​ប្រែ​សម្រួលៈ​បំណង​(​ដេល្លី​ម៉េល​)៖​ប្រធានាធិបតី​ជិត​ចេញពី​តំណែង​របស់​ហ្វីលីពីន លោក​រ៉ូ​ឌ្រី​ហ្គោ ឌុយ​ទែត​( Rodrigo Duterte)​បាន​ធ្វើ​ការរិះគន់​មេដឹកនាំ​រុស្ស៊ី វ្ល៉ា​ឌី​មៀ ពូ​ទីន​ចំពោះ​​ការសម្លាប់​ជន​ស៊ីវិល​ស្លូតត្រង់​នៅ​អ៊ុ​យក្រែន ដោយ​លោក​បាន​និយាយថា នៅពេល​មេដឹកនាំ​ទាំងពីរ​នេះ​ជាប់​ឈ្មោះ​ជា​ឃាតករ «​ខ្ញុំ​សម្លាប់​តែ​ឧក្រិដ្ឋជន ខ្ញុំ​មិន​បាន​សម្លាប់​កូន​ក្មេង​និង​មនុស្ស​ចាស់​ទេ​»​។​

​លោក​ឌុយ​ទែត ដែល​បាន​ហៅ​លោក​ពូ​ទីន​ជា​ចំហ​ថា អាយ​ដល​និង​ជា​មិត្ត​ម្នាក់ បាន​ធ្វើ​ការវាយប្រហារ​រិះគន់​ជា​លើកដំបូង​ចំពោះ​ការឈ្លានពាន​របស់​រុស្ស៊ី​ចូល​អ៊ុ​យក្រែន ។​លោក​បាន​បន្ទោស​សង្គ្រាម​ចំណាស់​​បី​ខែ​មកនេះ​ចំពោះ​ការ​ឡើងថ្លៃ​ប្រេង​លើ​ពិភពលោក ដែល​ប៉ះពាល់​ប្រទេស​ជាច្រើន​រួម​ទាំង​ហ្វីលីពីន​ផងដែរ​។​

​នៅពេល​បញ្ជាក់ថា​លោក​នឹង​មិន​ថ្កោលទោស​ប្រធានាធិបតី​រុស្ស៊ី លោក​ឌុយ​ទែត​សម្តែង​ការ​មិនយ​ល់​ស្រប​ទៅនឹង​ការអះអាង​របស់​លោក​ពូ​ទីន​ថា​ការឈ្លានពាន​នេះ​ជា «​ប្រតិបត្តិការ​យោធា​ពិសេស​»​មួយ​ដើម្បីការពារប្រជាជននិយាយភាសារុស្ស៊ីនៅអ៊ុយក្រែនខាងកើត និង​ថាវា​ពិត​ជា​សង្គ្រាម​ពេញទំហឹង​មួយ​ប្រឆាំង​នឹង​ប្រជាជាតិ​មាន​អធិបតេយ្យភាព​មួយ​។​

​លោក​ឌុយ​ទែតបាន​និយាយទៀតថា «​មនុស្ស​ជាច្រើន​និយាយថា ពូ​ទីន​និង​ខ្ញុំ​ជា​ឃាតករ ។​ខ្ញុំ​បាន​ប្រាប់​ប្រជាជន​ហ្វីលីពីន​យូរ​មក​ហើយ​ថា ខ្ញុំ​ពិតជា​សម្លាប់ តែ​សម្លាប់​តែ​ពួក​ឧក្រិដ្ឋជន មិន​បាន​សម្លាប់​កូន​​ក្មេង​ឬ​មនុស្ស​ចាស់​ទេ​។​យើង​ទាំង​ពីរ​ស្ថិត​ក្នុង​ពិភព​ពីរ​ផ្សេង​គ្នា​»​។​

​ឌុយ​ទែត ដែល​ត្រូវ​ចុះចេញ​ពី​តំណែង​នៅ​ថ្ងៃ​៣០​មិថុនាពេល​បញ្ចប់​អាណត្តិ​ប្រាំ​មួយឆ្នាំ បាន​ដឹកនាំ​យុទ្ធនាការ​ប្រឆាំង​ថ្នាំញៀន​ដ៏​សាហាវ​មួយ ដោយ​មនុស្ស​ជាង​៦.០០០​នាក់​ជា​ជន​ជា​ប់សង្ស័យ​ក្នុង​ឧក្រិដ្ឋ​​កម្ម​ថ្នាំញៀន​ត្រូវបាន​សម្លាប់​។​ក្រុម​សិទ្ធិ​មនុស្ស​បាន​ថ្កោលទោស​និង​ថាកុមារ​និង​មនុស្ស​ចាស់ រួម​ទាំង​ជនស្លូតត្រង់​ក៏​ស្ថិត​ក្នុងចំណោម​អ្នក​ដែល​ត្រូវ​ប៉ូលិស​សម្លាប់​ទាំងនោះ​ដែរ​។​

​យុទ្ធនាការ​បង្ក្រាប​ថ្នាំញៀន​ដ៏​ធំ​នេះ​ក៏​ទាក់ទាញ​ការស៊ើបអង្កេត​ពី​តុលាការ​ឧក្រិដ្ឋកម្ម​អន្តរជាតិ​ICCដើម្បី​ស៊ើប​មើល​ថា​តើ​វា​អាច​ជា​បទឧក្រិដ្ឋ​ប្រឆាំង​នឹង​មនុស្សជាតិ​ដែរឬទេ​។​

​ប្រធានាធិបតី រ៉ូ​ឌ្រី​ហ្គោ ឌុយ​ទែត បញ្ចេញ​ទឹកមុខ​ក្នុងអំឡុង​ជួបប្រជុំ​ជាមួយ​មន្ត្រី​រដ្ឋាភិបាល​កាលពី​ថ្ងៃ​២៣​ឧសភា ពេលដែល​លោក​ឈ្លៀត​ប្រៀបធៀប​រូប​លោក​ទៅ​នឹង​ពូ​ទីន​

​សូមបញ្ជាក់​ថា កាល​ពី​ចូលកាន់​តំណែង​នៅ​ឆ្នាំ​២០១៦ លោក​បាន​ទាក់ទង​ទៅ​រុស្ស៊ី​និង​ចិន​ដើម្បីទាក់ទាញ​ការវិនិយោគ​និង​ពាណិជ្ជកម្ម ព្រមទាំង​ពង្រីក​កិច្ចសហការ​យោធា​និង​ម្តងម្កាល​បាន​រិះគន់​គោលនយោបាយ​​សន្តិសុខ​របស់​រដ្ឋាភិបាល​ក្រុង​វ៉ាស៊ីនតោន ។​លោក​បាន​ទៅ​ទស្សនកិច្ច​រុស្ស៊ី​ពីរដង និង​បាន​ជួប​លោក​ពូ​ទីន ៕