​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អ៊ុយ​ក្រែន​បាន​និយាយ​កាលពី​ថ្ងៃ​សុក្រ​ទី​២៧​ឧសភា​ថា​កងកម្លាំង​របស់​ខ្លួន​ប្រហែលជា​ត្រូវ​ដកថយ​ពី​ការតស៊ូ​មួយ​ក្តាប់​តូច​ចុងក្រោយ​នៅ​តំបន់​លូ​ហា​នស៍​​ដើម្បី​ចៀសវាង​ការ​ត្រូវ​ចាប់ខ្លួន​ដោយ​ទាហាន​រុស្ស៊ី​ដែល​បន្ត​រុលទៅមុខ​នៅ​ភាគ​ខាងកើត​។​

​ការដកថយ​នេះ​អាច​នាំ​ឱ្យ​ប្រធានាធិបតី​រុស្ស៊ី​លោក វ្ល៉ា​ឌី​មៀ ពូ​ទីន ខិត​ទៅជិត​គោលដៅ​របស់​គាត់​ក្នុង​ការដណ្តើមយក​តំបន់​លូ​ហានស៍​និង​ដូណិត​ស៍រប​ស់អ៊ុយ​ក្រែន​ពេញលេញ​។​កងទ័ព​របស់​ពូ​ទីន​ចាប់​​ផ្តើម​មាន​ប្រៀប​ឈ្នះ​នៅក្នុង​តំបន់​ទាំងពីរ ដែល​មាន​ឈ្មោះ​រួមគ្នា​ថា ដុន​បាស ខណៈ​បំផ្ទុះ​ទីប្រជុំជន​មួយចំនួន​រាប​ដល់​ដី​។​

​អភិបាល​តំបន់​លូ​ហាន​ស៍លោក សឺ​ស៊ី ហ្គា​ដាយ (Serhiy Gaidai)​បាន​និយាយថា ទាហាន​រុស្ស៊ី​បាន​ចូល​ទៅក្នុង​ទីក្រុង​ស៊ី​វី​រ៉ូ​ដូណិត​ស៍ (Sievierodonetsk)​ដែល​ជា​ទីក្រុង​ធំ​បំផុត​នៃ​តំបន់​​ដុន​បាស​ដែល​នៅ​កំពុង​កាន់កាប់​ដោយ​អ៊ុយ​ក្រែន​នៅឡើយ បន្ទាប់​ពី​ព្យាយាម​ដាក់​អន្ទាក់​កងកម្លាំង​អ៊ុយ​ក្រែន​នៅ​ទីនោះ​ជា​ច្រើន​ថ្ងៃ​។ លោក​ហ្គាយ​ដាយនិយាយ​ថា​អគារ​៩០​ភាគរយ​នៅក្នុង​ទីក្រុង​​ត្រូវបាន​បំផ្លាញ​។​

​ដោយ​សំដៅ​ទៅលើ​ទីក្រុង​ស៊ី​វី​រ៉ូ​ដូណិត​ស៍​និង​ទីក្រុង​ភ្លោះ​របស់​ខ្លួន​ឈ្មោះ​ថា លី​ស៊ី​ចាន់ស៍ (Lysychansk)​នៅ​ត្រើយម្ខាង​នៃ​ទន្លេ​ស៊ីវើ​ស្គី​ដូណិត​ស៍ (Siverskiy Donets)​លោក​ហ្គាយ​ដាយ​បាននិ​​យាយ​នៅលើ Telegram​ថា “​រុស្ស៊ី​នឹង​មិន​អាច​ដណ្តើមបាន​តំបន់​លូ​ហានស៍​ក្នុង​រយៈពេល​ប៉ុន្មាន​ថ្ងៃ​ខាងមុខនេះ ដូច​ដែល​អ្នកវិភាគ​បាន​ព្យាករណ៍​នោះទេ​”​។​

“​យើង​នឹង​មាន​កម្លាំង​និង​ធនធាន​គ្រប់គ្រាន់​ដើម្បី​ការពារ​ខ្លួន​។ ទោះយ៉ាងណា វា​អាច​ទៅរួច​ដែល​ថា​ដើម្បី​កុំឱ្យ​គេ​ឡោមព័ទ្ធ​ជិត យើង​ត្រូវតែ​ដកថយ​”​។​

​ក្រុម​ប្រុក​ស៊ី​ផ្តាច់ខ្លួន​របស់​ទីក្រុង​មូ​ស្គូបា​ននិយាយថា ឥឡូវ​នេះ​ពួកគេ​បាន​គ្រប់គ្រង​ទីក្រុង​លី​ម៉ាន់ (Lyman)​ដែល​ជា​មជ្ឈមណ្ឌល​ផ្លូវដែក​នៅ​ភាគ​ខាងលិច​នៃ​ទីក្រុង​ស៊ី​វី​រ៉ូ​ដូណិត​ស៍​។ អ៊ុយ​ក្រែ​ននិយាយថា រុស្ស៊ី​បាន​ដណ្តើម​កាន់កាប់​ផ្នែក​ភាគច្រើន​នៃ​ទីក្រុង​លី​ម៉ាន់ ប៉ុន្តែ​កងកម្លាំង​របស់​ខ្លួន​កំពុង​រារាំង​ការ​រុលទៅមុខ​ឆ្ពោះទៅ​កាន់​ទីក្រុង​ស្លូវី​យ៉ានស៍ (Sloviansk)​ដែល​ធ្វើដំណើរ​កន្លះ​ម៉ោង​នៅ​ចុង​ភាគ​​និរតី​។​

​ប្រធានាធិបតី​វ៉ូ​ឡូ​ឌី​មៀ ហ្សេ​លេន​ស្គី​បាន​និយាយថា អ៊ុយ​ក្រែន​កំពុង​ការពារ​ទឹកដី​របស់​ខ្លួន “​ឱ្យបាន​ច្រើន​តាម​ដែល​ធនធាន​ការពារ​បច្ចុប្បន្ន​របស់​យើង​អនុញ្ញាត​” ។ យោធា​អ៊ុយ​ក្រែន​បាន​និយាយថា ខ្លួន​បាន​ទប់ទល់​នឹង​ការវាយប្រហារ​ចំនួន​ប្រាំបី​នៅ​ដូណិត​ស៍​និង​លូ​ហានស៍​កាលពី​ថ្ងៃ​សុក្រ ដោយ​បំផ្លាញ​រថក្រោះ​និង​រថពាសដែក​ជាច្រើន​គ្រឿង​។​

​លោក​ហ្សេ​លេន​ស្គី​និយាយ​នៅក្នុង​សុន្ទរកថា​មួយ​ថា “​ប្រសិនបើ​ពួក​ឈ្លានពាន​គិតថា​ទីក្រុង​លី​ម៉ាន់​និង​ទីក្រុង​ស៊ី​វី​រ៉ូដូ​ណិ​តស៍នឹង​ក្លាយជា​របស់​ពួកគេ ពួកគេ​យល់​ខុស​ហើយ​។ ដុន​បា​សនឹង​ក្លាយជា​របស់​អ៊ុ​យក្រែន​”៕

​ទាហាន​អ៊ុយ​ក្រែន​នៅតំបន់​ដុន​បាស​ប្រឈមឡោម​ព័ទ្ធ​ទាន់​ពីរុស្ស៊ី