ដោយ​៖ សុវណ្ណ​កុម្ភៈ / ភ្នំពេញ​៖ គិត​ត្រឹម​ថ្ងៃទី​២១​ឧសភា​ម្សិល​ម៉ិ​ញ​នេះ កម្ពុជា​រកបាន​មេដាយ​ចំនួន​៧​គ្រឿង​បន្ថែមទៀត គឺ​មាស​១​គ្រឿង ប្រាក់​១​គ្រឿង និង​សំរិទ្ធ​៥​គ្រឿង ពេលនេះ​មេដាយ​របស់​កម្ពុជា​កើន​ដល់​៥៧​គ្រឿង​ហើយ​។​

​ការ​ឈ្នះ​មេដាយ​បន្ថែម​នៅថ្ងៃនេះ​ដំបូង​គេ​គឺ​លើ​ប្រភេទ​កីឡា​កាយសម្ព័ន្ធ​ដោយ​កីឡាករ ហាស់ សុខ​ហ៊​, ត្រ​ន ប៊ុនធឿន និង​កីឡាការិនី ម៉ូ ស្រី​ពៅ ទទួលបាន​មេដាយប្រាក់ លើ​វិញ្ញាសា Mixed Trio ដោយ​រកបាន ១៩.៣០០​ពិន្ទុ លើ​ក្រុម​លេខ​៣ ថៃ ដែល​រកបាន ១៧.៥៨៨​ពិន្ទុ និង​ក្រុម​លេខ​៤ ហ្វីលីពីន រកបាន ១៦.៥៣៣​ពិន្ទុ ខណៈ​ម្ចាស់ផ្ទះ​វៀតណាម ឈ្នះ​មេដាយមាស ជាមួយ​ពិន្ទុសរុប ២០.៤៧៨​។ ដោយឡែក​កីឡាករ ជឿន ចាន់​បុរី ទទួលបាន​មេដាយ​សំរឹទ្ធ លើ​វិញ្ញាសា Aerobic Gymnastics ឯកត្តជន ក្រោយ​រកបាន ១៨.៤៥០​ពិន្ទុ តាម​ពីក្រោយ​ម្ចាស់​មេដាយមាស ថៃ រកបាន ១៩.៦០០​ពិន្ទុ​, ម្ចាស់ផ្ទះ​វៀតណាម មេដាយប្រាក់ រកបាន ១៨.៨០០​ពិន្ទុ និង​លេខ​៤ ហ្វីលីពីន ១៧.៤០០​ពិន្ទុ​។​

​ប្រភេទ​កីឡា​វ៉ូ​វី​ណា​ម រក​មេដាយ​បាន ៣​គ្រឿង​បន្ថែម ដោយ​កីឡាករ ជិន ពិសិដ្ឋ និង​កីឡាករ ម៉េ​ត សុភ​ត្ត្រា ឈ្នះ​មេដាយមាស ក្នុង​វិញ្ញាសា​សម្ដែង​ជា​ក្រុម ការពារ​ខ្លួន​កាំបិត​ធំ​បុរស ២​នាក់ (Pair Machetes form) ដោយ​រកបាន ២៦៩​ពិន្ទុ ឈ្នះ​ដាច់​ម្ចាស់ផ្ទះ​វៀតណាម ដែល​រកបាន​ត្រឹម ២៦៤​ពិន្ទុ​។ ដោយឡែក​កីឡាករ ទិន ឌិន ទទួលបាន​មេដាយសំរិទ្ធ ក្រោយ​ចាញ់​កីឡាករ​វៀតណាម ក្នុង​វគ្គ​ពាក់កណ្ដាល​ផ្ដាច់ព្រ័ត្រ​លើ​វិញ្ញាសា​ប្រយុទ្ធ​បុរស​៥៥​គីឡូក្រាម​។ គ្រា​ដែល​មេដាយ​សំរឹទ្ធ​មួយទៀត​រកបាន​ដោយ​កីឡាករ សៀន ចាន់​ហួត លើ​វិញ្ញាសា​មេគុណ​ដំបង ឯកត្តជន​បុរស ដោយ​ទទួលបាន​ពិន្ទុ ២៥៩ ក្រោម​ម្ចាស់​មេដាយប្រាក់ មី​យ៉ាន់​ម៉ា (២៦៤) និង​ម្ចាស់​មេដាយមាស ឡាវ (២៦៨)​។​

