​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រធាន​បណ្តាញ​ទូរទស្សន៍​ដែល​គាំទ្រ​ដោយ​រដ្ឋ​រុស្ស៊ី RT បាន​និយាយថា “​អ្វីៗ​នឹង​បញ្ចប់​យ៉ាង​អាក្រក់​សម្រាប់​មនុស្សជាតិ​ទាំងអស់​” ប្រសិនបើ​រុស្ស៊ី​មិន​ទទួលបាន​ជ័យ​​ជម្នះ​ផ្នែក​យោធា​ប្រឆាំងនឹង​អ៊ុយ​ក្រែន​ទេនោះ ដោយ​លោកស្រី​បាន​បង្ហើប​តម្រុយ​អំពី​ការវាយប្រហារ​នុយក្លេអ៊ែរ​ប្រសិនបើ​ប្រទេស​នេះ​ចាញ់​សង្គ្រាម​។​

​ប្រព័ន្ធ​ផ្សព្វផ្សាយ​ដែល​គាំទ្រ​ដោយ​រដ្ឋ​រុស្ស៊ី​ភាគ​ច្រើន​ចាប់ផ្តើម​មាន​ឈ្មោះ​ល្បី​ខាង​រឿង​អាក្រក់​សម្រាប់​ការនិយាយ​ប្រឆាំង​អ៊ុយ​ក្រែន​ចាប់តាំងពី​សង្គ្រាម​បាន​ផ្ទុះឡើង​កាលពី​ថ្ងៃទី ២៤ ខែ​កុម្ភៈ​។​ប៉ុន្តែ​ការ​​លេងសម្តី​ចុងក្រោយបង្អស់​គឺ​កើតចេញ​ពី​លោកស្រី ម៉ា​ហ្គារី​តា សាយ​ម៉ុន​យ៉ាន (Margarita Simonyan) របស់​ទូរទស្សន៍ RT ដែល​បាន​សិក្សា​នៅ​សហរដ្ឋ​អាម៉េរិក​ហើយ​បាន​ប្រាប់​ទស្សនិកជន​​រុស្ស៊ី​ថា ពួក​គេ​គួរតែ​រីករាយ​ចំពោះ​ការពិត​ដែលថា កូនៗ​របស់​ពួកគេ​នឹងមិន​ទទួលបាន​ការអប់រំ​ពី​លោកខាងលិច​ទៀត​ទេ​។​

​លោកស្រី​បាន​និយាយ​កាលពី​ថ្ងៃ​ចន្ទ​ថា “​ពួកគេ​ទាំងអស់គ្នា​ជឿ​ថា​យើង​នឹង​ចាញ់ ហើយ​លោក​ខាងលិច​នឹង​ឈ្នះ​។ ពួកគេ​មិន​យល់ថា​វា​ជា​រឿង​មិន​អាច​ទៅ​រួច​នោះ​ទេ​។ វា​ជា​រឿង​មិន​អាច​ទៅរួច​នោះឡើយ វា​នឹង​មិន​កើត​ឡើង​នោះឡើយ​”​។​

​លោកស្រី​បាន​និយាយថា “​ទោះជា​យើង​ឈ្នះ​ឬ​វា​ត្រូវ​បញ្ចប់​យ៉ាង​អាក្រក់​សម្រាប់​មនុស្សជាតិ​ក៏ដោយ ក៏​វា​គ្មាន​វិធី​ផ្សេង​នោះឡើយ​” ដែល​ហាក់​បង្ហើប​ឱ្យ​ដឹង​អំពី​ការ​ធ្វើ​សង្គ្រាម​នុយក្លេអ៊ែរ​ប្រសិនបើ​រុស្ស៊ី​មិន​ឈ្នះ​​នៅក្នុង​ជម្លោះ​នេះ​៕

ប្រធាន​ទូរទស្សន៍ RT លោកស្រី ម៉ា​ហ្គារី​តា សាយ​ម៉ុន​យ៉ាន