​ដោយៈ សម្បត្តិ / ភ្នំពេញ​៖ នៅ​ស្នងការដ្ឋាន​គរ​បាល​រាជធានី​ភ្នំពេញ នា​ព្រឹក ថ្ងៃទី​២៧ ខែឧសភា ឆ្នាំ​២០២២ បានរៀបចំ​ពិធី​បូកសរុប​លទ្ធផល​កម្មសិក្សា បញ្ចប់​វគ្គ និង​ប្រគល់​សញ្ញាបត្រ ជូន​មន្ត្រី​នគរបាលជាតិ​កម្ពុ​ជា ចំនួន ៤៤ នាក់ ក្នុងនោះ​មាន​ស្រី ២ នាក់ ដែល​សិក្ខាកាម​នគរបាលជាតិ​ទាំងនេះ ទើបបាន បញ្ចប់​ការសិក្សា​រៀនសូត្រ វគ្គ​បណ្តុះបណ្តាល​ជំនាញ​ជាន់ខ្ពស់ និង​ថ្នាក់ មធ្យម​ជំនាញ ស៊ើបការណ៍​ខាងក្រៅ និង​វគ្គ​ថ្នាក់​មធ្យម​ជំនាញ​សន្តិសុខ នៅ​សាលា​ជាន់ខ្ពស់​សន្តិសុខ ប្រជាជន​១ នៃ​សាធារណរដ្ឋ​សង្គមនិយម វៀតណាម​។ ពិធី​នេះ ប្រព្រឹត្តទៅ ក្រោម​អធិបតីភាព​លោក ឧ​ត្ត​ម​សេនីយ៍​ឯក ស ថេត អគ្គ​ស្នងការរង​នគរបាលជាតិ និង​ជា​ស្នងការ​នគរបាល​រាជធានី​ភ្នំពេញ និង​លោក​វរសេនីយ៍ឯក ចឹ​ង វ៉ាន់​ទាន់ នាយក​សាលា​ជាន់ខ្ពស់​សន្តិសុខ ប្រជាជន​១ ។​

​នៅក្នុង​ឱកាស​នោះ លោក​ឧ​ត្ត​ម​សេនីយ៍​ឯក ស ថេត បាន​មានប្រសាសន៍ ស្វាគមន៍ ក្នុងនាម​ថ្នាក់ដឹកនាំ ក្រសួងមហាផ្ទៃ និង​អគ្គស្នងការដ្ឋាន​នគរ​បាល​ជាតិ ចំពោះ​ប្រតិភូ​ដឹកនាំ ដោយ​នាយក​សាលា​ជាន់ខ្ពស់​សន្តិសុខ ប្រជាជន​១ ដែលជា​តំណាង នៃ​ក្រសួង​នគរបាល វៀតណាម ដែល​បាន​ចំណាយ​ពេលវេលា ដ៏​មានតម្លៃ​ចូលរួម ក្នុង​កិច្ចប្រជុំ​បញ្ចប់​វគ្គ​សិក្សា និង​ប្រគល់​សញ្ញាបត្រ​ជូន សិក្ខាកាម​នគរបាលជាតិ​កម្ពុជា ចំនួន ៤៤ នាក់ ដែល​បានបញ្ចប់ វគ្គ​សិក្សា បណ្តុះបណ្តាល​ជំនាញ ជាន់ខ្ពស់ និង​ថ្នាក់​មធ្យម ជំនាញ​ស៊ើបការណ៍​ខាងក្រៅ និង​វគ្គ​បណ្តុះបណ្តាល​ថ្នាក់​មធ្យម ជំនាញ​សន្តិសុខ ប្រកបដោយ​ជោគជ័យ នាពេលនេះ ហើយ​ក៏បាន​វាយតម្លៃ​ខ្ពស់ និង​ចូលរួម​អបអរសាទរ ជាមួយ​សិក្ខា កាម​នគរបាលជាតិ​ក​ម្ពុ​ជា ទាំង​៤៤​រូប ដែល​បាន​ខិតខំ​ប្រឹងប្រែង​រៀនសូត្រ ទទួលបាន​ចំណេះ​ជំនាញ ពិតប្រាកដ ពី​សាលា​ជាន់ខ្ពស់​សន្តិសុខ​ប្រជាជន​១ នៃ​ប្រទេស​វៀតណាម ដើម្បី​យកចំណេះ​ជំនាញ​ទាំងនេះ មក​បំរើ​ការងារ ជូន​ប្រទេសជាតិ​។​

​លោក​អគ្គ​ស្នងការរង នគរបាលជាតិ និង​ជា​ស្នងការ​នគរបាល​រាជធានី​ភ្នំពេញ ក៏បាន​លើកឡើង ទៀតថាៈ សិក្ខាកាម​មន្ត្រីនគរបាល ទើបតែ​បញ្ចប់​ការសិក្សា ដើម្បី​ជាការ​លើកទឹកចិត្ត អង្គភាព នឹង​រៀបចំ​គោលការណ៍ ស្នើសុំ​ទៅ​ថ្នាក់ដឹកនាំ អគ្គស្នងការដ្ឋាន​នគ​របាល​ជាតិ ក៏ដូចជា ក្រសួងមហាផ្ទៃ ដើម្បី​ធ្វើការ​តំឡើង ឋានន្តរសក្តិ​មួយ​ថ្នាក់ ចំណែក​សិក្ខាកាម ដែល​បាន​រៀនសូត្រ ទទួលបាន លទ្ធផល​និទ្ទេស​ល្អ អង្គភាព ពិចារណា​ស្នើសុំ​តែងតាំង​មុខតំណែង​។​

