ដោយ៖ ដេប៉ូ ភ្នំពេញ៖ រដ្ឋមន្ត្រីក្រសួងបរិស្ថាន លោក សាយ សំអាល់ បានថ្លែង នាឱកាសជួប សំណេះសំណាល ជាមួយនិស្សិតជ័យលាភី អាហារូបករណ៍ ទៅសិក្សានៅអូស្ត្រាលីថា និស្សិតកម្ពុជា ត្រូវចេះអភិវឌ្ឍន៍សមត្ថភាពខ្លួន ចេះធ្វើការងារជាក្រុម និងរៀនសូត្រ អំពីការវិវត្តន៍ នៃសភាពការណ៍ នយោបាយពិភពលោក។
គួរបញ្ជាក់ថា ក្នុងឱកាសជួបសំណេះសំណាល ជាមួយនិស្សិតជ័យលាភី អាហារូបករណ៍ ទៅសិក្សានៅអូស្ត្រាលីនេះ មានចំនួន ២១នាក់ នៅទីស្តីការ ក្រសួងបរិស្ថាន កាលពីរសៀល ថ្ងៃទី២៣ ខែឧសភា ឆ្នាំ២០២២។
ថ្លែងនាឱកាសនោះ លោករដ្ឋមន្ត្រី បានចែករំលែកជាពិសោធន៍ក្នុង ការរស់នៅ អូស្ត្រាលី និងផ្តល់ជាអនុសាសន៍ជូននិស្សិតកម្ពុជាថា ក្រៅពីឱកាសអភិវឌ្ឍន៍ សមត្ថភាពខ្លួន ប្អូនៗក៏ត្រូវ ប្រឹងប្រែងសិក្សាស្វែងយល់ អំពីជីវភាពរស់នៅ ប្រចាំថ្ងៃ ជាពិសេស ការអភិវឌ្ឍន៍សេដ្ឋកិច្ចសង្គម របស់ប្រទេសអូស្ត្រាលី ដែលជាប្រទេស មានភាពសំបូរបែប លើអាហារូបត្ថម្ភ។
ជាមួយគ្នានេះ លោករដ្ឋមន្ត្រី បានផ្តាំផ្ញើរដល់និស្សិត ត្រូវជឿជាក់លើខ្លួនឯង ចេះធ្វើការងារ ជាក្រុម និងរៀនសូត្រ អំពីការវិវត្តន៍នៃ សភាពការណ៍ នយោបាយពិភពលោក ដើម្បីអភិវឌ្ឍន៍ សមត្ថភាពខ្លួន ស្របតាមបរិបទ នយោបាយ ក្នុងតំបន់ និងលើកតម្កើងសេដ្ឋកិច្ចគ្រួសារ ដែលជាផ្នែកមួយ ក្នុងការលើកកម្ពស់ផលប្រយោជន៍ របស់កម្ពុជាផងដែរ៕/V-PC
