ដោយ​: សុខុម / ស្ទឹងត្រែង​: មកដល់​ព្រឹក​ថ្ងៃទី​២៥ ខែឧសភា ឆ្នាំ​២០២២ គេ​នៅ​មិនទាន់​រកឃើញ មនុស្ស​ម្នាក់​ដែល​បាត់​ខ្លួន ក្នុងករណី​ទូក និង​ទូក​បុក​គ្នា នៅឡើយ​ទេ​។ ហេតុការណ៍​នេះ បានកើត​ឡើង នៅ​ចំណុច​ក្បែរ​ទីស្នាក់ការ ជលផល លើ​ផ្ទៃ​ទឹក​អាង ទំនប់​វា​រី​អគ្គិសនី សេ​សាន​ក្រោម​ពីរ ស្រុក​សេសា​ន ខេត្តស្ទឹងត្រែង​។

​ប្រភពព័ត៌មាន​ពី​មន្ត្រីនគរបាល បាន​ប្រាប់​ឲ្យ​ដឹងថាៈ កាលពី​រំលងអធ្រាត្រ ឈានចូល​ថ្ងៃទី​២៥ ឧសភា មាន​ទូក​លឿន ចំនួន​ពីរ​គ្រឿង បាន​បុក​គ្នា​ពេញទំហឹង បណ្ដាល​ឲ្យ មនុស្ស​ម្នាក់ បាត់​ខ្លួន រក​ពុំទាន់​ឃើញ​។ រីឯ​ម្នាក់ទៀត បាន​រងរបួស​ធ្ងន់​។​

​ប្រភព​បាន​បន្តថាៈ មនុស្ស​ម្នាក់​ដែល​បាត់​ខ្លួន ក្នុង​ឧបទ្ទវហេតុ ទូក​បុក​គ្នា​នោះ រួម​ដំណើរ​តាម ទូក​មួយគ្រឿង ទៅ​នេសាទ​ត្រី មាន​គ្នា​ពីរ​នាក់​។ បន្ទាប់ពី​ទូក​បុក​គ្នា ម្នាក់​បាត់​ខ្លួន ទូក​ក៏បាន​លិច ចូលទៅក្នុង​ទឹក ទាំង​ទូក ទាំង​ម៉ាស៊ីន​ផងដែរ​។ អ្នករួមដំណើរ​ក្នុង​ទូក​លិច​នេះ ម្នាក់​គឺជា​ជន រងរបួស​ធ្ងន់​។ រីឯ​ភាគី​ទូក​ម្ខាង​ទៀត បើកទូក​តែម្នាក់ឯង​ទេ ពុំមាន​គ្រោះថ្នាក់​ឡើយ ប៉ុន្តែ​បាន​ជ្រុះ ម៉ាស៊ីន​កាណូត ចូលទៅក្នុង​ទឹក នៅសល់តែ​ទូក​។ ភាគី​ដែល​មិនមាន​គ្រោះថ្នាក់​នេះ ក៏បាន​ជួយ អ្នករងរបួស​ធ្ងន់ អុំទូក​មក​ទីស្នាក់ការ​ជលផល ហើយ​មន្ត្រី​អភិរក្ស​ក្នុង​ស្នាក់ការ ជលផល ក៏បាន ជួយ​ដឹក​ជនរងគ្រោះ តាម​រថយន្ត បន្ត​ទៅកាន់​មន្ទីរពេទ្យ​។​

​លោកស្រី សម វិចិត្រ នាយ​ខណ្ឌ​រដ្ឋបាល​ជល​ផល​ស្តីទី ខេត្តស្ទឹងត្រែង បានបញ្ជាក់​ថាៈ ករណី​ទូក​លឿន​បុក​គ្នា ខាងលើនេះ គឺជា​គ្រោះថ្នាក់​ចៃដន្យ មិនមែន​បណ្ដាលមកពី​មន្ត្រី ចុះ​ល្បាត​បង្ក្រាប​បទល្មើស​ឡើយ​៕/V​-PC