​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អ៊ុយ​ក្រែន​បាន​ទាត់ចោល​បទ​ឈប់​បាញ់ឬ​សម្បទាន​ទឹក​ដី​ណា​មួយ​ដល់​រុស្ស៊ី ហើយ​ប្រធានាធិបតី​ប៉ូឡូញ​បាន​និយាយ​ថា​ការបាត់បង់​ទឹកដី​អ៊ុយ​ក្រែនណា​មួយនឹង​​ក្លាយជា “​វាយ​សំពង​ដ៏​ធំ​” ដល់​លោក​ខាងលិច​ទាំងមូល ខណៈ​គាត់​ព្រមាន​កុំឱ្យ​ទោរទន់​តាម​ចិត្ត​របស់​ប្រធានាធិបតី​រុស្ស៊ី វ្ល៉ា​ឌី​មៀ ពូ​ទីន​។​

​ស៊ី​រ៉ែ​ន​ព្រមាន​អំពី​ការវាយប្រហារ​តាម​អាកាស​បាន​បន្លឺឡើង​ពាសពេញ​អ៊ុយ​ក្រែន​កាលពី​ព្រឹក​ថ្ងៃ​ចន្ទ​ទី​២៣​ឧសភា ដោយ​បន្លឺសំឡេង​រោទិ៍​ប្រចាំ​ថ្ងៃមុន​ការវាយប្រហារ​ដែល​រំពឹង​ទុក​ដោយ​កងកម្លាំង​រុស្ស៊ី​នៅ​ភាគ​ខាងកើត​និង​ខាងត្បូង​នៃ​ប្រទេស​។​

​រុស្ស៊ី​បាន​បង្កើន​ការ​វាយលុក​លើ​តំបន់​ដុន​បាស​និង​តំបន់​មី​កូឡាអ៊ីវ (Mykolaiv)​ជាមួយនឹង​ការវាយប្រហារ​តាម​អាកាស​និង​ការ​បាញ់កាំភ្លើង​ធំ នៅក្នុង​អ្វីដែល​អ៊ុយ​ក្រែន​បាន​ពណ៌នា​ថា​ជា​យុទ្ធសាស្ត្រ “​ដុត​ឱ្យ​ឆេះឆួល​ផែនដី​” ដើម្បី​ឈ្នះ​ការគ្រប់គ្រង​សមរភូមិ​ជួរ​មុខ​ភាគ​ខាងកើត​។​

​លោក អេន​ឌ្រី យើ​ម៉ាក់ (Andriy Yermak)​នាយអគ្គសេនាធិកា​ររ​បស់​ប្រធានាធិបតី​អ៊ុ​យក្រែន បាន​និយាយ​នៅក្នុង​សារ​បង្ហោះ​លើ Twitter កាលពី​ថ្ងៃអាទិត្យ​ថា​”​សង្គ្រាម​ត្រូវ​តែ​បញ្ចប់​ជា​មួយ​​ការស្ដារ​ឡើង​វិញ​ពេញលេញ​នៃ​បូរណភាព​ទឹកដី​និង​អធិបតេយ្យភាព​របស់​អ៊ុ​យក្រែន​”​។​

​ប្រធានាធិបតី​ប៉ូឡូញ​លោក អង់​ដ្រេ ឌូ​ដា (Andrzej Duda)​បានផ្តល់​ការគាំទ្រ​របស់​ទីក្រុង​វ៉ា​សូវី ដោយ​ប្រាប់​សមាជិកសភា​ក្នុង​ទីក្រុង​គៀវ​កាលពី​ថ្ងៃអាទិត្យ​ថា​សហគមន៍​អន្តរជាតិ​ត្រូវ​តែ​ទាមទារ​ឱ្យ​​រុស្ស៊ី​ដកចេញ​ទាំងស្រុង ហើយ​ថា​ការលះបង់​ទឹក​ដី​ណា​មួយ​នឹង​ក្លាយជា “​ការ​វាយ​សំពង​ដ៏​ធំ​” សម្រាប់​លោក​ខាងលិច​ទាំងមូល​។​

​លោកឌូ​ដា ជា​មេដឹកនាំ​បរទេស​ដំបូង​គេ​ដែល​ថ្លែង​ទៅ​កាន់​សភា​អ៊ុយ​ក្រែន​ដោយ​ផ្ទាល់ចាប់​តាំងពីកា​រ​ឈ្លានពាន​របស់​រុស្ស៊ី​កាលពី​ថ្ងៃទី ២៤ ខែ​កុម្ភៈ បាន​និយាយថា “​សំឡេង​ព្រួយបារម្ភ​បាន​លេចឡើង​ថា អ៊ុយ​ក្រែន​គួរតែ​ធ្វើ​តាម​ការទាមទារ​របស់​ពូ​ទីន​។ មានតែ​អ៊ុយ​ក្រែន​ទេ​ដែល​មាន​សិទ្ធិ​សម្រេច​អំពី​អនាគត​របស់​ខ្លួន​”​។​

​អ៊ុយ​ក្រែ​ន​និង​ប៉ូឡូញ​បាន​ព្រមព្រៀង​គ្នា​បង្កើត​ការត្រួតពិនិត្យ​គយ​ព្រំដែន​រួមគ្នា​និង​ធ្វើការ​លើ​ក្រុមហ៊ុន​ផ្លូវដែក​រួមគ្នា ដើម្បី​សម្រួល​ដល់​ចលនា​របស់​ប្រជាជន និង​បង្កើន​ការនាំចេញ​របស់​អ៊ុ​យក្រែន​។​

​ជនភៀសខ្លួន​អ៊ុយ​ក្រែន​ភាគច្រើន​បាន​ឆ្លងទៅកាន់​សហភាព​អឺរ៉ុប​តាម​ច្រកព្រំដែន​ក្នុងប្រទេស​ប៉ូឡូញ ស្លូ​វ៉ាគី ហុងគ្រី និង​រូ​ម៉ា​នី​។ ប៉ូឡូញ​បានផ្តល់​សិទ្ធិ​ក្នុង​ការរស់នៅ​និង​ធ្វើការ​និង​ផ្តល់​ប្រាក់​សន្តិសុខ​​សង្គម​ដល់​ប្រជាជន​អ៊ុយ​ក្រែន​ជាង​បី​លាន​នាក់​។​

​អ៊ុ​យក្រែន ដែល​ជា​ប្រទេស​នាំចេញ​ស្រូវ​សាលី​និង​ពោត​ដ៏​សំខាន់​មួយ​របស់​ពិភពលោក មិន​អាច​នាំ​ចេញ​គ្រាប់​ធញ្ញជាតិ​ជិត ២៥ លាន​តោន ដែល​បណ្តាល​ឱ្យ​តម្លៃ​ស្បៀងអាហារ​ពិភពលោក​កើនឡើង​ខ្ពស់​៕

​ប្រធានាធិបតី​ប៉ូឡូញ​លោក អង់​ដ្រេ ឌូ​ដា​ថ្លែង​នៅ​សភា​អ៊ុយ​ក្រែន​កាលពី​ថ្ងៃអាទិត្យ​