ដោយ​: សៅ​វ៉ាន់ឌី / ព្រះវិហារ​: បុរស​ម្នាក់​បាន​ស្លាប់ ចំណែក​ត្រាក់ទ័រ​រង​ការខូចខាត​ទាំងស្រុង ខណៈពេល​កំពុងបើក​ភ្ជួរ​ដី ជាន់​គ្រាប់​មីនតោន ផ្ទុះ​ផ្អើល​ប្រជាពលរដ្ឋ​។ ហេតុការណ៍​នេះ បាន​កើតឡើង​កាលពី​វេលា​ម៉ោង​២ និង​៣០​នាទី ថ្ងៃទី​២២ ខែឧសភា ឆ្នាំ​២០២២ ត្រង់ចំណុច​ខាងលិច​ភូមិ​ស្ទឹង​ខៀវ​តេ​ជោ ឃុំ​ស្រអែម ស្រុក​ជាំ​ក្សាន្ត ខេត្តព្រះវិហារ​។​

​លោក លិញ យុ​ត អភិបាលរង​ស្រុក​ជាំ​ក្សាន្ត បាន​ឲ្យ​ដឹងថា នៅ​មុនពេល​កើតហេតុ ជនរងគ្រោះ​បាន​អង្គុយ​បើក​ត្រាក់ទ័រ​ភ្ជួរ​ដី​ស៊ីឈ្នួល​គេ នៅក្នុង​ភូមិសាស្ត្រ​កើតហេតុ​ខាងលើ ខណៈពេល​កំពុង​ភ្ជួរៗ ក៏បាន​ប៉ះចំ​លើ​គ្រាប់​មីនតោន ផ្ទុះ​បណ្តាល​ឲ្យ​ស្លាប់​នៅនឹងកន្លែង​។ ចំណែក​ត្រាក់ទ័រ​បាន​រង​នូវ​ការខូចខាត​ទាំងស្រុង​។​

​ជនរងគ្រោះ​មានឈ្មោះ រី លីន ភេទ​ប្រុស អាយុ​២៩​ឆ្នាំ រស់នៅ​ភូមិ​អន្លង់វែង ឃុំ​កន្ទួត ស្រុក​ជាំ​ក្សាន្ត ខេត្តព្រះវិហារ​។ បច្ចុប្បន្ន​សព​ត្រូវបាន​ឪពុកម្តាយ​យកទៅ​ធ្វើបុណ្យ​នៅផ្ទះ​តាម​ប្រពៃណី​៕​