ប្រែ​សម្រួល​៖ ប្រធានាធិបតី​អាម៉េរិក​លោកចូ បៃ​ដិន កាលពី​ថ្ងៃ​ចន្ទ​ទី​២៣​ឧសភា​បាន​និយាយថា អាម៉េរិក​នឹងធ្វើ​អន្តរាគមន៍​យោធា បើសិនជា​ចិន​ចូល​ឈ្លានពាន​កោះ​តៃវ៉ាន់ និង​ថា​បន្ទុក​ការពារ​តៃវ៉ាន់​​ឥឡូវ​«​កាន់តែ​ខ្លាំង​ឡើង​»​ក្រោយ​ពី​រុស្ស៊ី​ចូល​ឈ្លានពាន​អ៊ុ​យក្រែន​។​

​វា​ជា​សេចក្តីថ្លែងការណ៍​ច្បាស់​និង​ធ្ងន់​បំផុត​មួយ​របស់​ប្រធានាធិបតី​អាម៉េរិក​ក្នុង​ការគាំទ្រ​កោះ​ប្រជាធិបតេយ្យ​នេះ​នៅក្នុង​រយៈពេល​ប៉ុន្មាន​ទសវត្សរ៍​កន្លងមក​។​

​ក្នុង​សន្និសីទកាសែត​មួយ​នៅ​ក្រុង​តូ​ក្យូ នៅពេល​ត្រូវ​បាន​សួរថា​តើ​លោក​មាន​បំណង​ចូល​ពាក់ព័ន្ធ​ដោយ​យោធា​ដើម្បី​ការពារ​កោះ​តៃវ៉ាន់​ដែរ​ឬទេ​បើសិនជា​ចិន​ចូល​ឈ្លានពាន លោកបៃ​ដិន បាន​និយាយ​​ថា «​បាទ »​។​

​តាម​ទម្លាប់​អាម៉េរិក​ជៀសវាង ប្រកាស​កាស​ធានា​ការពារ​តៃវ៉ាន់​យ៉ាង​ដូច្នេះ ដោយសារតែ​ខ្លួន​មិន​មាន​សន្ធិសញ្ញា​យោធា​រវាង​គ្នា​។​ច្បាប់​ទំនាក់ទំនង​តៃវ៉ាន់​ឆ្នាំ​១៩៧៩(Taiwan Relations Act)​មិន​​តំរូវ​អោយ​អាម៉េរិក​បញ្ជូន​ទ័ព​ចូល​ការពារ​តៃវ៉ាន់​ទេ​បើសិនជា​ចិន​ឈ្លានពាន តែ​វា​បង្កើត​គោលនយោបាយ​អាម៉េរិក​ដើម្បី​ធានា​អោយ​តៃវ៉ាន់​មាន​ប្រភព​ធន​ការពារ​ខ្លួនឯង​និង​រារាំង​ការផ្លាស់ប្តូរ​ស្ថានភាព​​ជាក់ស្តែង​នៅ​តៃវ៉ាន់​ដោយ​ឯ​តោ​ភាគី​ណាមួយ​ពី​សំណាក់​ចិន​ប៉េកាំង​។​

​សម្តី​របស់​បៃ​ដិនពេលនេះ​មុខ​ជាបង្ក​ការឆ្លើយតប​ខ្លាំងក្លា​ពី​ចិន​ដីគោក ដែល​អះអាង​ថា​តៃវ៉ាន់​ជា​ខេត្ត​ផ្តាច់ខ្លួន​មួយ​របស់​ខ្លួន​ដែល​រង់ចាំ​តែ​ពេល​បង្រួបបង្រួម​ជាមួយ​មហា​ចិនដីគោក​វិញ​តែ​ប៉ុណ្ណោះ​។​

​មន្ត្រី​សេត​វិមាន​ម្នាក់​បាន​និយាយថា សម្តី​របស់​លោកបៃ​ដិន មិន​ឆ្លុះបញ្ចាំង​ពី​ការផ្លាស់ប្តូរ​គោលនយោបាយ​ណាមួយ​ទេ​។​

