​ដោយៈ ភ្នំ​ខៀវ / បាត់ដំបងៈ អាជ្ញាធរខេត្ត​បាត់ដំបង បាន​អំពាវនាវ​ទៅដល់​អង្គការ​ជា​ដៃគូ និង​សប្បុរសជន​នានា បន្ត​ជួយ​គាំទ្រ​ដល់​មនុស្ស​ចាស់ ដោយសារ​មនុស្ស​ចាស់ កាន់​តែមាន​អត្រា កើនឡើង​ខ្ពស់ និង​បាន​ចូលរួម​យ៉ាងសំខាន់ ដល់​អ្នកជំនាន់ក្រោយ​។​

​ក្នុង​កម្មវិធី​វគ្គ​បណ្តុះបណ្តាល​គ្រូ​បង្គោល ស្តីពី​ដំណើរការ​បង្កើត សមាគម​មនុស្ស​ចាស់ អន្តរ​ជំនាន់ និង​ពហុ​មុខងារ នៅ​ថ្ងៃទី​២៣ ខែឧសភា ឆ្នាំ​២០២២ នេះ លោក ទុំ វី​រ៉ា នាយក​ប្រតិបត្តិ អង្គការ​មនុស្ស​ចាស់​ក​ម្ពុ​ជា បានលើកឡើង​ថាៈ យោងតាម​ស្ថិតិ​ជំរឿន នៅ​ឆ្នាំ​២០១៩ ប្រជាជន​កម្ពុជា ចំនួន ១,៣៨ លាន​នាក់ ស្មើនឹង ៨,៩% នៃ​ប្រជាជន​សរុប ដែលមាន​អាយុ​ចាប់ពី ៦០ ឆ្នាំ​ឡើង ត្រូវបាន​គេ​រំពឹងថា នឹង​កើនឡើង ៣ ដង នៅ​ឆ្នាំ​២០៥០​។​

​លោក ឆាយ ម៉ា​ទីណា​ល់ អភិបាលរង​ខេត្តបាត់ដំបង បាន​ឲ្យ​ដឹងថាៈ កំណើន​នៃ​ប្រជាជន វ័យ​ចំណាស់​នៅ​កម្ពុជា ជា​បញ្ហា​យ៉ាងសំខាន់ ដែល​ត្រូវការ ការយកចិត្តទុកដាក់ ប្រសិនបើ កម្ពុជា​មិនបាន​រៀបចំ និង​ត្រៀម​ការឆ្លើយតប ឲ្យ​បាន​ត្រឹមត្រូវ និង​ទាន់ពេលវេលា​នោះទេ កម្ពុជា ប្រឈម​នឹង​វិបត្តិ នៅក្នុង​សង្គម ដែលមាន​មនុស្ស​វ័យចាស់​ច្រើន និង​ត្រូវ​ទទួលបន្ទុក ដោះស្រាយ​បញ្ហា​ជាច្រើន ដូចជា បញ្ហា​សុខភាព សេដ្ឋកិច្ច សុវត្ថិភាព​សង្គម និង​បញ្ហា​ផ្សេងៗ​ទៀត​។​

​អភិបាលរង​ខេត្ត បាន​អំពាវនាវ​ដល់​បណ្តា​អង្គការ​ដៃគូ​ពាក់ព័ន្ធ​ទាំងអស់ បន្ត​ជួយ​លើកកម្ពស់ កម្មវិធី​គាំពារ​ដល់​មនុស្ស​ចាស់ ឲ្យ​បាន​ច្រើន​ថែមទៀត ពិសេស​កម្មវិធី​សន្សំ​ប្រាក់ បង្កើត​ឲ្យ មាន​ប្រអប់ប្រាក់​សប្បុរសធម៌ ដាក់​នៅតាម​ទីសាធារណៈ វត្ត​អារាម សណ្ឋាគារ​ជាដើម ដើម្បី​ផ្តល់ឱកាស​ទៅដល់​សប្បុរសជន​ទាំងឡាយ បាន​ចូលរួម​ជួយ​ឧ​ប​ត្ត​ម្ភ​គាំទ្រ ឲ្យ​បាន​សកម្ម ថែមទៀត សំដៅ​ជួយ​ទ្រទ្រង់ ដល់​មនុស្ស​ចាស់ លើកកម្ពស់​សេចក្តីថ្លៃថ្នូ​រ ទទួលបាន​ការថែទាំ និង​ព្យាបាល​សុខភាព ដោយ​ឥតគិតថ្លៃ​៕/V​