ដោយៈ មុនី​រ័ត្ន / ភ្នំពេញៈ “​ជានិច្ចកាល​គណបក្ស​ប្រជាជន​កម្ពុជា តែងតែ​រួមសុខ​រួមទុក្ខ​ជាមួយ ប្រជាជន គ្រប់​កាលៈទេសៈ ដូច្នេះ​យើង​ត្រូវ​ជឿជាក់ និង​បោះឆ្នោត​ជូន គណបក្ស​ប្រជាជន ទាំងអស់គ្នា ដើម្បី​បន្ត​ថែរក្សា សន្តិភាព ស្ថិរភាព សុវត្ថិភាព ប្រទេសជាតិ និង​ប្រជាជន និង​រួមគ្នា​កសាង​អភិវឌ្ឍន៍​កម្ពុជា ឲ្យ​កាន់តែ​រីកចម្រើន រុងរឿង តរៀង​ទៅ​”​។ នេះ​ជាការ​បញ្ជាក់​របស់លោក រ័ត្ន ស្រ៊ាង ប្រធាន​ក្រុមការងារ​គណបក្ស​ប្រជាជន​កម្ពុជា សង្កាត់​ព្រែកកំពឹស ក្នុងឱកាស​អញ្ជើញ​ចុះ​ជួប​សំណេះសំណាល និង​សួរសុខទុក្ខ ប្រជាពលរដ្ឋ តាម​ខ្នង​ផ្ទះ ក្នុង​សង្កាត់​ព្រែកកំពឹស ខណ្ឌដង្កោ កាលពី​ព្រឹក​ថ្ងៃទី​២៨ ខែឧសភា ឆ្នាំ​២០២២ ។​

​លោក រ័ត្ន ស្រ៊ាង បានបញ្ជាក់​ទៀតថាៈ “ ប្រទេសជាតិ មាន​សន្តិភាព មានការ​អភិវឌ្ឍ រហូតដល់​បច្ចុប្បន្ននេះ ក៏​ដោយសារ​ការប្រឹងប្រែង​របស់​គណបក្ស​ប្រជាជន​កម្ពុជា ក្រោម​ការដឹកនាំ​ដ៏​ឈ្លាសវៃ ប្រកបដោយ​បញ្ញាញាណ របស់​សម្តេច​អគ្គមហា​សេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា ដែល​សម្តេច​ធ្លាប់បាន​យក​ជីវិត ធ្វើ​ដើមទុន ឆ្ពោះទៅ​រក​ការរំដោះ​ជាតិ ហើយ​សម្តេច បានដាក់​ចេញ​នូវ​នយោបាយ ឈ្នះ ឈ្នះ រំលាយ​បាន​ទាំងស្រុង នូវ​អង្គការ​ចាត់តាំង​នយោបាយ និង យោធា​ខ្មែរក្រហម នាំយក​នូវ សន្តិភាព​ពេញលេញ ជូន​ជាតិ​មាតុភូមិ​កម្ពុជា ក៏ដូចជា ប្រជាជន​ខ្មែរ​ទូទាំងប្រទេស​។ ជាពិសេស សម្តេច មាន​ទស្សនៈវិស័យ​វែងឆ្ងាយ ក្នុងការ​ប្រឆាំង​ជាមួយ​ការរីក​រាលដាល​នូវ​ជំងឺ​កូ​វីដ​-១៩ បាន​សង្គ្រោះ​ប្រជាពលរដ្ឋ​កម្ពុជា​ទូទាំងប្រទេស ឱ្យ​រួច​ចាក​ផុតពី​គ្រោះ មហន្តរាយ ដ៏​អាក្រក់ ត្រឡប់មក​ស្ថាន​ភាពល្អ​ប្រក្រតី ប្រកបដោយ​ជោគជ័យ ខណៈដែល ប្រទេស​ដទៃ ទូទាំង​ពិភពលោក កំពុង​ឆ្លង​រីក​រាលដាល និង​ស្លាប់​ពលរដ្ឋ​ខ្លួន រាប់រយ ពាន់​ម៉ឺន នាក់​នៅឡើយ​”​។​

​សូមជម្រាបថា ការឃោសនាបោះឆ្នោត​ជ្រើសរើស ក្រុមប្រឹក្សាឃុំ សង្កាត់ អាណត្តិ​ទី​៥ ឆ្នាំ​២០២២ រយៈពេល ១៤​ថ្ងៃ គឺ​ចាប់ផ្តើម​ពីថ្ងៃ​ទី​២១ ខែឧសភា ដល់​ថ្ងៃទី​៣ ខែមិថុនា ឆ្នាំ​២០២២​។ នៅ​ថ្ងៃទី​៥ ខែមិថុនា ឆ្នាំ​២០២២ គឺជា​ថ្ងៃ​នៃ​ការបោះឆ្នោត​ក្រុមប្រឹក្សាឃុំ សង្កាត់ អាណត្តិ​ទី​៥ ដោយមាន​គណបក្សនយោបាយ ចំនួន ១៧ បាន​ចូលរួម​ប្រកួតប្រជែង​៕/V​