ប្រែ​សម្រួលៈ​បំណង​(​ដេល្លី​ម៉េល​)៖ អ្នក​ក្រុង​បាងកក​នៅ​ថ្ងៃអាទិត្យ​នេះ​បាន​នាំគ្នា​ចេញ​ទៅ​បោះឆ្នោត​ជ្រើសរើស​អភិបាលក្រុង​លើកដំបូង​របស់​គេ​នៅ​រយៈពេល​ជិត​មួយ​ទសវត្សរ៍​មក​នេះ ដោយ​ការបោះឆ្នោត​​នេះ​ក៏​ត្រូវបាន​គេ​មើលឃើញ​ថា​ជា​ស​ន្ទ​ស្សន៍​បង្ហាញ​និន្នាការ​គាំទ្រ​ក្រុមបក្ខ​ណាមួយ​ផងដែរ​សំរាប់​ការបោះឆ្នោត​សកល​ដែល​នៅ​សល់​ពេល​មួយ​ឆ្នាំ​ទៀត​។​

​មនុស្ស​ប្រមាណ​បួន​លាន​នាក់​មាន​សិទ្ធិ​ចូលរួម​បោះឆ្នោត​ដ៏​ធំ​នេះ​ជា​លើកដំបូង​ចាប់តាំងពី​ពេល​មាន​បាតុកម្ម​តាម​ដងផ្លូវ​បស់​ពួក​យុវជន​ថៃ​នៅ​ឆ្នាំ​២០២០ ទាមទារ​អោយ​ផ្លាស់ប្តូរ​នយោបាយ​និង​កែ​ទំរង់​​របប​រាជានិយម​ដែល​មិន​អាច​ប៉ះពាល់​បាន​។​តែ​ជីវិត​រស់នៅ​ប្រចាំ​ថ្ងៃ​ទំនងជា​ដើរតួ​សំខាន់​ជាង​នយោបាយ ដោយ​បេក្ខជន​នាំមុខ​សំខាន់ៗ​បាន​សន្យា​ដោះស្រាយ​បញ្ហា​កកស្ទះ​ក្នុង​ក្រុង ការបំពុល​បរិស្ថាន​​និង​សម្លេង​អ៊ូរ​អែ​រំខាន​ក្នុង​ទីក្រុង​ដែល​មាន​មនុស្ស​១០​លាន​នាក់​នេះ​។​

​បេក្ខជន​ឯករាជ្យ​លោក​ឆាត់​ឆាត ស៊ីត​ទី​ពុន​(​ឆ្វេង​)​បោះឆ្នោត​នៅ​បាងកក​ក្រោយ​ទៅដល់​ស្ថានីយបោះឆ្នោត​មួយ​

​មណ្ឌល​បោះឆ្នោត​បាន​ចាប់ផ្តើម​បើក​នៅ​ម៉ោង​៨​ព្រឹក​និង​បិទ​នៅ​ម៉ោង​៥​ល្ងាច ដោយ​អ្នកបោះឆ្នោត​ត្រូវ​បាន​ពិនិត្យ​កំដៅ​ខ្លួន​និង​ការ​រឹតបន្តឹង​វិធានការ​ប្រឆាំង​កូវី​ដ​១៩​នៅតាម​មណ្ឌល​នី​មួយៗ​។​

​អ្នកបោះឆ្នោត​អាយុ​២៨​ឆ្នាំ​ម្នាក់​ឈ្មោះ​ណាត បាន​និយាយថា​« ខ្ញុំ​មិន​មាន​ការភ្ញាក់ផ្អើល​ទេ​អំពី​ការបោះឆ្នោត​នេះ​។​វា​ពិបាក​កែប្រែ​ក្រុង​បាងកក​ណាស់ តែ​ខ្ញុំ​បោះឆ្នោត​អោយ​មនុស្ស​ដែល​ខ្ញុំ​គិតថា​អាច​ផ្លាស់​​ប្តូរ​ទីក្រុង​នេះ ទោះ​ជា​បាន​តិច​តួចក្តី​។​ខ្ញុំ​សង្ឃឹមថា​បេក្ខជន​នេះ​នឹង​ធ្វើអោយ​មាន​ការប្រែប្រួល​»​។​

