ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ សហរដ្ឋ​អាម៉េរិក​កាលពី​ថ្ងៃ​អង្គារ​ទី​២៤​មេសា​បាន​ព្រមាន​តួ​ក​គី​កុំឱ្យ​បើក​ប្រតិបត្តិការ​យោធា​ថ្មី​នៅ​ភាគ​ខាងជើង​ប្រទេស​ស៊ី​រី ដោយ​និយាយ​ថា​សម្ពន្ធមិត្ត​ណា​តូ​​ដែល​មិន​សប្បាយចិត្ត​មួយ​នេះ​នឹង​ធ្វើឱ្យ​កងទ័ព​អាម៉េរិក​ប្រឈម​នឹង​ហានិភ័យ​។​

​ប្រធានាធិបតី​តួ​ក​គី​លោក រី​ស៊ី​ប ថា​យ​យី​ប អឺ​ដូ​ហ្គាន (Recep Tayyip Erdogan)​បាន​និយាយ​កាលពី​ថ្ងៃ​ចន្ទ​ថា​តួ​ក​គី​នឹង​ចាប់ផ្តើម​ប្រតិបត្តិការ​យោធា​ថ្មី​មួយ​ចូល​ទៅ​ភាគ​ខាងជើង​នៃ​​ប្រទេស​ស៊ី​រី​ក្នុង​ពេល​ឆាប់ៗ​នេះ​ដើម្បី​បង្កើត “​តំបន់​សន្តិសុខ​” ប្រវែង ៣០ គីឡូម៉ែត្រ​នៅ​តាម​បណ្តោយ​ព្រំដែន​។​

​អ្នកនាំពាក្យ​ក្រសួងការបរទេស​លោក ណេ​ត ប្រា​យ បាន​ប្រាប់​អ្នកយកព័ត៌មាន​ថា​”​យើង​មាន​ការព្រួយបារម្ភ​យ៉ាងខ្លាំង​អំពី​របាយការណ៍​និង​ការពិភាក្សា​អំពី​ការកើនឡើង​នៃ​សកម្មភាព​យោធា​នៅ​ភាគ​​ខាងជើង​ប្រទេស​ស៊ី​រី និង​ជា​ពិសេស​ផលប៉ះពាល់​របស់​វា​ទៅលើ​ប្រជាជន​ស៊ីវិល​”​។​

​លោក​បាន​និយាយថា “​យើង​ថ្កោលទោស​ការបង្កើន​ការវាយលុក​ណាមួយ​។ យើង​គាំទ្រ​ដល់​ការថែរក្សា​ខ្សែ​បន្ទាត់​នៃ​បទ​ឈប់​បាញ់​បច្ចុប្បន្ន​”​។​

​នៅឯ​អង្គការសហប្រជាជាតិ អ្នកនាំពាក្យ​លោក ស្តេ​ហ្វេន ឌួ​ចារិក (Stephane Dujarric) បាន​និយាយថា​អាទិភាព​សម្រាប់​ស៊ី​រី​ដែល​រង​នូវ​សង្គ្រាម​គួរតែ​ជា​ដំណោះស្រាយ​នយោបាយ​និង​​ជំនួយ​មនុស្សធម៌​។​

​លោកឌួ​ចារិក​បាន​ប្រាប់​អ្នកយកព័ត៌មាន​ថា “​យើង​គាំទ្រ​បូរណភាព​ទឹកដី​នៃ​ប្រទេស​ស៊ី​រី ហើយ​អ្វី​ដែល​ស៊ី​រី​ត្រូវការ​គឺ​មិនមែន​ប្រតិបត្តិការ​យោធា​បន្ថែម​ទៀត​ពី​ជ្រុង​ណា​មួយ​នោះឡើយ​”​។​

​តួ​ក​គី​បានចាប់ផ្តើម​ការវាយលុក​ចំនួន​បី​ដង​ចូល​ទៅក្នុង​ប្រទេស​ស៊ី​រី​ចាប់តាំងពី​ឆ្នាំ ២០១៦​ក្នុង​គោលបំណង​កម្ទេច​ក្រុម​យុទ្ធជន​ឃឺ​ដ​ស៊ី​រី​ដែល​បាន​ជួយ​ដល់​យុទ្ធនាការ​ដឹកនាំ​ដោយ​សហរដ្ឋ​អាម៉េរិក​​ប្រឆាំង​នឹង​ក្រុម​រដ្ឋ​អ៊ីស្លាម​ឬ​ហៅ​ម្យ៉ាងទៀត​ថា អាយ​ស៊ី​ស (ISIS)​។​

​អង្គភាព​ការពារ​ប្រជាជន (YPG) ត្រូវបាន​ចាត់ទុកជា “​ភេរ​វករ​” ដោយ​តួ​ក​គី ដែល​មើល​ឃើញ​ពួក​គេ​ជា​ផ្នែក​មួយ​នៃ​ចលនា​ផ្តាច់ខ្លួន PKK ដែល​ត្រូវបាន​ហាមឃាត់​នៅក្នុង​ស្រុក​៕

​ទាហាន​អាម៉េរិក​ល្បាត​រវាង​តំបន់​កាន់កាប់​ដោយ​កងកម្លាំង​ឃឺ​ដ​ស៊ី​រី​និង​យុទ្ធជន​ដែល​គាំទ្រ​ដោយ​តួ​ក​គី​នៅ​ភាគ​ឦសាន​ប្រទេស​ស៊ី​រី​កាលពី​ខែ​ធ្នូ ឆ្នាំ ២០២១