​ដោយ​: ភ្នំ​ខៀវ / បាត់ដំបង​: សាខា​កាកបាទក្រហមកម្ពុជា ខេត្តបាត់ដំបង បានទទួល​អំណោយ សប្បុរស​ខួប​លើក​ទី ១៥៩ ទិវា​ពិភពលោក​កាកបាទក្រហម និង​អឌ្ឍចន្ទ​ក្រហម ប្រាក់រៀល កើន​ដល់​ជាង ៤០០ លាន​រៀល និង​ប្រាក់​អាម៉េរិក ជាង ៨ ម៉ឺន​ដុល្លារ​។​

​មន្ត្រី​សាខា​កាកបាទក្រហមកម្ពុជា ខេត្តបាត់ដំបង បាន​ប្រាប់​ឲ្យ​ដឹង នៅ​ថ្ងៃទី ២៤ ខែឧសភា នេះ​ថាៈ គិត​ត្រឹម​ថ្ងៃទី ២៤ ខែឧសភា ឆ្នាំ ២០២២ នេះ សាខា​កាកបាទក្រហមកម្ពុជា ខេត្តបាត់ដំបង ទទួលបាន​ថវិកា​វិភាគទាន ពី​បណ្តា​សប្បុរសជន​នានា ក្នុង​ខេត្ត ក្នុងឱកាស​អបអរ ខួប​លើក​ទី ១៥៩ នៃ​ទិវា​ពិភពលោក កាកបាទក្រហម និង​អឌ្ឍចន្ទ​ក្រហម ៨ ឧសភា ២០២២ ក្រោម​ប្រធានបទ ” ទាំងអស់គ្នា​រួមជាមួយ​កាកបាទក្រហមកម្ពុជា ដោះស្រាយ​បញ្ហា​ប្រឈម និង​បន្ត​ពង្រឹង​ភាព​ធន់​សហគមន៍ ” ថវិកា​កើន​ដល់​ចំនួន ៤៤៨.០០២.១០០ រៀល និង​ប្រាក់ អាម៉េរិក ចំនួន ៨១.៤៨៣,៥០ ដុល្លារ រួមទាំង​គ្រឿងឧបភោគ​បរិភោគ មួយចំនួនទៀត​។​

​លោក សុខ លូ ប្រធាន​គណៈកម្មាធិការ​សាខា បាន​វាយតម្លៃ​ខ្ពស់ ចំពោះ​រាល់​សកម្មភាព​របស់ ក្រុម​ប្រតិបត្តិ​សាខា អនុសាខា ពិសេស​សប្បុរសជន​ទាំងអស់ នៅក្នុង​ខេត្តបាត់ដំបង ដែល​បាន​ចូលរួម និង​អនុវត្ត​យ៉ាង​ផុសផុល យកចិត្តទុកដាក់​ខ្ពស់ ចំពោះ​ការងារ​មនុស្សធម៌ របស់​កាកបាទក្រហម​កម្ពុជា ក្នុងការ​ជួយសង្គ្រោះ​ដល់​បងប្អូន​ប្រជាពលរដ្ឋ ដែល​ជួប​បញ្ហា នៅតាម​មូលដ្ឋាន​។​

​ក្នុងនាម​ប្រធាន​គណៈកម្មាធិការ​សាខា​កាកបាទក្រហមកម្ពុជា ខេត្តបាត់ដំបង លោក​បាន​ប្តេជ្ញា​ខ្ពស់ និង​យកចិត្តទុកដាក់ ប្រើប្រាស់​វិភាគទាន​ដ៍​សប្បុរស​ខាងលើ ទៅ​បម្រើ​សកម្មភាព​មនុស្សធម៌ ជួយ​ដល់​ប្រជាពលរដ្ឋ ដែល​ជួប​ការលំបាក ដោយ​គ្រោះធម្មជាតិ និង​គ្រោះមហន្តរាយ​ផ្សេងៗ ឲ្យ​ចំ​គោលដៅ យ៉ាងពិត​ប្រាកដ​៕/V​