​លោក​ឧ​ត្ត​ម​សេនីយ៍​ឯក ស ថេត ក៏បាន​សំណូមពរ​ស្នើសុំ តាមរយៈ​លោក នាយក​សាលា​ជាន់ខ្ពស់ សន្តិសុខ​ប្រជាជន​១ វៀតណាម សូមឱ្យ​មានការ បណ្តុះបណ្តាល វគ្គ​ជំនាញ​ខាងលើ ជូន​ដល់​មន្ត្រីនគរបាល​រាជធានី​ភ្នំពេញ នៅ​រាជធានី​ភ្នំពេញ ដើម្បី​មន្ត្រីនគរបាល​រាជធានី​ភ្នំពេញ ទទួលបាន​ចំណេះដឹង លើ​ការងារ​ជំនាញ​ទាំងនេះ ឱ្យមាន​សមត្ថភាព​ខ្ពស់​។​

​លោក​វរសេនីយ៍ឯក ចឹ​ង វ៉ាន់​ទាន់ នាយក​សាលា​ជាន់ខ្ពស់​សន្តិសុខ ប្រជាជន​១ បាន​មាន ប្រសាសន៍ថាៈ ការបណ្តុះបណ្តាល សិក្ខាកាម​នគរបាលជាតិ​កម្ពុជា គឺ​សាលា​ជាន់ខ្ពស់​សន្តិសុខ ប្រជាជន​១ នៃ​សាធារណរដ្ឋ​សង្គមនិយម​វៀតណាម អនុវត្ត​ទៅតាម​ផែនការ​កិច្ចសហប្រតិបត្តិការ បណ្តុះបណ្តាល រវាង​ក្រសួង នគរបាល​វៀតណាម និង​ក្រសួងមហាផ្ទៃ​កម្ពុជា ក្នុងនោះ​សិក្ខាកាម នគរបាលជាតិ​ម្ពុ​ជា ៤៤ នាក់ ត្រូវបាន​បណ្តុះបណ្តាល​វគ្គ​ជំនាញ​ជាន់ខ្ពស់ និង​ថ្នាក់​មធ្យម ស៊ើបការណ៍​ខាងក្រៅ និង​ថ្នាក់​មធ្យម​ជំនាញ​សន្តិសុខ ដែល​សិក្ខា​រៀនសូត្រ មាន​ចំនួន ២ វគ្គ គឺ​ថ្នាក់​ជាន់ខ្ពស់ រយៈពេល ៤ ឆ្នាំ ចំណែក​ថ្នាក់​មធ្យម​រយៈពេល ២ ឆ្នាំ​។​

​លោក​វរសេនីយ៍ឯក ចឹ​ង វ៉ាន់​ទាន់ ក៏បាន​លើកឡើង​ទៀតថាៈ នៅក្នុង​អំឡុង ការសិក្សា​រៀនសូត្រ នៅក្នុង​សាលា ពី​សំណាក់​សិក្ខាកាម នគរបាលជាតិ​កម្ពុជា គឺ​សាលា​បាន​យកចិត្តទុកដាក់ ជាទីបំផុត ដោយមាន​ការរៀប​ចំកា​រ​បង្រៀន ដោយ​គ្រូ​មានបទពិសោធន៍ មុខវិជ្ជា​ជំនាញ​ត្រឹមត្រូវ តាម​កម្មវិធីសិក្សា គួបផ្សំ​ការអញ្ជើញ​ពី​អង្គភាព​ពាក់ព័ន្ធ​មក​ចូលរួម​ធ្វើ​បាឋកថា អនុវត្ត​ដោយផ្ទាល់ ដើម្បីឱ្យ​សិក្ខាកាម ទទួលបាន​ចំណេះដឹង និង​បទពិសោធន៍​ជាក់ស្តែង លើ​ការងារ​ជំនាញ និង​ការបង្ការ​បង្ក្រាប​បទល្មើស​។​

​ចុងបញ្ចប់ លោក​វរសេនីយ៍ឯក ចឹ​ង វ៉ាន់​ទាន់ នាយក​សាលា​ជាន់ខ្ពស់​សន្តិសុខ ប្រជាជន​១ ក៏បាន​ឆ្លើយតប​ទៅនឹង​សំណូមពរ របស់លោក ឧ​ត្ត​ម​សេនីយ៍​ឯក ស ថេត ដែល​បាន​ស្នើសុំ ការបណ្តុះបណ្តាល​ល ផ្នែក​ជំនាញ​ខាងលើ គឺ​សាលា គ្រោង នឹង​ចាត់​បញ្ជូន​គ្រូ​បង្គោល មក​បង្ហាត់បង្រៀន នៅទីនេះ បើសិន​មាន ការឯកភាព ពី​ក្រសួង​នគរបាល​វៀតណាម និង​ក្រសួងមហាផ្ទៃ​កម្ពុជា​៕/V​-PC