​ប្រភេទ​កីឡាបាល់ទះ ក៏​ដណ្ដើមបាន​មេដាយ​សំរឹទ្ធ​ដូចគ្នា ក្រោយ​ប្រកួត​ឈ្នះ​ថៃ ក្នុង​លទ្ធផល​៣​សិត​ទល់​២​នៅ​វគ្គ​ដណ្ដើម​មេដាយ​សំរឹទ្ធ​។ នេះ​ក៏​ជាការ​ឈ្នះ​លើកដំបូង​ក្នុង​ប្រវត្តិសាស្ត្រ សម្រាប់​ជម្រើសជាតិ​បាល់ទះ​កម្ពុជា នៅ​ស៊ី​ហ្គេម​ផងដែរ​ចាប់តាំងពី​ចូលរួម​នៅ​ឆ្នាំ​១៩៧៧ មក​។

​កីឡាប្រដាល់​គុន​ខ្មែរ រកបាន​មេដាយ​សំរឹទ្ធ​១ ដោយ​កីឡាការិនី ទួន ស្រី​ពី​ន ក្រោយ​ប្រកួត​ចាញ់​កីឡាការិនី​ថៃ Sirisopa Sirisak នៅ​វគ្គ​ពាក់កណ្ដាល​ផ្ដាច់ព្រ័ត្រ លើ​ប្រភេទ​ទំងន់ ៦០​គីឡូក្រាម​។​

​គិត​ត្រឹម​ថ្ងៃទី​២១ ខែឧសភា​នេះ កម្ពុជា ឈ្នះ​មេដាយ​សរុប ៥៧​គ្រឿង ក្នុងនោះ​មាស ៨​គ្រឿងប្រាក់​១០​គ្រឿង​និង​សំរឹទ្ធ​៣៩​គ្រឿង​(​មេដាយ​សំរឹទ្ធ​១០​គ្រឿង​ពុំទាន់​ធ្វើ​ពិធី​បំពាក់​ជា​ផ្លូវការ​នៅឡើយ​រួមមាន ប្រដាល់​គុន​ខ្មែរ ៦​គ្រឿង​, ប្រដាល់សកល ៣​គ្រឿង និង​បាល់ទះ ១​គ្រឿង​)​។ ការរក​មេដាយ​សរុប​បាន​ដល់ ៥៧​គ្រឿង គឺ​បាន​បំបែក​កំណត់ត្រា​មេដាយ​សរុប ដែល​កម្ពុជា​ធ្លាប់​ឈ្នះ​ច្រើន​បំផុត គឺ​កាលពី​ស៊ី​ហ្គេម (Southeast Asian Peninsular Games) លើក​ទី​៦ នៅ​ប្រទេស​ម៉ាឡេស៊ី ឆ្នាំ​១៩៧១​។​

