​ដោយៈ ទេព មង្គល / ភ្នំពេញៈ ក្រសួងសុខាភិបាល កំពុង​តាមដាន​ជា​បន្ត លើ​វ៉ាក់សាំង បង្ការ​ជំងឺ​អុត​ស្វា ដែល​ការចាក់​វាក់​សាំង​ប្រឆាំងនឹង​ជំងឺ​អុតស្វាយ កន្លងមក បាន​បង្ហាញថា ជាការ​ការពារ​ប្រឆាំងនឹង​ជំងឺ​នេះ ផងដែរ ។ ទន្ទឹមនឹងនេះ មន្ត្រីជាន់ខ្ពស់​ក្រសួងសុខាភិបាល ក៏បាន​បង្ហាញ​សកម្មភាព​មួយចំនួន ដែលនាំឱ្យ​កើតមាន​ការចម្លង​នូវ​មេរោគ​អុត​ស្វា​នោះ ពី​មនុស្ស​ម្នាក់ ទៅ​មនុស្ស​ម្នាក់ទៀត​។​

​តាមរយៈ​គ្រុប​តេ​ឡេ​ក្រាម ផ្ទាល់​របស់លោក​ស្រី នៅ​រសៀល ថ្ងៃទី​២៤ ខែឧសភា នេះ លោកស្រី ឱ វណ្ណឌី​ន រដ្ឋលេខាធិការ និង​ជា​អ្នកនាំពាក្យ​ក្រសួងសុខាភិបាល បានឱ្យដឹងថាៈ ក្រសួងសុខាភិបាល កំពុង​តាមដាន​ជា​បន្ត លើ​វ៉ាក់សាំង បង្ការ​ជំងឺ​អុត​ស្វា ខណៈ​លោកស្រី ធ្លាប់បាន​បញ្ជាក់ថា ការចាក់​វាក់​សាំង​ប្រឆាំងនឹង​ជំងឺ​អុតស្វាយ កន្លងមក បាន​បង្ហាញថា ជាការ​ការពារ​ប្រឆាំងនឹង​ជំងឺ​នេះ ផងដែរ​។​

​លោកស្រី វេជ្ជបណ្ឌិត បានឱ្យដឹង​ដែរ​ថាៈ វ៉ាក់សាំង​ថ្មី ប្រឆាំងនឹង​ជំងឺ​អុតស្វាយ (Smallpox) និង​ជំងឺ​អុត​ស្វា (Monkeypox) ត្រូវបាន​អនុម័ត​ឱ្យប្រើ​ប្រាស់ ប៉ុន្តែ​មិនទាន់មាន​ប្រើប្រាស់ យ៉ាង​ទូលំទូលាយ នៅតាម​បណ្តា​ប្រទេស​នៅឡើយ​ទេ​។​

​លោកស្រី បានបញ្ជាក់​ថាៈ មកដល់ពេលនេះ កម្ពុជា​មិនទាន់មាន​ករណី​សង្ស័យ ឬ​ករណី វិជ្ជមាន​ជំងឺ​នេះ​នៅឡើយ​ទេ តែ​ពលរដ្ឋ ក៏ត្រូវ​តែមាន​ការប្រុងប្រយ័ត្ន ខ្ពស់​ជាប់​ជានិច្ច ដោយ​បុគ្គល គ្រួសារ និង​សហគមន៍ ត្រូវ​បន្ត​អនុវត្ត​វិធានការ បង្ការ​ជំងឺ​ផ្ទាល់ខ្លួន ដូចជា មន្ទីរពេទ្យ និង​មណ្ឌល​សុខភាព ត្រូវ​តាមដាន និង​រាយការណ៍​ករណី​សង្ស័យ​ណាមួយ ដែល​កើតមានឡើង​ដើម្បី​បន្ត​ការស៊ើបអង្កេត​។​

