បញ្ជូន​ខ្លួន​អ្នកជំនួញ ជា​ជន​ជាតិចិន​ម្នាក់ ទៅកាន់​តុលាការ ពាក់ព័ន្ធ​ពីបទ​ធ្វើ ឲ្យ​ខូចខាត ដោយ​ចេតនា និង​បទ រំលោភ​លើ​ទំនុកចិត្ត​

ដោយៈ​អង្គា​រ៍​ហេង / ភ្នំពេញៈ បុរស​អ្នកជំនួញ ជា​ជន​ជាតិចិន​ម្នាក់ ត្រូវបាន​កម្លាំង សមត្ថកិច្ច កង​រាជ​អាវុធ រាជធានី​ភ្នំពេញ នាំខ្លួន​តាម​ដីកា​បញ្ជា​ឲ្យ​ចូលខ្លួន របស់​ស្ថាប័ន​អយ្យការ អម​សាលាដំបូង រាជធានី​ភ្នំពេញ ពាក់ព័ន្ធ​ពីបទ ធ្វើ​ឲ្យ​ខូចខាត ដោយ​ចេតនា និង​បទ រំលោភ​លើ​ទំនុកចិត្ត លើ​អ្នកដទៃ ប្រព្រឹត្ត​នៅ​រាជធានី​ភ្នំពេញ​។​

​បុរស​អ្នកជំនួញ ជា​ជន​ជាតិចិន​ម្នាក់​នោះ ឈ្មោះ CHEN HSIN HUNG អាយុ ៣០ ឆ្នាំ ស្នាក់​នៅផ្ទះ លេខ​៤៤ ផ្លូវ​៥៧ កែង​ផ្លូវ​លេខ​៣៣៤ សង្កាត់​បឹង​កេងកង ១ ខណ្ឌ​បឹង​កេងកង រាជធានី​ភ្នំពេញ ។

​ជនសង្ស័យ ត្រូវបាន​កម្លាំង​សមត្ថកិច្ច កងរាជអាវុធហត្ថ ឃាត់ខ្លួន​បញ្ជូនទៅ កាន់​សាលាដំបូង រាជធានី​ភ្នំពេញ នា​រសៀល ថ្ងៃទី​២៧ ខែឧសភា ឆ្នាំ​២០២២ ដែល​ការនាំ​ខ្លួន​នោះ គឺធ្វើឡើង តាម​ដីកា​បញ្ជា​ឲ្យ​ចូលខ្លួន របស់លោក ម៉ុ​ត ដា​រ៉ា ព្រះរាជអាជ្ញារង នៃ​អយ្យការ​អម​សាលាដំបូង រាជធានី​ភ្នំពេញ ។​

​ជនសង្ស័យ បាននិងកំពុង​ស្ថិតនៅ​ដំណាក់​ការ​ស៊ើបសួរ របស់​តំណាង​អយ្យការ នៅឡើយ​ទេ ដោយ​វេលា​ល្ងាច​ផុត​ម៉ោង​រដ្ឋបាល ទើប​ជនសង្ស័យ ត្រូវបាន​ផ្ញើ ទៅ​សមត្ថកិច្ច​វិញ និង តម្រូវ​ឲ្យ​នាំទៅ​សាកសួរ នៅ​ព្រឹក​ថ្ងៃទី​២៨ ខែឧសភា បន្តទៀត​៕/V​-PC