ដោយៈ ប​.​ខុន / ភ្នំពេញៈ បរិមាណ​ទឹកភ្លៀង ធ្លាក់​លើ​គ្រប់​រាជធានី ខេត្ត រយៈពេល ២៤ ម៉ោង គិត​ត្រឹម​ព្រឹក​ថ្ងៃទី​២៨ ខែឧសភា មាន​កម្រិត​ពី​មធ្យម ទៅ​ច្រើន ដូចជា​នៅ​ខេត្តកំពត ព្រះសីហនុ និង​ខេត្តក្រចេះ មាន​ភ្លៀង​ធ្លាក់ លើសពី​កម្រិត ១០០ មី​លី​ម៉ែត្រ ជាមួយនឹង​ខ្យល់ បក់បោក​ខ្លាំង ហើយ​ការ​ធ្លាក់ភ្លៀង​បែបនេះ នៅ​បន្ត​កើតមាន​ច្រើន​ថ្ងៃ​ទៀត​។

​លោក ហេង សោ​ភ័​រិ​ទ្ធ ប្រធាន​មន្ទីរ​ធនធានទឹក​និង​ឧតុនិយម ខេត្ត​ព្រះសីហនុ បាន​ប្រាប់​ឱ្យ​រស្មី​កម្ពុជា​ដឹង នៅ​ថ្ងៃទី​២៨ ខែឧសភា ឆ្នាំ​២០២២​ថា​: ភ្លៀង​រាំងៗ នៅ​ខេត្ត​ព្រះសីហនុ ក្នុង​បរិមាណ​ច្រើន មានតែ​នៅតាម​ស្រុក ដល់​កម្រិត ១០៥ មី​លី​ម៉ែត្រ ត្រឹម​ព្រឹក​ថ្ងៃទី​២៨ ខែឧសភា នៅ​ក្រុងព្រះសីហនុ មាន​ភ្លៀង​តិច តែមាន​ភ្លៀង​បន្ត​រហូត​។ នៅលើ​ផ្ទៃសមុទ្រ មាន​ខ្យល់​ខ្លាំង ធ្វើឱ្យប៉ះពាល់​ដល់ លំនៅដ្ឋាន​ពលរដ្ឋ​មួយចំនួន​នៅ​ឃុំ​ទឹកថ្លា​។

​នៅមុន​ពេល​ភ្លៀង​ធ្លាក់ នៅលើ​ខេត្ត​ជាច្រើន កាលពី​ល្ងាច ថ្ងៃទី​២៧ ខែឧសភា នេះ មាន​ខ្យល់​បក់បោក​ខ្លាំង​បណ្តាលឱ្យ​ប៉ះពាល់​ដល់​លំនៅ ដ្ឋា​ន​របស់​ប្រជា ពលរដ្ឋ​ចំនួន​២៣ ខ្នង នៅក្នុង​ខេត្ត​ឧ​ត្ត​រ​មានជ័យ កណ្តាល និង​ខេត្តព្រៃវែង ជាមួយគ្នានេះ មាន​ដើមឈើ​ជាច្រើន​ដើម​នៅក្នុង​ក្រុងភ្នំពេញ បាន​រលំ​ដួល និង​សង្កត់​លើ​រថយន្ត​។

​ក្រសួង​ធនធានទឹក និង​ឧតុនិយម កាលពី​ថ្ងៃទី​២៤ ខែឧសភា ឆ្នាំ​២០២២ បាន​ជូនដំណឹង ស្តីពី​ស្ថានភាព​អាកាសធាតុ សម្រាប់​ពីថ្ងៃ​ទី​២៥ ដល់​ថ្ងៃទី​៣១ ខែឧសភា​ថា​: ព្រះរាជា​ណា​កម្ពុជា នៅក្នុង​សប្តាហ៍​នេះ​ទទួល​ឥទ្ធិពល​ពី ប្រព័ន្ធ​សម្ពាធ​ទាប ដែល​អូសបន្លាយ​លើ​ភាគ​ខាងជើង​ប្រទេស​ថៃ និង ឡាវ ជាមួយនឹង​ខ្យល់មូសុង​និរតី កម្រិត​មធ្យម បង្កឱ្យមាន​ភ្លៀង​ធ្លាក់​រាយប៉ាយ ក្នុង​កម្រិត​ពី​តិច​ទៅ​បង្គួរ លាយឡំ​ដោយ​ផ្គរ​រន្ទះ និង​ខ្យល់​កន្ត្រាក់​។

​ស្ថានភាព​បែប​ខាងលើ ធ្វើ​ឲ្យ​បណ្តា​ខេត្ត នៅ​តំបន់​វាលទំនាប​កណ្តាល មាន​សីតុណ្ហភាព អប្បបរមា​ពី ២៣ ទៅ ២៥ អង្សា និង សីតុណ្ហភាព អតិបរមា មាន​ពី ៣៣ ទៅ ៣៥ អង្សា​សេ​។ បណ្តា​រាជធានី ខេត្ត​នានា អាចមាន​ភ្លៀង​ធ្លាក់ រាយប៉ាយ ក្នុង​កម្រិត​ពី​តិច​ទៅ​បង្គួរ និង​លាយឡំ​ទៅដោយ​ផ្គរ រន្ទះ និង​ខ្យល់ កន្ត្រាក់​។​

