​ប្រែ​សម្រួល : កញ្ញា​ដា​លី​ស (VNExpress) ៖ ខណៈ​ក្រុមហ៊ុន Dyson ល្បី​បំផុត​ខាង​ផលិត​ម៉ាស៊ីន​បូម​ធូលី​និង​ម៉ាស៊ីន​សម្ងួ​តសក់ ក្រុមហ៊ុន​បច្ចេកវិជ្ជា​យក្ស​មួយ​នេះ​បាន​លាតត្រដាង​ថា​ខ្លួន​កំពុង​អភិវឌ្ឍ​​ស្ងាត់ៗ​នូវ​រ៉ូបូត​អនាគត​ជាច្រើន​ប្រភេទ​។​

​រ៉ូបូត​ទាំងនោះ​ត្រូវបានរ​ចនាឡើង​ដើម្បី​បំពេញ​កិច្ចការ​ផ្ទះ​ជា​ច្រើន​មុខ រួម​ទាំង​ការរៀបចំ​ទុកដាក់​ប្រដាប់ប្រដា​ក្មេង​លេង​និង​លាងចាន​ផងដែរ​។​

​ក្រុមហ៊ុន Dyson បាន​បង្ហាញ​ឱ្យឃើញ​នូវ​គំរូ​រ៉ូបូត​ថ្មី​នៅក្នុង​វីដេអូ​ដែល​បាន​ចេញផ្សាយ​នៅឯ​សន្និសីទ​អន្តរជាតិ​ស្តី​ពី​រ៉ូបូត​និង​ស្វ័យប្រវត្តិកម្ម​នៅ​ទីក្រុង​ហ្វីឡា​ដែល​ហ្វៀ​កាលពី​ថ្ងៃទី​២៥​ខែ​ឧសភា​ឆ្នាំ​២០២២​។​

​លោក ជេ​ក ដាយ​សុន (Jake Dyson) ប្រធាន​វិស្វករ​នៅ​ក្រុមហ៊ុន Dyson បាន​និយាយថា “​មាន​អនាគត​ដ៏​ធំធេង​ក្នុង​ផ្នែក​រ៉ូបូត និង ជួយ​សន្សំសំចៃ​ពេលវេលា​របស់​មនុស្ស​បំពេញ​ការងារ​សម្រាប់​​មនុស្ស និង​ធ្វើឱ្យ​ជីវិត​ប្រចាំថ្ងៃ​កាន់តែ​ប្រសើរ​ឡើង​។​ខ្ញុំ​ជា​ឪពុក​ម្នាក់ ខ្ញុំ​ចំណាយ​ពេល​ពាក់កណ្តាល​ជីវិត​របស់​ខ្ញុំ​ដើម្បី​បោសសម្អាត​បន្ទាប់ពី​កូន​របស់​ខ្ញុំ​លេង​រួច ហើយ​វា​គួរ​ឱ្យ​ធុញទ្រាន់​ណាស់​”​។​

​រហូតមកទល់​ពេលនេះ រ៉ូបូ​តរបស់ Dyson គឺជា​ម៉ាស៊ីន​បូម​ធូលី​លើ​កម្រាល​ឥដ្ឋ ក្នុងនោះ​ម៉ូ​ដែល​ដំបូង​គេ​ឈ្មោះ DC06 ត្រូវបាន​រចនា​ឡើង​កាលពី ២០ ឆ្នាំមុន​។​

​លោក​ដាយ​សុន​បាន​និយាយថា “​យើង​បាន​ធ្វើការ​ប្រហែល ២០ ឆ្នាំ​លើ​រ៉ូ​បូតបូម​ដី​លើ​ឥដ្ឋ​។ ប៉ុន្តែ​ក្រៅពីនោះ យើង​បាន​និង​កំពុង​ធ្វើ​ការស្រាវជ្រាវ​ជាច្រើន​លើ​រ៉ូបូត ដែល​គ្មាន​នរណាម្នាក់​ដឹង​នោះ​ទេ​”​។​

​ឥឡូវនេះ ក្រុមហ៊ុន​បច្ចេកវិជ្ជា​យក្ស​មួយ​នេះ​បាន​បង្ហាញ​ពី​ផែនការ​មហិច្ឆតា​របស់​ខ្លួន​សម្រាប់​រ៉ូបូត​ទំនើប ដែល​កំពុង​ដំណើរការ​នៅ​វាល​យន្តហោះ​ហូល​ឡា​វី​ង​តុ​ន (Hullavington) ក្នុង​ខេត្ត​វី​ល​សៀ (Wiltshire) របស់​អង់គ្លេស​។​

​ខណៈ​ព័ត៌មាន​លម្អិត​អំពី​រ៉ូបូត​នេះ​នៅមានកម្រិត វីដេអូ​បានបង្ហាញ​ថា​ពួកវា​នឹង​បំពាក់​ដៃ​យន្ត​ដែល​អាច​ចាប់​វត្ថុ​បាន​។​

​នេះ​អាច​អនុញ្ញាត​ឱ្យ​ពួកវា​លាងចាន រើស​របស់​ក្មេង​លេង និង​សូម្បី​រក​កាក់​ដែល​បាត់ ឬ​បំណែក​ដំឡូងបារាំង​ដែល​លាក់​ខ្លួន​នៅក្រោម​សា​ឡុង​៕

រ៉ូបូ​តរបស់ Dyson នាពេល​អនាគត​អាច​ជួយ​លាងចាន​និង​រៀបចំ​ប្រដាប់ប្រដា​ក្នុងផ្ទះ​