​សូមបញ្ជាក់​ថា មាន​បេក្ខជន​បេ​ក្ខ​នារី​ដល់​ទៅ​៣០​នាក់​កំពុង​ឈរឈ្មោះ​បោះឆ្នោត​។​

​ដំបូង​គេ​កាលពី​ព្រឹក​ថ្ងៃអាទិត្យ បេក្ខជន​ឯករាជ្យ​នាំមុខ​គេ​លោក​ឆាត់​ឆាត ស៊ីត​ទី​ពុន​(Chadchart Sittipunt)​បាន​ជិះ​ម៉ូតូ​របស់​លោក​ទៅកាន់​ស្ថានីយបោះឆ្នោត​។​អតីតរដ្ឋមន្ត្រី​គមនាគមន៍​រូប​​នេះ​ត្រូវ​បាន​បណ្តេញចេញ​ពី​មុខ​តំណែង​ក្នុង​រដ្ឋប្រហារ​ចុងក្រោយ​។​លោក​បាន​សន្យា​ដោះស្រាយ​បញ្ហា​ចរាចរណ៍​ដ៏​ស្អុយឈ្មោះ​របស់​ក្រុង​បាងកក ព្រមទាំង​សន្យា​កែលម្អ​បរិស្ថាន​ជាច្រើន​និង​ថា​អ្នក​បោះឆ្នោត​​ចង់​បាន​ការផ្លាស់ប្តូរ​មួយ​ចេញ​ពី​ការបែកបាក់​នយោបាយ​ជា​មូលដ្ឋាន​។​

​លោក​ប្រឈម​ការប្រកួតប្រជែង​ពី​លោក អាស​វីន ក្វាន​មួង​(Aswin Kwanmuang)​អតីត​ឧត្តមសេនីយ៍​ប៉ូលិ​សគាំទ្រ​ដោយ​នាយករដ្ឋមន្ត្រី​ប្រា​យុទ្ធ ចាន់​អូ​ចា ដែល​បាន​សន្យា​ដោះស្រាយ​បញ្ហា​ទឹកជំនន់​​ដ៏​រ៉ាំរ៉ៃ​របស់​ទីក្រុង​។​តែ​ប្រវត្តិ​ដឹកនាំ​ក្រុង​មិនល្អ​ក្រោយ​ធ្វើ​ជា​អភិបាលក្រុង​អស់​៦​ឆ្នាំ លោក​រង​ការរិះគន់​បន្ថែម​ក្រោយ​ពី​ផ្នែក​ខ្លះ​នៃ​ក្រុង​បាងកក​រង​ការ​ជន់​លិច​នេះ​សប្តាហ៍​មុន​ក្រោយ​ការ​ធ្លាក់ភ្លៀង​ខ្លាំង​។​

​អ្នកវិភាគ​នយោបាយ ធី​ទី​ណាន ពង់​ស៊ុត​ហ៊ី​រ៉ាក់​(Thitinan Pongsudhirak)​នៅ​សកល​វិទ្យាល័យ​ជូឡា​ឡុងកន បាន​និយាយថា​លទ្ធផល​ឆ្នោត​នេះ​នឹង​បង្ហាញ​គំនិត​ខ្លះ​ថា​តើ​អ្នក​ក្រុង​បាងកក​គាំទ្រ​​បេក្ខជន​រាជានិយម​និង​យោធានិយម​ដែល​កំពុង​ត្រួតត្រា​លើ​នយោបាយ​ថៃ​បច្ចុប្បន្ន​ដែរឬទេ​។​លោក​ថា​«​បាងកក​មិនមែនជា​ប្រទេស​ថៃ​ទេ តែ​ការបោះឆ្នោត​ជ្រើសរើស​អភិបាលក្រុង​នេះ​ជា​សញ្ញា​បង្ហាញ​​និន្នាការ​សំរាប់​ការបោះឆ្នោត​ធំ​មួយ​ដែល​នឹង​ចូលមក​ដល់​នៅពេល​ខាងមុខ​»៕