​សម្រាប់​បណ្តា​ខេត្ត​ជាប់​ជួរ​ភ្នំ​ដងរែក និង​ខ្ពង់រាប​ភាគ​ឦសាន មាន​សីតុណ្ហភាព អប្បបរមា​ពី ២៣ ទៅ ២៥ អង្សា​សេ និង​សីតុណ្ហភាព អតិបរមា មាន​ពី ៣២ ទៅ ៣៤ អង្សា​សេ​។ អាចមាន​ភ្លៀង នៅក្នុង​កម្រិត​ពី​តិច​ទៅ​បង្គួរ លាយឡំ​ទៅដោយ ផ្គរ រន្ទះ​និង​ខ្យល់​កន្ត្រាក់​។​

​នៅ​តំបន់​មាត់សមុទ្រ មាន​សីតុណ្ហភាព អប្បបរមា​ពី ២៤ ទៅ ២៦ អង្សា​សេ និង សីតុណ្ហភាព អតិបរមា មាន​ពី ៣១ ទៅ ៣៣ អង្សា​សេ​។ អាចមាន​ភ្លៀង​ធ្លាក់ ក្នុង កម្រិត​ពី​មធ្យម​ទៅ​ច្រើន លាយឡំ​ទៅដោយ​ផ្គរ រន្ទះ និង​ខ្យល់​កន្ត្រាក់​។ នៅលើ​ផ្ទៃសមុទ្រ នឹង​អាចមាន​ភ្លៀង ខ្យល់​ខ្លាំង និង​រលក​សមុទ្រ​ខ្ពស់ៗ ចាប់ពី​ថ្ងៃទី​២៦ ទៅ ២៩ ខែឧសភា ។

​របាយ​ទឹកភ្លៀង​ដែល​បាន​ធ្លាក់ រយៈពេល ២៤ ម៉ោង ត្រឹម​ព្រឹក​ថ្ងៃទី​២៨ ខែឧសភា នៅ​រាជធានី​ភ្នំពេញ​មាន កម្រិត​ពី​តិច ១៥ ដល់ ៥៣ មី​លី​ម៉ែត្រ​, ខេត្តកោះកុង​មាន កម្រិត​ពី តិច​ដល់ ៤៩ មី​លី​ម៉ែត្រ​, ខេត្តកំពង់ធំ​មាន​កម្រិត​ពី​តិច​ដល់ ៤៨ មី​លី​ម៉ែត្រ​, ខេត្តក្រចេះ​មាន​កម្រិត​ពី ២១ ដល់ ១២០ មី​លី​ម៉ែត្រ​, ខេត្តស្ទឹងត្រែង មាន​កម្រិត​ពី ៨ ដល់ ៥៨ មី​លី​មី​ម៉ែត្រ​, ខេត្តសៀមរាប មាន​កម្រិត​ពី ១២ ដល់ ៤៣ មី​លី​ម៉ែត្រ​, ខេត្តរតនគិរី មាន​កម្រិត​ពី ៤ ដល់ ៤៩ មី​លី​ម៉ែត្រ​, ខេត្តកំពង់ឆ្នាំង មាន​កម្រិត​ពី ៣ ដល់ ៤៥ មី​លី​ម៉ែត្រ​, ខេត្តកណ្តាល មាន​កម្រិត​ពី ៣ ដល់ ៨០ មី​លី​ម៉ែត្រ​, ខេត្តស្វាយរៀង មាន​កម្រិត​ពី ១៣ ដល់ ៥៤ មី​លី​ម៉ែត្រ​, ខេត្ត​ព្រះសីហនុ មាន​កម្រិត​ពី​តិច ដល់ ១០៥ មី​លី​ម៉ែត្រ​, ខេត្តបាត់ដំបង មាន​កម្រិត​ពី​តិច ដល់ ១២ មី​លី​ម៉ែត្រ​, ខេត្តមណ្ឌលគិរី មាន​កម្រិត​ពី ១០ ដល់ ២៦ មី​លី​ម៉ែត្រ​, ខេត្តព្រៃវែង មាន​កម្រិត​ពី ១៣ ដល់ ៧៣ មី​លី​ម៉ែត្រ​, ខេត្តបន្ទាយមានជ័យ មាន​កម្រិត​ពី តិច​ដល់ ២១ មី​លី​ម៉ែត្រ​, ខេត្តកំពង់ស្ពឺ មាន​កម្រិត ពី​តិច​ដល់ ១៤ មី​លី​ម៉ែត្រ​, ខេត្តពោធិសាត់ មាន​កម្រិត​ពី​តិច​ដល់ ១៨ មី​លី​ម៉ែត្រ​, ខេត្តកំពត មាន​ភ្លៀង កម្រិត​ពី​តិច​ដល់ ១២២ មី​លី​ម៉ែត្រ​, ខេត្ត​កែប មាន​កម្រិត​ពី ១២ ដល់ ៣២ មី​លី​ម៉ែត្រ​, ខេត្ត​ត្បូងឃ្មុំ មាន​ភ្លៀង​កម្រិត​ពី ២៤ ដល់ ៧៦ មី​លី​ម៉ែត្រ​, ខេត្តតាកែវ មាន​ភ្លៀង​កម្រិត​ពី ១៦ ដល់ ២១ មី​លី​ម៉ែត្រ​, ខេត្ត​ឧ​ត្ត​រ​មានជ័យ មាន​ភ្លៀង កម្រិត​ពី​តិច​ដល់ ៥៧ មី​លី​ម៉ែត្រ និង​ខេត្តកំពង់ចាម មាន​ភ្លៀង​កម្រិត​ពី ១៤ ដល់ ៩៩ មី​លី​ម៉ែត្រ​៕/V​-PC