ស្រា​វី​ស្គី​ដប​ធំ​បំផុត​លើ​ពិភពលោក​លក់​ដេញថ្លៃ​បាន ១,៣៨ លាន​ដុល្លារ​

​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ស្រា​វី​ស្គី​ដប​ធំ​បំផុត​របស់​ពិភពលោក ដែល​មាន​ចំណុះ ៣១១ លីត្រ​នៃ​ម៉ាក​យីហោ Macallan ដែល​មាន​អាយុ ៣២ ឆ្នាំ​ត្រូវ​បាន​លក់​ដេញថ្លៃ​បាន​ជាង ១ លាន​ផោន​។​

​ស្រា​ដប The Intrepid កម្ពស់ ៥,១១ ហ្វីត (១,៥៦ ម៉ែត្រ​) ត្រូវបាន​ទិញ​ដោយ​អ្នកទិញ​អន្តរជាតិ​អនាមិក​ម្នាក់​នៅ​ឯ​ក្រុមហ៊ុន​ដេញថ្លៃ Lyon & Turnbull ដែល​មាន​មូលដ្ឋាន​នៅ​ទីក្រុង​អេឌីន​បឺក (Edinburgh) កាលពី​ថ្ងៃ​ពុធ​ទី​២៥​ឧសភា​ក្នុងតម្លៃ ១,១ លាន​ផោន (១,៣៨ លាន​ដុល្លារ​)​។​

​ចំណាប់​អារម្មណ៍​សម្រាប់​ស្រា​វី​ស្គី ដែល​គ្រប់គ្រាន់​សម្រាប់​បំពេញ​ដប​ស្តង់ដារ​ចំនួន ៤៤៤ ដប គឺ​មកពី​ជុំវិញ​ពិភពលោក ដោយ​អ្នកទិញ​អនាមិក​រូបនោះ​អាច​ដណ្តើម​យក​វា​បាន​សម្រាប់​តម្លៃ​សមមូល ៩២ ផោន​ក្នុង​មួយ​ដប​តូច​។​

​គំនិត​នៅ​ពីក្រោយ​ការដាក់​លក់​ដេញថ្លៃ​ស្រា Intrepid គឺ​កើត​ចេញពី​លោក ដា​នី​ញែល ម៉ាំង (Daniel Monk) នៃ​ក្រុមហ៊ុន Fah Mai និង​ក្រុមហ៊ុន Rosewin Holdings ដែល​និយាយថា “​គំនិត​នេះ​តែង​សំខាន់​លើស​ពី​លុយ​ទៅទៀត​”​។​

​លោក​ម៉ាំង​និយាយថា “​នេះ​គឺជា​គម្រោង​ការ​ចេញ​ពី​ចំណង់​ដើម្បី​អបអរសាទរ​ជីវិត​របស់​ឪពុក​ស្លាប់​ទៅ​របស់​ខ្ញុំ​គឺ កា​ពី​ទែន ស្តេន​លី ម៉ាំង (Captain Stanley Monk) ដែល​ខ្លួន​គាត់​ជា​អ្នករុករក​និង​សម្រេចបាន​នូវ​រឿង​អស្ចារ្យ​ជាច្រើន​ក្នុង​ជីវិត​របស់​គាត់​”​។​

“​ថ្ងៃនេះ​គឺជា​ថ្ងៃ​ខួបកំណើត​របស់គាត់ ដូច្នេះ​វា​ជា​កាលបរិច្ឆេទ​ដ៏​ល្អឥតខ្ចោះ​ក្នុង​ការដាក់​ស្រា The Intrepid សម្រាប់​ការដេញថ្លៃ​”៕

​ស្រា The Intrepid លក់បាន ១,៣៨ លាន​ដុល្លារ​នៅ​ស្កុត​ឡែន