​ប្រែ​សម្រួលៈ​បំណង(BLOOMBERG)៖ រដ្ឋាភិបាល​ក្រុង​ប៉េកាំ​ង​បាន​ដាក់ទោស​មន្ត្រី​បួនដប់​នាក់​ចំពោះ​ការផ្ទុះកូ​វីដ​១៩​ជា​ចង្កោម​ចំនួន​ពីរ​នៅពេល​រដ្ឋធានី​របស់​ចិន បន្ត​រាយការណ៍​អ្នក​ឆ្លង​ថ្មី​និង​បន្ត​ការ​រឹតបន្តឹង​​ក្រោយ​ការកើតមាន​ជំងឺ​នេះ​អស់​ពេល​មួយ​ខែ​មក​ហើយ នៅពេល​ទីក្រុង​ក្បែរ​ខាង​ទៀន​ជីន បាន​បិទ​ខ្ទប់​សង្កាត់​កណ្តាល​ក្រុង​មួយ​ចំពេល​មានការ​ផ្ទុះ​ជំងឺ​នេះ​ផង​ដែរ​។​

​ការផ្ទុះ​ជំងឺ​កូវី​ដ​១៩​ជា​ចង្កោម​នៅ​កន្លែង​ផ្តល់​សេវា​ដឹកជញ្ជូន​មួយ​នាំ​អោយ​ប្រធាន​រដ្ឋបាល​ប្រៃសនីយ៍​ក្រុង​ប៉េកាំង​ព្រមាន​អំពី​ការគ្រប់គ្រង​ការងារ​ប្រឆាំង​កូ​វីដ​មិន​បាន​ត្រឹមត្រូវ និង​មិន​យកចិត្តទុកដាក់​​គ្រប់គ្រាន់​ចំពោះ​ការឆ្លង​រាលដាល​។​មន្ត្រី​ប្រាំបី​នាក់​ពាក់ព័ន្ធ​នឹង​ការផ្ទុះ​ជំងឺ​ជា​ចង្កោម​នៅ​ក្រុមហ៊ុន​ផ្លូវដែក​ចិន​ត្រូវ​បាន​ដាក់ទោស​ចំពោះ​ការ​ភូតកុហក​អំពី​ចលនា​របស់​គេ​។​

​រដ្ឋធានី​ប៉េកាំង​កាលពី​ថ្ងៃ​អង្គារ​បាន​រាយការណ៍​កា​រ​ឆ្លងកូវី​ដ​១៩​ថ្មី​ចំនួន​៤៧​នាក់ បន្ទាប់​ពី​ឆ្លង​៤៨​នាក់​កាលពី​ថ្ងៃ​ចន្ទ និង​៩៩​នាក់​កាលពី​ថ្ងៃអាទិត្យ​។​

ក្រុង​ប៉េកាំង​បាន​រាយការណ៍​ចំនួន​ឆ្លង​ត្រឹម​រាប់សិប​នាក់​ក្នុង​មួយថ្ងៃ​អស់​ពេល​មួយ​ខែ​មកនេះ នៅពេល​អាជ្ញាធរ​ខិតខំ​ធ្វើតេស្តិ៍​ទ្រង់ទ្រាយ​ធំ បញ្ជា​អោយ​មនុស្ស​នៅ​សង្កាត់​ខ្លះ​ធ្វើការ​ចេញពីផ្ទះ និង​ដាក់​​ចេញ​វិធានការ​ដទៃទៀត​ដើម្បី​លុបបំបាត់​កូវី​ដ​១៩​។​

​នៅ​ក្រុង​ទៀន​ជីន ផលិតកម្ម​រថយន្តរ​បស់​ក្រុមហ៊ុន​Toyota Motor Corp និង Volkswagen AG​ត្រូវ​រំខាន​ដោយសារតែ​មាន​ការផ្ទុះកូ​វីដ​១៩​មួយកន្លែង​។​ឥឡូវ​អ្នករស់នៅ​ក្នុង​សង្កាត់​ហឺ​ពីង​ត្រូវ​​បាន​ប្រាប់​កុំ​អោយ​ចាក​ចេញពី​ផ្ទះ​ឬ​សង្កាត់​របស់​គេ​បើ​មិន​មាន​ការងារ​ចាំបាច់ និង​បាន​លើកទឹកចិត្ត​អោយ​ធ្វើការ​ចេញពី​ផ្ទះ​ចំនួន​បី​ថ្ងៃ​។​

​នៅ​ទីកន្លែង​ផ្សេងទៀត ទីក្រុង​សៀង​ហៃ​កាលពី​ថ្ងៃ​អង្គារ បាន​រាយការណ៍​អ្នក​ឆ្លង​ថ្មី​៣៨៧​នាក់ ដោយ​ចុះ​ពី​ចំនួន​៤៨០​នាក់​កាលពី​ថ្ងៃ​ចន្ទ​៕

​រដ្ឋធានី​ចិន​កាលពី​ថ្ងៃ​អង្គារ​បាន​រាយការណ៍​អ្នក​ឆ្លងកូវី​ដ​១៩​ថ្មី​៤៧​នាក់​នៅ​ពេល​អាជ្ញាធរ​បន្ត​ចាត់​វិធានការ​លុបបំបាត់​ជំងឺ​នេះ​