ដោយៈ ទេ​ពក​ង្រី / កំពង់ឆ្នាំង​: នៅ​ថ្ងៃទី​២៤ ឧសភា ២០២២ នៅក្នុង​ទីបញ្ជាការ ដ្ឋា​ន​តំបន់​ប្រតិបត្តិ ការ​សឹក​រង​កំពង់ឆ្នាំង មាន​រៀបចំ​ប្រជុំ​បូកសរុប និង​វាយតម្លៃ ការចាក់​វ៉ាក់សាំង​បង្ការ​ជំងឺ​កូ​វីដ​-១៩ ជូន​ប្រជាពលរដ្ឋ កម្មករ កម្មការិនី នៅ​ទូទាំង​ក្រុង ស្រុក ទាំង​៨ ក្នុង​ខេត្តកំពង់ឆ្នាំង​។​

​ក្រោយពី​លោក​វរសេនីយ៍ឯក វេជ្ជបណ្ឌិត សែ សា​រុំ បាន​អាន​របាយការណ៍ បូកសរុប និង​វាយ តម្លៃ​លទ្ធផល ស្តីពីរ​ការចាក់​វ៉ាក់សាំង​បង្ការ​ជំងឺ​កូ​វីដ ១៩ ដូ​ស​ទី​៣ និង​ទី​៤ ជូន​គណៈអធិបតី​ជ្រាប រួចមក តំណាង​អភិបាលក្រុង ស្រុក​ទាំង ៨ និង​ក្រុមគ្រូពេទ្យ​យោធា​ស្ម័គ្រចិត្ត នៅតាម​គោលដៅ នានា​ក្នុង​ខេត្ត បានលើកឡើង នូវ​បញ្ហា​ប្រឈម​នានា នៅក្នុង​យុទ្ធនា​ការចាក់​វ៉ាក់សាំង​បង្ការ ជំងឺ​កូ​វីដ ១៩ ដូ​ស​ទី​៣ និង​ទី ៤ ដែលមាន​ខ្លះ​មិន​ព្រម​មក​ទទួល​ការចាក់​វ៉ាក់សាំង និង​ខ្លះទៀត ធ្វើ​ចំណាកស្រុក ដែល​ធ្វើឱ្យមាន​ការយឺតយ៉ាវ ដល់​ដំណើរការ ចាក់​វ៉ាក់សាំង ខ្លះទៀត បាន​ចាក់ ដូ​ស​ទី​១ ដូ​ស​ទី​២ បា​នប​ណ្ណ័​ហើយ លែង​មកចាក់​បន្តទៀត​។​

​លោក​ឧ​ត្ត​សេនីយ៍​ទោ ប៉ូ វណ្ណ​: មេបញ្ជាការរង នាយសេនាធិការ ប្រធាន​ក្រុម ប្រតិបត្តិ​ចាក់ វ៉ាក់សាំង​កូ​វីដ ១៩ យោធភូមិភាគ​ពិសេស និង​លោក អម សុភា អភិបាលរង​ខេត្តកំពង់ឆ្នាំង ទទួលបន្ទុក​ចាក់​វ៉ាក់សាំង​កូ​វីដ ១៩ ខេត្តកំពង់ឆ្នាំង បាន​មានប្រសាសន៍ កោតសរសើ ដល់​កម្លាំង​ក្រុមគ្រូពេទ្យ​យោធា​ស្ម័គ្រចិត្ត រួម​នឹង​អាជ្ញាធរ​ក្រុង ស្រុក ដែល​បានរួម​សហការ យ៉ាង​យកចិត្តទុកដាក់ ក្នុងការ​ព​ន្លឿ​ន​ការចាក់​វ៉ាក់សាំង​បង្ការ​ជំងឺ​កូ​វីដ ១៩ ដូ​ស​ទី​៣ និង​ទី​៤ ជូន​ដល់ បងប្អូន​ប្រជាពលរដ្ឋ កម្មករ កម្មការិនី តាម​បណ្តា​រង្គសាល ទីផ្សារ និង​សាលារៀន វត្ត​អារាម និង​តាម​កន្លែង​សប្បាយ​ផ្សេងៗ ដោយ​ទទួលបាន​ជោគជ័យ និង​បាន​បិទ​បញ្ចប់ នៅ​ថ្ងៃទី​២៣ ឧសភា ២០២២ នេះ​។​

​លោក​បាន​មានប្រសាសន៍​ទៀតថាៈ បើទោះជា​យើង បានទទួល​នៅ​ជោគ ជ័យ​បែបនេះ ក៏ដោយ ក៏​នៅមាន​បញ្ហា​ប្រឈម​ជាច្រើន​ទៀត សម្រាប់​ក្រុម គ្រូពេទ្យ​យោធា​ស្ម័គ្រចិត្ត និង​បណ្ដា​ក្រុម គ្រូពេទ្យ ផ្សេងៗ​ទៀត ហើយ​ត្រូវតែ យកចិត្តទុកដាក់ ពិសេស​អាជ្ញាធរ​មូលដ្ឋាន ត្រូវ​បញ្ជ្រាប ការឃោសនា​ចិត្តសាស្ត្រ គៀងគ​ប្រជាពលរដ្ឋ ដើម្បី​បង្កើន​ក្នុង​យុទ្ធនា​ការចាក់​វ៉ាក់សាំង សម្រេចបាន ជា​ស្ថាពរ​។ ទាំងអស់នេះ ជាការ​ងារ​ស្នូល ជួយ​ដល់​បងប្អូន​ប្រជាពលរដ្ឋ​នេះ ជាការ​យកចិត្តទុកដាក់​របស់ ប្រមុខ​រាជរដ្ឋាភិបាល​កម្ពុជា ដែលមាន​សម្ដេច​តេ​ជោ ហ៊ុន សែន ជា​នាយករដ្ឋមន្ត្រី នាំយក​ថ្នាំ​មកចាក់​ស្រោច ជូន​ប្រជាពលរដ្ឋ ដោយ​មិន​គិតថ្លៃ និង​បានធ្វើ​ឲ្យ​ជំងឺ កូ​វីដ ១៩ មានការ​ធូរស្បើយ ហើយ​ប្រទេស ក៏​ចាប់​ដើម​បើក​ឲ្យ​ដំណើរការ​ឡើងវិញ ជា​ប្រក្រតី​។​

​នៅ​បញ្ចប់​ពិធី លោក​ឧ​ត្ត​ម​សេនីយ៍​ទោ ប៉ូ វណ្ណៈ បាន​ផ្តាំផ្ញើ​ដល់​មន្ទីរអប់រំ យុវជន និង​កីឡា​ខេត្ត មន្ទីរ​សង្គមកិច្ច អតីតយុទ្ធជន​និ ង​នីតិសម្បទា​ខេត្ត អាជ្ញាធរ​មូល ដ្ឋា​ន​ទាំងអស់ រៀបចំ​កម្មវិធី សម្រាប់​ក្រុមគ្រូពេទ្យ ចល័ត​យោធា​ស្ម័គ្រចិត្ត ចុះជួយ​ចាក់​វ៉ាក់សាំង នៅតាម​គោលដៅ​ក្រុង ស្រុក ទាំង ៨ ក្នុង​ខេត្តកំពង់ឆ្នាំង ពិសេស​ជូន​ដល់​ប្អូនៗ​កុមារ និង​ជនពិការ​ផងដែរ​៕/V​-PC