​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ចិន​បាន​ដាក់ចេញ​ផែនការ​ពង្រីក​យ៉ាងខ្លាំង​នូវ​កិច្ចសហប្រតិបត្តិការ​ផ្នែក​សន្តិសុខ​និង​សេដ្ឋកិច្ច​ជា​មួយ​បណ្តា​ប្រទេស​ប៉ាស៊ីហ្វិក​ខាងត្បូង​ទោះ​ជា​រដ្ឋាភិបាល​​ទីក្រុង​វ៉ាស៊ីនតោន​បាន​ព្រមាន​ប្រឆាំង​នឹង​កិច្ចព្រមព្រៀង “​ស្រមោល​” ទាំងនោះ​។​

​សេចក្តីព្រាង​កិច្ចព្រមព្រៀង​ទូលំទូលាយ​និង​ផែនការ​រយៈពេល​ប្រាំ​ឆ្នាំ ដែល​ទទួល​បាន​ដោយ​ទីភ្នាក់ងារ​សារព័ត៌មាន AFP​កាលពី​ថ្ងៃ​ពុធ​ទី​២៥​ឧសភា នឹង​ក្លាយជា​ប្រធានបទ​នៃ​ការពិភាក្សា​នៅ​ពេល​​ដែល​រដ្ឋមន្ត្រីការបរទេស​ចិន​លោក វ៉ាង យី ធ្វើ​ទស្សនកិច្ច​ទៅកាន់​ប្រទេស​ប៉ាស៊ីហ្វិក​ចាប់ពី​ថ្ងៃ​ព្រហស្បតិ៍​។​

​វា​នឹង​ផ្តល់​ជំនួយ​ចិន​រាប់​លាន​ដុល្លារ​ដល់​រដ្ឋ​កោះ​តូចៗ​ចំនួន​១០ ឱកាស​នៃ​កិច្ចព្រមព្រៀង​ពាណិជ្ជកម្ម​សេរី​រវាង​ចិន​និង​ប៉ាស៊ីហ្វិក និង ការចូល​ទៅ​កាន់​ទីផ្សារ​កាក់កប​របស់​ចិន​ដែល​មាន​ប្រជាជន ១,៤ ពាន់​លាន​នាក់​។​

​ជំនួស​មកវិញ​ចិន​នឹង​បណ្តុះបណ្តាល​ប៉ូលិស​ក្នុង​តំបន់ ចូលរួម​ក្នុង​សន្តិសុខ​តាម​អ៊ីនធឺណិត​ក្នុង​តំបន់ ពង្រីក​ទំនាក់ទំនង​នយោបាយ ធ្វើ​ផែនទី​សមុទ្រ​ដ៏​រសើប​និង​ចូល​ទៅ​កាន់​ធនធានធម្មជាតិ​ច្រើនឡើង​។​

“​ចក្ខុវិស័យ​អភិវឌ្ឍន៍​គ្រប់​ជ្រុងជ្រោយ​” ត្រូវ​គេ​ជឿ​ថា​នឹង​ដាក់​ចេញ​សម្រាប់​ការអនុម័ត​នៅ​ពេល​ដែល​លោក​វ៉ាង​ជួប​ជាមួយ​រដ្ឋមន្ត្រី​ការបរទេស​ក្នុង​តំបន់​នៅ​ថ្ងៃទី ៣០ ខែ​ឧសភា​នៅ​ប្រទេស​ហ្វី​ជី​។​

​ប៉ាស៊ីហ្វិក​ខាងត្បូង​កំពុង​ក្លាយជា​ទី​លាន​សម្រាប់​ការប្រកួតប្រជែង​កាន់តែខ្លាំង​ឡើង​រវាង​ចិន​និង​សហរដ្ឋ​អាម៉េរិក ដែល​បាន​ក្លាយជា​មហាអំណាច​ចម្បង​នៅ​ក្នុង​តំបន់​នេះ​សម្រាប់​សតវត្សរ៍​ចុងក្រោយ​នេះ​។​

​ទីក្រុង​ប៉េកាំង​បាន​ស្វះស្វែង​រក​ការអភិវឌ្ឍ​ផ្នែក​យោធា នយោបាយ និង​សេដ្ឋកិច្ច​ឱ្យ​កាន់តែ​ខ្លាំង ប៉ុន្តែ​រហូត​មក​ទល់​ពេល​នេះ​មាន​ការវិវឌ្ឍ​តិចតួច​និង​មិន​ស្មើគ្នា​។​ផែនការ​នេះ បើសិនជា​យល់ព្រម នោះ​នឹង​​តំណាង​ឱ្យ​ការផ្លាស់ប្តូរ​ជំហាន​មួយ ដោយ​ជួយ​សម្រួល​ដល់​អ្វីៗ​គ្រប់យ៉ាង រាប់​ចាប់ពី​ការ​ដាក់ពង្រាយ​ប៉ូលិស​ចិន​រហូតដល់​ដំណើរ​ទស្សនកិច្ច​ដោយ​”​ក្រុម​សិល្បៈ​”​របស់​ចិន​។​ជើងហោះហើរ​រវាង​ចិន​និង​កោះ​ប៉ា​ស៊ី​​ហ្វិក​នឹង​កើនឡើង​។ ទីក្រុង​ប៉េកាំង​នឹង​តែងតាំង​បេសកជន​ប្រចាំ​តំបន់ ផ្គត់ផ្គង់​ការបណ្តុះបណ្តាល​សម្រាប់​អ្នកការទូត​វ័យក្មេង​នៅ​ប៉ាស៊ីហ្វិក និង​ផ្តល់​អាហារូបករណ៍​រដ្ឋាភិបាល​ចំនួន ២.៥០០ ៕

​នាយករដ្ឋមន្ត្រី​កោះ​សូ​ឡូ​ម៉ុន​លោក ម៉ា​ណាស់​សេ សូ​ហ្គា​វ៉ា​រ៉េ (​ឆ្វេង​) បាន​ការពារ​កិច្ចព្រមព្រៀង​សន្តិសុខ​ជាមួយ​ចិន ទោះបីជា​មាន​ការបារម្ភ​ក្នុងចំណោម​រដ្ឋាភិបាល​លោកខាងលិច​ក៏ដោយ