​ប្រែ​សម្រួលៈ​បំណង​(​ដេល្លី​ម៉េល​)៖ កូរ៉េ​ខាងជើង​បាន​បាញ់​កាំជ្រួច​ផ្លោង​ចំនួន​បី​គ្រាប់​ឆ្ពោះទៅ​សមុទ្រ​ជប៉ុន​កាលពីដើម​ថ្ងៃ​ពុធ​ទី​២៥​ឧសភា នៅ​ពេល​តែ​មួយ​ថ្ងៃក្រោយ​ប្រធានាធិបតី​អាម៉េរិក ចូ បៃ​ដិន​​បញ្ចប់​ដំណើរ​ទស្សនកិច្ច​អាស៊ី ក្នុងនាម​ជា​មេដឹកនាំ​អាម៉េរិក​។​

​នាយសេនាធិការ​កងទ័ព​ចំរុះ​កូរ៉េខាងត្បូង បាន​និយាយ​នៅក្នុង​សេចក្តីថ្លែងការណ៍​មួយ​ថា យោធា​កូរ៉េខាងត្បូង​បាន​«​ចាប់​បាន​សញ្ញា​កាំជ្រួច​ហោះ​ចេញពី​តំបន់​ស៊ូ​ណាន​នៅ​ម៉ោង​០៦០០ ម៉ោង​០៦៣៧​និង​ម៉ោង ០៦៤២ កាលពីដើម​ថ្ងៃ​ពុធ​»​។​

​ប្រជាជន​មើល​ការផ្សាយ​អំពី​ការបាញ់​កាំជ្រួច​របស់​កូរ៉េខាងត្បូង​នៅ​ស្ថានីយ​រដ្ឋ​ភ្លើង​មួយ​នៅ​ក្រុង​សេ​អ៊ូ​ល​កាលពី​ថ្ងៃ​៧​ឧសភា ឆ្នាំ​២០២២

​ចំណែក​កង​ឆ្មាំ​សមុទ្រ​ជប៉ុន​បាន​ព្រមាន​អំពី​«​លទ្ធភាព​នៃ​ការបាញ់​កាំ​ជ្រួច​»​ចេញពី​កូរ៉េខាងជើង ដោយ​បាន​ប្រាប់​ទៅ​នាវា​អោយនៅ​អោយ​ឆ្ងាយ​ពី​វត្ថុ​ធ្លាក់​ចូល​ក្នុង​ទឹក​។​

​នាយករដ្ឋមន្ត្រី​ជប៉ុន​ក្នុងពេល​ជាមួយគ្នា បាន​ប្រាប់​អ្នកយកព័ត៌មាន​ថា​រដ្ឋាភិបាល​ទីក្រុង​តូ​ក្យូ​កំពុង​ព្យាយាម​បញ្ជាក់​ព័ត៌មាន​អំពី​ការបាញ់​បង្ហោះ​នេះ​។​

​នៅ​កូរ៉េ​ខាងត្បូង​ឯណោះ​វិញ ប្រធានាធិបតី​កូរ៉េខាងត្បូង លោក​យូ​ន ស៊ុក​-​យ៉ូល នឹង​បើក​កិច្ចប្រជុំ​ក្រុមប្រឹក្សាសន្តិសុខ​ជាតិ​នៅ​ព្រឹក​នេះ​ដើម្បី​ពិភាក្សា​ការបាញ់​កាំជ្រួច​នេះ​។​លោក​យូ​ន​ដែល​ទើប​ស្បថ​​ចូលកាន់​តំណែង​នៅ​ខែ​នេះ បាន​ប្តេជ្ញា​ប្រកាន់​គោលជំហរ​តឹង​ត្អឹង​ចំពោះ​កូរ៉េខាងជើង​ក្រោយ​កិច្ចការ​ទូត​អស់​ប្រាំ​ឆ្នាំ​តែ​មិនបាន​សំរេច​ផល​។​

​ការបាញ់​បង្ហោះ​នៅ​ថ្ងៃ​ពុធ​ជា​ការបាញ់​បង្ហោះ​លើកចុងក្រោយ​មួយ​ក្នុងចំណោម​ការសាកល្បង​សព្វាវុធ​ជា​បន្តបន្ទាប់​ដោយ​រដ្ឋាភិបាល​ទីក្រុង​ព្យុង​យ៉ាង​នៅ​ឆ្នាំនេះ រួម​មាន​ការបាញ់​កាំជ្រួច​ឆ្លង​ទ្វីប​ចម្ងាយ​​ពេញ​ជា​លើកដំបូង​ចាប់តាំងពី​ឆ្នាំ​២០១៧​មក​ផង​។​

​ការបាញ់​សាកល្បង​ចុងក្រោយ​នេះ​កើតឡើង​តែ​ប៉ុន្មាន​ថ្ងៃ​បន្ទាប់ពី​ប្រធានាធិបតី ចូ បៃ​ដិន ចាកចេញ​ពី​កូរ៉េខាងត្បូង​កាលពី​ថ្ងៃអាទិត្យ ចំ​ពេល​មន្ត្រី​អាម៉េរិក​ព្រមាន​ថា​មេដឹកនាំ​កូរ៉េខាងជើង លោក​គីម​​ជុង​អ៊ុន អាច​សាកល្បង​នុយក្លេអ៊ែ​រ ឬ​កាំជ្រួច​។​

​នៅ​កូរ៉េ​ខាងត្បូង លោកបៃ​ដិន បាន​ពិភាក្សា​អំពី​ការពង្រីក​ទំហំ​សមយុទ្ធ​យោធា​ដើម្បី​ទប់ទល់​នឹង​ឥរិយាបទ​គំរាម​ប្រើ​កម្លាំង​របស់​គីម ជុង​អ៊ុន​៕