​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រធានាធិបតី ចូ បៃ​ដិន បាន​ប្រាប់​មេដឹកនាំ​ឥណ្ឌូ​ប៉ាស៊ីហ្វិក​ដែល​ជួបប្រជុំ​គ្នា​សម្រាប់​កិច្ចប្រជុំ​កំពូល​បួន​ប្រទេស​ថា ពួកគេ​កំពុង​ឆ្លងកាត់​”​ពេលវេលា​ដ៏​ខ្មៅ​ងងឹត​​នៅក្នុង​ប្រវត្តិសាស្ត្រ​រួមគ្នា​របស់​យើង​” ដោយសារ​តែ​សង្គ្រាម​របស់​រុស្ស៊ី​លើ​អ៊ុ​យក្រែន ហើយ​បាន​ជំរុញ​ឱ្យ​ក្រុម​ប្រទេស​ទាំង​បួន​ខិតខំ​ប្រឹងប្រែង​ឱ្យ​កាន់តែ​ខ្លាំង​ដើម្បី​បញ្ឈប់​ការឈ្លានពាន​របស់​វ្ល៉ា​ឌី​មៀ ពូ​ទីន​។​

​ខណៈ​កិច្ចប្រជុំ​កំពូល Quad ជាមួយ​ជប៉ុន អូស្ត្រាលី និង​ឥណ្ឌា​បានចាប់ផ្តើម លោកបៃ​ដិ​ននិយាយថា “​នេះ​លើសពី​បញ្ហា​អឺរ៉ុប​ទៅទៀត​។ វា​ជា​បញ្ហា​សកល​”​។​

​លោក​ប្រធានាធិបតី​អាម៉េរិក​មិនបាន​និយាយ​ចំៗ​ដោយ​ផ្ទាល់​ទៅលើ​ប្រទេស​ណាមួយ សារ​របស់​គាត់​ហាក់​ត្រូវ​បាន​ចង្អុលបង្ហាញ​យ៉ាងហោចណាស់​មួយ​ផ្នែក​ចំពោះ​នាយក​រដ្ឋមន្ត្រី​ឥណ្ឌា​លោក ណារិ​នដ្រា ម៉ូ​ឌី ដែល​មាន​ការខ្វែងគំនិត​គ្នា​អំពី​វិធី​ឆ្លើយតប​ទៅនឹង​ការឈ្លានពាន​របស់​រុស្ស៊ី​។​

​ខុស​ពី​ប្រទេស​ក្នុង​ក្រុម​Quad ផ្សេង​ទៀត​និង​ស្ទើរតែ​គ្រប់​សម្ពន្ធមិត្ត​របស់​ស​ហ​រដ្ឋ​អាម៉េរិក​ផ្សេងទៀត ឥណ្ឌា​មិន​បាន​ដាក់​ទណ្ឌកម្ម​ឬ​សូម្បី​ថ្កោលទោស​រុស្ស៊ី​ដែលជា​អ្នក​ផ្គត់ផ្គង់​សម្ភារៈ​យោធា​ដ៏​ធំ​បំផុត​របស់​​ខ្លួន​។​

​ខណៈ​លោក​ម៉ូ​ឌី​អង្គុយ​ក្បែរ​នោះ លោកបៃ​ដិនបាន​លើក​ករណី​មួយ​ថា ពិភពលោក​មាន​ទំនួល​ខុស​ត្រូវ​រួមគ្នា​ក្នុងការ​ធ្វើ​អ្វីមួយ​ដើម្បី​ជួយ​ដល់​ការតស៊ូ​របស់​អ៊ុយ​ក្រែន​ប្រឆាំងនឹង​ការឈ្លានពាន​របស់​រុស្ស៊ី​។​

​គាត់​បាន​និយាយថា “​យើង​កំពុង​ឆ្លងកាត់​ពេលវេលា​ដ៏​ខ្មៅ​ងងឹត​នៅក្នុង​ប្រវត្តិសាស្ត្រ​របស់​យើង​។ សង្គ្រាម​ដ៏​ឃោរឃៅ​របស់​រុស្ស៊ី​ប្រឆាំង​នឹង​អ៊ុយ​ក្រែន​បាន​បង្ក​ឱ្យ​មាន​មហន្តរាយ​មនុស្សធម៌ ហើយ​ជន​ស៊ីវិល​​ស្លូតត្រង់​ត្រូវបាន​សម្លាប់​នៅតាម​ដងផ្លូវ និង ជនភៀសខ្លួន​រាប់លាន​នាក់​ត្រូវបាន​ផ្លាស់​ទីលំនៅ​ខាងក្នុង​ក៏​ដូចជា​និរទេស​ខ្លួន​ក្រៅ​ស្រុក​ផងដែរ​”​។​

​លោក​បាន​បន្ថែមថា “​ពិភពលោក​ត្រូវ​តែ​ដោះស្រាយ​ជាមួយ​វា ហើយ​យើង​គឺជា​អ្នកដោះស្រាយ​វា​”៕

​ប្រធានាធិបតី​អាម៉េរិក​ចូ បៃ​ដិន និង ប្រធានាធិបតី​រុស្ស៊ី វ្ល៉ា​ឌី​មៀ ពូ​ទីន