ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ សេត​វិមាន​បាន​និយាយ​នៅក្នុង​សេចក្តីថ្លែងការណ៍​មួយ​កាលពី​ថ្ងៃ​ព្រហស្បតិ៍​ទី​២៦​ឧសភា​ថា កំពូល​ក្រុម​ចម្រៀង K-pop គឺ BTS​នឹង​ធ្វើ​ដំណើរ​ទៅកាន់​​សេត​វិមាន​នៅ​សប្តាហ៍​ក្រោយ​ដើម្បី​ដោះស្រាយ​បទល្មើស​សម្អប់​លើ​ជនជាតិ​អាស៊ី​និង​ប្រជាជន​ដែល​មាន​ដើមកំណើត​អាស៊ី​ជាមួយ​ប្រធានាធិបតី​អាម៉េរិក​ចូ បៃ​ដិន​។​

​សេត​វិមាន​និយាយថា លោកបៃ​ដិ​ននឹង​ស្វាគមន៍​ក្រុមត​ន្ត្រី​ល្បី​ជា​សកល​នេះ​នៅ​ថ្ងៃ​អង្គារ​សប្តាហ៍​ក្រោយ ហើយ​នឹង “​ពិភាក្សា​អំពី​ការរួម​បញ្ចូល​និង​ការ​តំណាង​របស់​អាស៊ី​និង​ដើម្បី​ដោះស្រាយ​បទល្មើស​​សម្អប់​និង​ការរើសអើង​ប្រឆាំង​ជនជាតិ​អាស៊ី ដែល​បាន​ក្លាយជា​បញ្ហា​កាន់តែ​លេចធ្លោ​ក្នុង​ប៉ុន្មាន​ឆ្នាំ​ថ្មីៗ​នេះ​”​។​

​សមាជិក​ទាំង​ប្រាំ​ពីរ​នាក់​នៃ​ក្រុម​ចម្រៀង​បុរស​កូរ៉េ​ខាងត្បូង​នេះ​ត្រូវ​គេ​ស្គាល់​សម្រាប់​បទ​ចម្រៀង​និង​ការ​រាំ​ដ៏​រស់​រវើក​របស់​ពួកគេ ហើយ​បាន​បង្កើត​មូលដ្ឋាន​អ្នកគាំទ្រ​ទូទាំង​ពិភពលោក​ដ៏​ស្មោះត្រង់​ដោយ​​បានឈ្នះ​ពានរង្វាន់ IFPI Global Recording Artist of the Year ក្នុង​ខែកុម្ភៈ ក្នុង​រយៈពេល​ពីរ​ឆ្នាំ​ជាប់​គ្នា​។​

​ការជួប​គ្នា​នេះ​កើតឡើង​ខណៈខែ​នៃ​ការទទួលស្គាល់​ជនជាតិដើម​អាស៊ី​និង​ជនជាតិដើម​កោះ​ហា​វ៉ៃ​/​ប៉ាស៊ីហ្វិក (AANHPI) ក្នុង​ខែឧសភា​នេះ​បាន​ឈាន​ដល់​ទីបញ្ចប់​ចំពេល​មាន​ការកើនឡើង​យ៉ាង​ខ្លាំង​​នៃ​បទល្មើស​ស្អប់ខ្ពើម​ប្រឆាំងនឹង​ជនជាតិ​អាម៉េរិក​ដើមកំណើត​អាស៊ី​ក្នុង​ឆ្នាំ​កន្លង​ទៅ​។​

​ការវាយប្រហារ​ប្រឆាំងនឹង​ប្រជាជន​ដែល​មាន​ដើមកំណើត​អាស៊ី​បាន​កើនឡើង ខណៈ​អ្នកនយោបាយ​និង​អ្នកវិភាគ​មួយចំនួន​បាន​លើកទឹកចិត្ត​ជនជាតិ​អាម៉េរិក​ឱ្យ​ស្តីបន្ទោស​ចិន​ចំពោះកូ​វីដ​១៩ ចំ​ពេល​មាន​ភាព​តានតឹង​ផ្សេងៗ​ទៀត​។​

​ថ្មីៗ​ក្នុង​ខែ​នេះ បុរស​ម្នាក់​ត្រូវបាន​ចោទប្រកាន់​ពីបទ​បាញ់​សម្លាប់​ស្ត្រី​ជនជាតិ​អាស៊ី​បី​នាក់​នៅក្នុង​ហាង​អ៊ុតសក់​ក្នុង​ទីក្រុង​ដាល់​ឡាស​។​

​អាជ្ញាធរ​កំពុង​ស៊ើបអង្កេត​ឧបទ្ទវហេតុ​នេះ​ដែល​សង្ស័យ​ជា​បទល្មើស​សម្អប់​ជនជាតិ​អាស៊ី​៕

ក្រុម BTS នឹង​ជួប​លោកបៃ​ដិន​នៅ​សេត​វិ​មាននៅ​ថ្ងៃ​អង្គារ​សប្តាហ៍​ក្រោយ​