី​ធ្វើការ​ផ្សព្វផ្សាយ​ទៅតាម​រថយន្ត ម៉ូតូ និង​ម៉ូតូ​រឺ​ម៉ក់ អំពី​គោលការណ៍​របស់​គណបក្ស​ប្រជាជន​កម្ពុជា នៅក្នុង​សៀមរាប ខេត្តសៀមរាប​។​

​នាឱកាស​បើក​យុទ្ធនាការ​ឃោសនាបោះឆ្នោត​ជ្រើសរើស​ក្រុមប្រឹក្សាឃុំ​សង្កាត់ អាណត្តិ​ទី​៥​នេះ របស់​គណបក្ស​ប្រជាជន​កម្ពុជា ក្រុង​សៀមរាប ឆ្នាំ​២០២២​នេះ បាន​ប្រព្រឹត្តទៅ​ក្រោម​វត្តមាន​របស់ លោក ឥត សារ៉ាត់ សមាជិក​គណៈកម្មាធិកា​រ​កណ្តាល និង​ជា​ប្រធាន​ក្រុមការងារ​ថ្នាក់កណ្តាល ចុះ​មូលដ្ឋាន​ក្រុង​សៀមរាប និង​លោក ទៀ សីហា សមាជិក​គណៈកម្មាធិកា​រ​កណ្តាល និង ជា​ប្រធាន​គណៈកម្មាធិការ​នៃ​គណបក្ស​ប្រជាជន​ខេត្ត និង​ជា​អនុប្រធាន​ក្រុមការងារ​គណបក្ស​ខេត្ត​ចុះ​មូលដ្ឋាន​ក្រុង​សៀមរាប រួមទាំង​សមាជិក​សមាជិកា​ក្រុមការងារ​ថ្នាក់កណ្តាល ខេត្ត ក្រុង សង្កាត់ រួមទាំង​សមាជិក​សមាជិការ​គណ​បក្ស​ទាំង​១២ សង្កាត់ របស់​ក្រុង​សៀមរាប​។​

​ក្រោយពី​ធ្វើការ​សំណេះសំណាល​ជាមួយ​សមាជិក​សមាជិកា​រួចមក យើង​ក៏បាន​សង្កេតឃើញថា ក្បួន​នៃ​ផែន​នីមួយៗ បានធ្វើការ​ដង្ហែ​នៅតាម​ដង​វិថី​នានា ដោយ​ឆ្ពោះទៅកាន់​ទីស្នាក់ការ​បក្ស​សង្កា​ត់រៀងៗ​ខ្លួន ដែល​ប្រកបទៅដោយ​ភាពសប្បាយ​រីករាយ ប្រកបដោយ​សុវត្ថិភាព​។ តែបើ​យើង​ក្រឡង​ទៅតាម​បណ្តា​ឃុំ ស្រុក ក្នុង​ខេត្តសៀមរាប ក៏មាន​ធ្វើ​សកម្មភាព​ដូច​នៅ​ក្រុង​សៀមរាប​ផងដែរ តែមាន​ទ្រង់ទ្រាយ​តូច ដោយ​ធ្វើការ​ផ្សព្វផ្សាយ​ទៅតាម​រថយន្ត និង ម៉ូតូ​រឺ​ម៉ក់​តែប៉ុណ្ណោះ ចូលទៅ​តាម​ភូមិ ឃុំ​របស់ខ្លួន​។​

​ដោយឡែក​ចំពោះ​ការងារ​សន្តិសុខ​ក្នុង​ខេត្ត ត្រូវបាន​គណៈបញ្ជាការ​ឯកភាព​រដ្ឋបាលខេត្ត​សៀមរាប បាន​យកចិត្តទុកដាក់​ខ្ពស់ ក្នុង​ការធានា​សន្តិសុខ សណ្តាប់ធ្នាប់ សុវត្ថិភាព ជូន​ដល់​គ្រប់​គណបក្សនយោបាយ​ទាំងអស់ ដែល​បាន​កំពុង​ធ្វើ​កម្ម​ភាព​ឃោសនា​របស់ខ្លួន នៅ​គ្រប់​មូលដ្ឋាន​ក្រុង ស្រុក ឃុំ​សង្កាត់ ដើម្បី​ធ្វើការ បញ្ជៀ​ស​កុំ​ឲ្យ​កើតមាន​នូវ​អំពើហិង្សា​នៅក្នុងពេល​ឃោសនា ក៏​ដូច​ពេល​បោះឆ្នោត និង ក្រោយ​ការបោះឆ្នោត​ផងដែរ​៕​