ប្រធាន​សមាគម​ម៉ូតូ​ទឹក​ម៉ាឡេស៊ី សរសើរ​កម្ពុជា​

​ដោយ​៖ សុវណ្ណ​កុម្ភៈ / ភ្នំពេញ​៖ លោក Datuk Saffian Omar ដែលជា​ប្រធាន សមាគម​ម៉ូតូ​ទឹក​ម៉ាឡេស៊ី បាន​កោតសរសើរ​កម្ពុ​ជា ដែល​រៀបចំ​ធ្វើជា​ម្ចាស់ផ្ទះ នៃ​ការប្រកួត​កីឡា​ម៉ូតូ​ទឹក ជើងឯក​អាស៊ីអាគ្នេយ៍ ឆ្នាំ​២០២២ នៅ​ខេត្ត​ព្រះសីហនុ បានល្អ ។​

​ជាមួយនឹង​ការកោតសរសើរ​នេះ លោក​បាន​សន្យា​ជំរុញ​ភ្ញៀវទេសចរ​ម៉ាឡេស៊ី ឲ្យ​មក​ទស្សនា កម្ពុជា នា​ឆ្នាំ​២០២៣ ដែល​កម្ពុជា​ធ្វើជា​ម្ចាស់ផ្ទះ​ស៊ី​ហ្គេម ។​

​សូមបញ្ជាក់ថា លោក Datuk Saffian Omar ថ្លែង​បែបនេះ បន្ទាប់ពី​កីឡាករ​ម៉ូតូ​ទឹក ម៉ាឡេស៊ី ដណ្ដើមបាន​ចំណាត់ថ្នាក់​លេខ​១ លើ​វិញ្ញាសា Ranabout Endurance Open នៅ​ជុំ​ទី​១ កម្ពុជា បាន​ចំណាត់ថ្នាក់​លេខ​២ និង ថៃ​បាន​លេខ​៣ ។​

​ប្រធាន​សមាគម​ម៉ូតូ​ទឹក​រូបនេះ បាន​បន្តថាៈ កម្ពុជា​រៀបចំ​បានល្អ ទោះបី​អាកាសធាតុ បង្ក​ការរំខាន​ផ្នែក​បច្ចេកទេស​ខ្លះៗ​ក៏ដោយ ក៏​គណៈកម្មការ​កម្ពុជា ធ្វើ​ឲ្យ​ការប្រកួត​នេះ ប្រព្រឹត្តិ​ទៅ​យ៉ាង​រលូន ។​

​លោក​បាន​បន្តថាៈ ខេត្ត​ព្រះសីហនុ​របស់​កម្ពុជា គឺជា​តំបន់​ទេ​ចរណ៍​ដ៏​ទាក់ទាញ ដែល​អាច​រៀបចំ ការប្រកួត​កម្រិត​អន្តរជាតិ និង​ពិភពលោក​បាន មិន​ចាញ់​ទីក្រុង​ប៉ា​តា​យ៉ា ប្រទេស​ថៃ​នោះទេ ។​

​សូមបញ្ជាក់ថា ព្រឹ​ត្ត​ការណ៍​ប្រកួត​កីឡា​ម៉ូតូ​ទឹក ជើងឯក​អាស៊ីអាគ្នេយ៍ ឆ្នាំ​២០២២ នៅ​ខេត្ត​ព្រះសីហនុ ម៉ាឡេស៊ី បាន​បញ្ជូន​អត្ត​ព​លិ​ក ចូលរួម​ចំនួន ៣ នាក់ ប៉ុន្តែ​ដោយសារ បញ្ហា​សុខភាព និង​បច្ចេកទេស កីឡាករ​ម៉ា​ឡ​ស៊ី មក​បានតែ​ម្នាក់​ប៉ុណ្ណោះ​៕/V​