​ថ្លែង​ជាមួយ​នាយក​រដ្ឋមន្ត្រី​ជប៉ុន ហ្វ៊ុយ​មី​អុ គី​ស៊ី​ដា លោកបៃ​ដិនបាន​និយាយថា កិច្ចខិតខំ​ណាមួយ​ដោយ​ចិន​ដើម្បី​ប្រើ​កម្លាំង​ប្រឆាំង​តៃវ៉ាន់​នឹង​«​មិន​ត្រឹមតែ​មិន​ត្រឹមត្រូវ​»​តែ​វា​នាំ​អោយ​បែកបាក់​តំបន់​​ទាំងមូល ហើយ​នឹង​ជា​អ្វី​ដែល​ស្រដៀង​គ្នា​នឹង​អ្វី​កំពុង​កើត​នៅ​អ៊ុ​យក្រែន​។​

​ប្រធានាធិបតី ចូ បៃ​ដិន និយាយ​ក្នុងអំឡុង​សន្និសីទកាសែត​មួយ​ជាមួយ​នាយក​រដ្ឋមន្ត្រី​ជប៉ុន​នៅ​ក្រុង​តូ​ក្យូ​កាលពី​ថ្ងៃ​ចន្ទ​។​បៃ​ដិនបាន​និយាយថា លោក​សង្ឃឹមថា ចិន​នឹង​មិន​ចាប់​យក​តៃវ៉ាន់​ដោយ​ប្រើ​​កម្លាំងយោធា​ទេ​

​សូមបញ្ជាក់​ថា ចិន​បាន​បង្កើន​សកម្មភាព​យោធា​ក្បែរ​កោះ​តៃវ៉ាន់​នៅ​ប៉ុន្មាន​ឆ្នាំ​មក​នេះ​នៅក្នុង​អ្វី​ដែល​រដ្ឋាភិបាល​ក្រុង​ប៉េកាំង​ចាត់ទុកថា​ជា​ការហាត់​បង្កើន​សមត្ថ​ភាព​យោធា​នៅក្នុង​ដែន​អធិបតេយ្យ​​ភាព​របស់​ខ្លួន​តែ​អាជ្ញាធរ​តៃវ៉ាន់​ថា​វា​រំលោភ​ក្នុង​ដែន​ទឹក​និង​អាកាស​របស់ខ្លួន​។​

​លោកបៃ​ដិន​ថែម​ទាំង​និយាយថា «​ពួកគេ​កំពុង​លលេង​ជាមួយនឹង​គ្រោះថ្នាក់ ដោយ​បញ្ជូន​យន្តហោះ​ចូល​កៀកៗ​និង​សមយុទ្ធ​ទាំងអស់​ដែល​ចិន​បាន​ធ្វើ​នៅក្បែរ​តៃវ៉ាន់​»​។​

​ប្រធានាធិបតី​អាម៉េរិក​បាន​បន្ថែមថា​ហេតុផល​មួយ​រារាំង​កុំអោយ​ចិន​វាយប្រហា​រកោះ​តៃវ៉ាន់​នោះ​គឺថា ប្រធានាធិបតី​រុស្ស៊ី វ្ល៉ា​ឌី​មៀ ពូ​ទីន កំពុង​បង់​តំលៃ​ដ៏​ខ្ពស់​ចំពោះ​អំពើ​ព្រៃផ្សៃ​របស់គាត់​នៅ​អ៊ុ​យក្រែន​»​។​

​សូមបញ្ជាក់​ថា ក្រោម​គោលនយោបាយ​«​ចិន​តែមួយ​» អាម៉េរិក​ទទួលស្គាល់​រដ្ឋាភិបាល​ក្រុង​ប៉េកាំង​ជា​រដ្ឋាភិបាល​របស់​ចិន និង​មិន​មាន​ទំនាក់ទំនង​ការទូត​ជាមួយ​កោះ​តៃវ៉ាន់​ទេ​។​ទោះជា​យ៉ាងណា អា​ម៉េ​​រិក​រក្សា​ការទាក់ទងមិ​ន​ផ្លូវការ​រួម​មាន​ស្ថានទូត​តាម​ការជាក់ស្តែង​មួយ​នៅ​ក្រុង​តៃប៉ិះ និង​ផ្គត់ផ្គង់​សព្វាវុធ​ដល់​យោធា​កោះ​នេះ​ជា​ប្រចាំ​៕