ប្រែ​សម្រួលៈ​បំណង​(​ដេល្លី​ម៉េល​)៖ រដ្ឋាភិបាល​វិមាន​ក្រឹម​ឡាំង​បាន​និយាយ​កាលពី​ថ្ងៃ​ព្រហស្បតិ៍​ថា ខ្លួន​រំពឹង​ថា​រដ្ឋាភិបាល​ទីក្រុង​គៀវ​នឹង​បំពេញ​តាម​ការទាមទារ​របស់​ខ្លួន​នៅ​កិច្ចពិភាក្សា​ស្វែងរក​សន្តិភាព ។​

​អ្នកនាំពាក្យ​វិមាន​ក្រឹម​ឡាំង​លោក ឌី​មី​ទ្រី ប៉េ​ស្កូវ​(Dmitry Peskov)​បាន​ប្រតិកម្ម​នឹង​សម្តី​របស់​អតីតរដ្ឋមន្ត្រី​ការបរទេស​អាម៉េរិក ហេន​រី ឃី​ស​ស៊ី​ង​ហ្គឺ (Henry Kissinger)​ដែល​នៅ​សប្តាហ៍​នេះ​​បាន​លើកឡើង​នៅ​វេទិកា​សេដ្ឋកិច្ច​ពិភពលោក​ក្រិង​ដា​វ៉ូស​ថា អ៊ុយ​ក្រែ​នគួរ​អនុញ្ញាត​អោយ​រុស្ស៊ី​គ្រប់គ្រង​តំបន់​គ្រី​ម៉េ​។​

​រដ្ឋាភិបាល​ទីក្រុង​មូ​ស្គូ កំពុង​ទាមទារ​អោយ​អ៊ុយ​ក្រែន​ទទួលស្គាល់គ្រី​ម៉េ ជា​ទឹកដី​រុស្ស៊ី និង​ទទួលស្គាល់​ផ្នែក​បំបែក​ខ្លួន​នៅ​ភាគ​ខាងកើត​ប្រទេស​ជា​រដ្ឋ​ឯករាជ្យ​ពីរ តែ​អ៊ុយ​ក្រែន​បាន​បដិសេធ​ដាច់ខាត​មិន​​ព្រម​កាត់​ទឹកដី​ខ្លួន​អោយ​រុស្ស៊ី​និង​ក្រុម​ផ្តាច់​ទឹកដី​ដែល​រុស្ស៊ី​គាំទ្រ​ទេ​។​

​ប្រធានាធិបតី វ៉ូ​ឡូ​ឌី​មៀ ហ្សេ​លេន​ស្គី​បាន​រិះគន់​បទ​វិចារណកថា​របស់​កាសែត New York Times​នា​ពេល​ថ្មីៗ​នេះ​និង​សេចក្តីថ្លែងការណ៍​ស្រដៀង​គ្នា​ផ្សេងទៀត​ដោយ​ឥស្សរជន​លោកខាងលិច​ដ៏​មាន​ឥទ្ធិពល​ជាច្រើន​រូប​ដែល​លើកឡើងថា អ៊ុយ​ក្រែន​ប្រហែលជា​ត្រូវ​លះបង់​ទឹកដី​ខ្លះទៅ​ដើម្បី​បញ្ចប់​ជម្លោះ​។​

​ក្នុងពេល​ជាមួយគ្នា មាន​សេចក្តីរាយការណ៍​ថា កងកម្លាំង​រុស្ស៊ី​កំពុង​បាញ់​ផ្លោង​ដាក់​ទីប្រជុំជន​ជាង​៤០​នៅ​តំបន់​ដុន​បាស់ ដើម្បី​ចាប់​យក​ភាគ​ខាងកើត​អ៊ុ​យក្រែន​។​

​រុស្ស៊ី​កំពុង​បញ្ជូនទាហាន​រាប់ពាន់នាក់​ចូល​ក្នុង​តំបន់​នេះ ដោយ​វាយប្រហារ​ពី​បី​ទិស​ក្នុង​គោលបំណង​ឡោមព័ទ្ធ​កងកម្លាំង​អ៊ុយ​ក្រែន​នៅក្នុង​ទីក្រុង ស៊ី​វី​រ៉ូ​ដូណិត​ស​ខ៍​(Sievierodonetsk)​និង​ទីក្រុង​​លី​ស៊ី​ចាន់​ស​ខ៍​(Lysychansk)​។ បើ​ទីក្រុង​ទាំងពីរ​នេះ​ធ្លាក់​ក្នុង​ដៃ​រុស្ស៊ី នោះ​ខេត្ត​លុន​ហា​ន់ស​ខ៍ទាំង​មូលនឹង​ស្ថិត​ក្រោម​ការគ្រប់គ្រងរ​បស់​រុស្ស៊ី ៕

​អ៊ុយ​ក្រែន​អះអាងថា ទីក្រុង​ទីប្រជុំជន​ជាង​៤០​ស្ថិតក្រោម​ការបាញ់​ផ្លោង​សន្ធាប់​ពី​កងកម្លាំង​រុស្ស៊ី​