ភ្នំពេញៈ អ្នកនាំពាក្យ​គណៈកម្មាធិការ​ជាតិ​រៀបចំ​ការបោះឆ្នោត(គ.ជ.ប)បាន​និយាយថា ចាប់ពី​ថ្ងៃ​បើក​យុទ្ធនាការ​ឃោសនាបោះឆ្នោត​ជ្រើស​ជ្រើសរើស​ក្រុមប្រឹក្សា​អាណត្តិ​ទី​៥ ​ចាប់ពី​ថ្ងៃទី​២១-២៦ខែឧសភានេះ មាន​ពាក្យបណ្ដឹង​ចំនួន ៣៣ ហើយ​ត្រូវបាន​គណៈកម្មការ​ឃុំ សង្កាត់​រៀបចំ​ការបោះឆ្នោតបាន​ដោះស្រាយ និងកំពុងធ្វើការដោះស្រាយពាក្យបណ្តឹងទាំងនោះទៅតាមនីតិវិធី។ការបញ្ជាក់នេះក្នុងពិធីប្រជុំផ្សព្វផ្សាយជាមួយភាគីពាក់ព័ន្ធស្តីពីសភាពការណ៍ទូទៅជុំវិញដំណើរការនៃការឃោសនាបោះឆ្នោត​ជ្រើសរើស​ក្រុមប្រឹក្សាឃុំ សង្កាត់អាណត្តិ​ទី​៥ ឆ្នាំ​២០២២ នៅ​ថ្ងៃទី​២៧ ខែឧសភាឆ្នាំ​២០២២​។​

​លោក ហង្ស ពុទ្ធាអ្នកនាំពាក្យ គ​.​ជ​.​ប បានប្រាប់អ្នកចូលរួម​ថា ពាក្យបណ្តឹង​ភាគច្រើន គឺជា​ពាក្យបណ្តឹង​របស់​តំណាងគណបក្ស​ប្រជាជន​កម្ពុជា ប្តឹង​តំណាង​គណបក្ស​ភ្លើងទៀន​ថា​ បាន​ប្រើពាក្យ​ប្រមាថមាក់ងាយ​ទៅលើ​បេក្ខជន​គណបក្ស​ប្រជាជន​កម្ពុជា ក្នុង​សកម្មភាព​ឃោសនាបោះឆ្នោត​របស់ខ្លួន ដែល​ផ្ទុយ​គោលការណ៍​ទូទៅ​សម្រាប់​ការឃោសនាបោះឆ្នោតដែល​កំណត់​ក្នុង​ច្បាប់ និង​បទបញ្ជានិង​នីតិវិធី​សម្រាប់​ការបោះឆ្នោត​ជ្រើសរើស​ក្រុមប្រឹក្សាឃុំ សង្កាត់​។ រាល់​ដំណើរការ​រៀបចំ​ការបោះ​ឆ្នោត គ​.​ជ​.​ប តែងតែ​ទទួលបាន​ពាក្យបណ្តឹង ហើយ​ទោះបី​ពាក្យបណ្តឹង​មាន​តិច ឬ​ច្រើន ក៏​បណ្តឹង​នោះ​វា​មិន​ធ្វើឱ្យ​រាំងស្ទះ និង​ជះឥទ្ធិពល​ដល់​ការបោះឆ្នោត​ទេ​។​
​គួរបញ្ជាក់ថា ការបោះឆ្នោត​ជ្រើសរើស​ក្រុមប្រឹក្សាឃុំ សង្កាត់ អាណត្តិ​ទី​៥ ឆ្នាំ​២០២២ នេះការឃោសនា បោះឆ្នោត​មាន​រយៈពេល ១៤​ថ្ងៃ គឺ​ចាប់ផ្តើម​ពីថ្ងៃ​ទី​២១ ខែឧសភា ដល់​ថ្ងៃទី​៣ ខែមិថុនា។ថ្ងៃទី ៥ ខែមិថុនា
ជាថ្ងៃបោះឆ្នោត៕សរន