ដោយ​៖ រ៉ា​ម៉ន / ភ្នំពេញ​៖ លោក ហួត ហៃ អភិបាលរង និង​ជា​តំណាង​លោក ឃួ​ង ស្រេង អភិបាល​រាជធានី​ភ្នំពេញ បាន​អញ្ជើញ​ជា​អធិបតី ក្នុង​ពិធី​ក្រុង​ពាលី តាមបែប​សាសនា នា​រសៀល ថ្ងៃទី​២៣ ឧសភា ដើម្បី​សុំ​ម្ចាស់​ទឹក​ម្ចាស់​ដី ត្រៀម​បើក​ការដ្ឋាន​សាងសង់​ស្ថានីយ៍ ប្រព្រឹត្ត​កម្ម​កាកសំណល់​ភក់​បង្គន់ របស់​គម្រោង​គ្រប់គ្រង​សំណល់​ភក់​បង្គន់ ក្នុង​រាជធានី​ភ្នំពេញ ក្រោម​ជំនួយ​របស់​សមាគម AIMF ដែល​ពិធីបើកការដ្ឋាន​សាងសង់ ជា​ផ្លូវការ ត្រូវធ្វើឡើង នៅ​ថ្ងៃទី​២៤ ឧសភា ក្រោម​អធិបតីភាព​លោក ឃួ​ង ស្រេង អភិបាល​រាជធានី​ភ្នំពេញ និង​លោក ព្យែ​រ ប៊ៃ​យ៉េ លេខាធិការដ្ឋាន​អចិន្ត្រៃយ៍ នៃ​សមាគម​អន្តរជាតិ​អភិបាលក្រុង ប្រើប្រាស់​ភាសា​បារាំង (AIMF) ។​

​គួរ​បញ្ជាក់ថា ទីតាំង​ស្ថានីយ៍​ប្រព្រឹត្ត​កម្មនេះ សាងសង់​លើ​ផ្ទៃដី ៣ ហិកតា ស្ថិតនៅ​ភូមិ​ភ្លើង ឆេះ​រទេះ​លិច ក្នុង​សង្កាត់​ភ្លើង​ឆេះ​រទេះ ខណ្ឌ​កំបូល នា​ប៉ែង​ខាងត្បូង ឈៀង​ខាងលិច ដែលជា​ការរួមចំណែក កាត់បន្ថយ​ជាតិពុល ធ្វើឱ្យប៉ះពាល់​ដល់​បរិស្ថាន ជុំវិញ និង​ជីវភាព​រស់នៅ​ប្រចាំថ្ងៃ ក៏ដូចជា​សុខមាលភាព​របស់​ប្រជាពលរដ្ឋ ក្នុង​ទីក្រុង​ផងដែរ មុននឹង​បង្ហូរ​ចូលទៅ​បឹង​, ទន្លេ​ធម្មជាតិ​។

​គួរបញ្ជាក់​ផងដែរ​ថា កាលពី​ព្រឹក​ថ្ងៃ​២៣ ឧសភា នេះដែរ រដ្ឋបាល​រាជធានី​ភ្នំពេញ ទើបបាន ចុះហត្ថលេខា ជាមួយ​សមាគម AIMF លើ​ការងារ​ផែនការ ត្រៀម​បំរុង​សំរាប់​ឆ្លើយតប សង្គ្រោះបន្ទាន់ គ្រោះមហន្តរាយ​, យុទ្ធសាស្ត្រ គ្រប់គ្រង​សំណល់​ភក់​បង្គន់ និង​ផែនទី​បង្ហាញផ្លូវ យុទ្ធសាស្ត្រ ស្ដីពី​ទីក្រុង​ឆ្លាត​វៃ និង​មាន​ចីរភាព ផងដែរ​៕/V​