​លោកស្រី វេជ្ជបណ្ឌិត បាន​ជំរុញ​ឱ្យ​យកចិត្តទុកដាក់ ពិនិត្យមើល​ឱ្យបាន​ហ្មត់ចត់ នូវ​អ្នកដំណើរ ចូលមក​កម្ពុជា ដែលមាន​កន្ទួល​រមាស់ នៅលើ​ខ្លួន អម​ដោយមាន​គ្រុនក្តៅ និង​មាន​ប្រវត្តិ ធ្វើដំណើរ មកពី​បណ្តា​ប្រទេស ប៉ែក​ខាង​អាហ្វ្រិក (​ប្រមាណ​ជា ១០ ប្រទេស​) ដែលមាន​ការកើត ឡើង នូវ​ជំងឺ​អុត​ស្វា (Monkeypox) បែប​ជា​អង់​ដេ​មី ហើយ​ត្រូវ​រាយការណ៍ ទៅ​អាជ្ញាធរ​សុខា​ភិ បាល ភ្លាមៗ ឬ​ទៅ​លេខ ១១៥​។​

​លោកស្រី ឱ វណ្ណឌី​ន បានបញ្ជាក់​ទៀតថាៈ បច្ចុប្បន្ន ជំងឺ​អុត​ស្វា​នេះ គឺជា​ជំងឺ​ដែល​ឆ្លង​ដោយ​វីរុស (​ចម្លង​ពីស​ត្វ ទៅ​មនុស្ស​) នៅ​តំបន់​ត្រូ​ពិ​ក ដែលមាន​ភ្លៀង នៃ​អាហ្វ្រិក​កណ្ដាល និង​អាហ្វ្រិក ខាងលិច​។ ការចម្លង​ជំងឺ​អុត​ស្វា កើតមានឡើង តាមរយៈ​ការប៉ះពាល់​រាងកាយ​ផ្ទាល់ ឬ​ប៉ះពាល់​ជិតស្និទ្ធ ជាមួយ​អ្នក​ដែលមាន​រោគសញ្ញា រួមទាំង​ទំនាក់ទំនង​ផ្លូវភេទ ផងដែរ​។ ការប្រើ​សម្លៀកបំពាក់ សម្ភារៈប្រើប្រាស់​របស់​អ្នកជំងឺ​អុត​ស្វា ឡូកឡំ​ចូល​គ្ន ក៏​អាច​ឆ្លងទៅ​អ្នកដទៃ បានដែរ​។ ក្រៅពីនេះ វីរុស​នេះ ក៏​អាច​ចម្លង តាមរយៈ​ទឹកមាត់ និង​អ្នកមាន​ផ្ទៃពោះ ចម្លង​ទៅ​ទារក តាមរយៈ​ទងសុក ឬ​ពី​ឪពុកម្ដាយ ដែលមាន​វីរុស​ឆ្លង ទៅដល់​កូន អំឡុងពេល ឬ​ក្រោយពេល​ឆ្លងទន្លេ​តាមរយៈ​ការ​ប៉ះ​នឹង​ស្បែក​។​

​សូម​រំលឹកថា ជំងឺ​អុត​ស្វា (Mokeypox) បាន​ផ្ទុះ​ឡើងជា​បន្តបន្ទាប់ និង​ត្រូវបាន​បញ្ជាក់​កាលពី ថ្ងៃទី​៦ ខែឧសភា ឆ្នាំ ២០២២ នៅ​ចក្រភព​អង់គ្លេស ដោយ​ចាប់ផ្ដើម​នៅលើ​អ្នកដំណើរ​ជនជាតិ អង់គ្លេស​ម្នាក់ ដែល​បានធ្វើ​ដំណើរ ទៅ​ប្រទេស​នី​ហ្សេ​រី​យ៉ា​។​

​នៅ​ពាក់កណ្តាល​ខែឧសភា អ្នកជំនាញ​តាមដាន បាន​សង្កេតឃើញថា មាន​ការឆ្លង​នៅក្នុង សហគមន៍ នៃ​ចក្រភព​អង់គ្លេស ហើយ​មិនទាន់មាន​អ្នកស្លាប់​នៅឡើយ​ដែរ គិត​ត្រឹម​ថ្ងៃទី​២១ ខែឧសភា ឆ្នាំ​២០២២ ។​

​បច្ចុប្បន្ន អង្គការ​សុខភាព​ពិភពលោក ចាត់ទុក​ការចម្លង​វីរុស​នេះ នៅមាន​ហានិភ័យ​ទាប តែ​ក៏​លើកឡើង ពី​លទ្ធភាព​ហានិភ័យ ដែល​អាច​គំរាមកំហែង ដល់​សុខភាព​សកល​៕/V​