ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ យោង​តាម​ប៉ូលិស​កាលពី​ថ្ងៃ​ពុធ​ទី​១៨​ឧសភា​បានឱ្យដឹងថា តារា​សម្តែង​ឥណ្ឌា​វ័យ ២១​ឆ្នាំ​ម្នាក់​បាន​ស្លាប់​បន្ទាប់ពី​អ្វីដែល​ក្រុមគ្រួសារ​របស់​នាង​និយាយថា​​ជា​ការវះកាត់​បូម​ខ្លាញ់​ក្បាលពោះ​ខុស​បច្ចេកទេស​។​

​ការ​វះកាត់​យក​ខ្លាញ់​ចេញពី​ក្បាលពោះ​គឺជា​រឿង​ធម្មតា​និង​មាន​តម្លៃថោក​បំផុត​នៅក្នុង​ប្រទេស​ឥណ្ឌា ប៉ុន្តែ​ការវះកាត់​ភាគច្រើន​គឺ​គ្មាន​ច្បាប់​គ្រប់គ្រង​ទេ​នៅក្រៅ​មន្ទីរពេទ្យ​ធំៗ​។​

​នាង ចេ​ថា​ណា រាជ (Chethana Raj) ដែល​សម្តែង​ក្នុង​រឿង​ភាគ​និង​រឿង​ដុំ​ជាច្រើន​នៅក្នុង​ស្រុក​កំណើត​របស់​នាង​នៅ​រដ្ឋកា​ណា​តា​កា (Karnataka) បាន​ស្លាប់​កាលពី​ថ្ងៃ​អង្គារ​ទី​១៧​ឧសភា​។​

​ជីដូន​របស់​នាង​ឈ្មោះ ណា​រ៉ា​យ៉ាណា​ម​ម៉ា (Narayanamma)​បាន​ប្រាប់​សារព័ត៌មាន​ក្នុងស្រុក​ថា តារា​ស្រី​រូបនេះ​បាន​សុំ​ប្រាក់​ចំនួន ១៥ ម៉ឺន​រូពី (១.៩៦២ ដុល្លារ​) សម្រាប់​ការវះកាត់​ប៉ុន្តែ​ក្រុមគ្រួសារ​បាន​​បដិសេធ​។​

​កាសែត Times of India បាន​ដកស្រង់​សម្តី​លោកយាយ​ដោយ​និយាយថា “​យើង​មិន​បាន​លើកទឹកចិត្ត​ឱ្យ​នាង​ធ្វើ​ការវះកាត់​នោះទេ ព្រោះ​នាង​មាន​សុខភាព​ល្អ​និង​មិន​ធាត់​នោះទេ​”​។​

​នាង​រាជ​បាន​ប្រមូល​លុយ​សន្សំ​យកទៅ​គ្លីនិក​មួយ​ក្នុង​ទីក្រុង​បាន​ហ្គាឡ័​រ (Bangalore) ភាគ​ខាងត្បូង​ដោយ​មិន​ប្រាប់​ឪពុក​ម្តាយ​ឱ្យដឹង​ឡើយ​។​ប៉ុន្តែ​នាង​ចាប់ផ្តើម​មាន​បញ្ហា​ហើយ​ត្រូវបាន​ដឹក​ទៅ​មន្ទីរ​​ពេទ្យ ជា​ទី​ដែល​នាង​ត្រូវបាន​ប្រកាស​ស្លាប់​។​

​លោក វី​ណា​យ៉ាក ប៉ា​ទីល (Vinayak Patil) ស្នងការរង​ប៉ូលិស​បាន​ប្រាប់​ទីភ្នាក់ងារ​សារព័ត៌មាន AFP ថា ក្រុមមន្ត្រី​បាន​ចុះបញ្ជី​ករណី​ស្លាប់​មិនមែន​តាម​ធម្មជាតិ​បន្ទាប់​ពី​ឪពុក​របស់​ស្ត្រី​រូប​​នេះ​បាន​ចោទប្រកាន់​គ្លីនិក​ថា​បាន​វះកាត់​បូម​ខ្លាញ់​ខុស​បច្ចេកទេស​។​

​វេបសាយ News Minute បាន​ដកស្រង់​សម្តី​ឪពុក​របស់​នាង​ឈ្មោះ ហ្គោ​វី​នដា រាជ យ៉ាង​ដូច្នេះ “​កូនស្រី​របស់​ខ្ញុំ​បាន​ស្លាប់​ដោយសារតែ​ការធ្វេសប្រហែស​របស់​ម​ន្ទីរ​ពេទ្យ​។​កូនស្រី​របស់​ខ្ញុំ​មាន​សុខ​​ភាពរឹងមាំ​ណាស់​។ នាង​ពិតជា​មាន​សុខភាព​ល្អ​ណាស់​”៕

​នាង ចេ​ថា​ណា រាជ ស្លាប់​កាលពី​ថ្ងៃ​អង្គារ​ទី​១៧​ឧសភា​