​ពេលនោះ​កម្ពុជា ឈ្នះ​មេដាយ​សរុប ៥៣​គ្រឿង ក្នុងនោះ​មាស ១៧​គ្រឿង ប្រាក់ ១៨​គ្រឿង និង​សំរឹទ្ធ ១៨​គ្រឿង និយាយ​ជារួម​។ បើ​និយាយ​ដោយឡែក ចាប់តាំងពី​កម្ពុជា​ត្រឡប់មក​ចូលរួម​ស៊ី​ហ្គេម​វិញ នៅ​ឆ្នាំ​១៩៨៧ ក្រោយ​បញ្ចប់សង្គ្រាម​ផ្ទៃក្នុង នេះ​ក៏​ជា​កំណត់ត្រា​ថ្មី​ដែល​បាន​បំបែក​កាលពី​ឆ្នាំ​២០១៣ ផងដែរ ដែល​ពេលនោះ កម្ពុជា​ឈ្នះ​មេដាយ​សរុប​រហូតដល់ ៤៧​គ្រឿង ដោយបាន​ឈ្នះ​មាស ៨​គ្រឿង ប្រាក់ ១១​គ្រឿង និង​សំរឹទ្ធ ២៨​គ្រឿង​។​
​សរុប​ប្រភេទ​កីឡា និង​មេដាយ ដែល​កម្ពុជា​ទទួលបាន​នៅ​ព្រឹត្តិការណ៍​កីឡា​ស៊ី​ហ្គេម លើក​ទី​៣១ ឆ្នាំ​២០២២ ដែល​នៅសល់ ២​ថ្ងៃ​ទៀត​ទើប​បញ្ចប់​ជា​ផ្លូវការ​នោះ រួមមាន​៖
• មេដាយមាស ៨​គ្រឿង​៖ មាន​លើ​ប្រភេទ​កីឡា​វ៉ូ​វី​ណា​ម ៣​គ្រឿង​, កីឡា​ប៊ូល និង​ប៉េតង់ ២​គ្រឿង​, កីឡា​ឃី​ក​បុក​ស៊ី​ង ១​គ្រឿង​, កីឡា​តេ​ក្វាន់​ដូ WT ១​គ្រឿង និង​កីឡា​ចំបាប់ ១​គ្រឿង​។​
• មេដាយប្រាក់ ១០​គ្រឿង​៖ លើ​ប្រភេទ​កីឡា​ឃី​ក​បុក​ស៊ី​ង ៣​គ្រឿង​, កីឡា​ប៊ូល និង​ប៉េតង់ ២​គ្រឿង​, កីឡា​វ៉ូ​វី​ណា​ម ២​គ្រឿង​, កីឡា​តេ​ក្វាន់​ដូ WT ១​គ្រឿង​, កីឡា​ចំបាប់ ១​គ្រឿង និង​កីឡា​កាយសម្ព័ន្ធ ១​គ្រឿង​។​
• មេដាយ​សំរឹទ្ធ ៣៩​គ្រឿង​៖ មាន​នៅលើ​កីឡា​វ៉ូ​វី​ណា​ម ៨​គ្រឿង​, កីឡាប្រដាល់​គុន​ខ្មែរ ៦​គ្រឿង​, កីឡា​ចំបាប់ ៤​គ្រឿង​, កីឡា​វូ​ស៊ូ ៣​គ្រឿង​, កីឡា​តេ​ក្វាន់​ដូ WT ៣​គ្រឿង​, កីឡា​កា​រ៉ា​តេ ៣​គ្រឿង​, កីឡា​ប្រដាល់សកល ៣​គ្រឿង​, កីឡា​ប៊ូល និង​ប៉េតង់ ៣​គ្រឿង​, កីឡា​ឃី​ក​បុក​ស៊ី​ង ១​គ្រឿង​, កីឡា​ទូក​កា​នូ​/​រ៉ូ​អ៊ីង ១​គ្រឿង​, កីឡា​ជឺ​ជី​តស៊ូ ១​គ្រឿង​, កីឡា​យូ​ដូ ១​គ្រឿង​, កីឡា​កាយសម្ព័ន្ធ ១​គ្រឿង និង​កីឡាបាល់ទះ ១​គ្រឿង​។​
​កម្ពុជា​នៅសល់​ឱកាស​បន្ថែម​មេដាយ​ទៀត​ក្នុង​ការរក​មេដាយ​នៅ​ថ្ងៃទី​២២​ឧសភា​នេះ​លើ​ប្រភេទ​កីឡា​មាន​សក្ដានុពល ដូចជា​កាយសម្ព័ន្ធ​, កីឡាប្រដាល់​គុន​ខ្មែរ (​មាន​មេដាយប្រាក់​១ ក្នុង​ដៃ​), កីឡា​ប្រដាល់សកល (​មាន​មេដាយប្រាក់​១ ក្នុង​ដៃ​), កី​ឡាអេ​ឡិច​ត្រូ​និ​ច​, កីឡា​វ៉ូ​វី​ណា​ម និង​មេដាយ​សំរឹទ្ធ​លើ​កីឡាហែលទឹក​ជើង​ទា ដែល​ទើបតែ​ទទួលបាន​៕​