ប្រែ​សម្រួលៈ​បំណង​(​ដេល្លី​ម៉េល​)៖ មនុស្ស​ជាង​៣០​នាក់​បាន​ស្លាប់​ក្នុង​ការជាន់​និង​ប្រជ្រៀត​គ្នា​នៅ​នី​ហ្សេ​រី​យ៉ា​ខាងត្បូង​កាលពី​ថ្ងៃ​សៅរ៍​ក្រោយ​ការ​ប្រជ្រៀត​ជាន់គ្នា​ក្នុងអំឡុង​ព្រឹត្តិការណ៍​ចែក​ស្បៀង​នៅ​​ព្រះវិហារ​គ្រិស្ត​មួយ​។​

​ប៉ូលិស​និង​សាក្សី​បាន​និយាយថា ស្បែកជើង​នៅ​រាយប៉ាយ​លើដី​ក្រោយ​កើតហេតុ​នៅ​ទីក្រុង​កំពង់ផែ​ព័រ ហាត​កួត​( Port Harcourt)​ក្នុង​រដ្ឋ​រី​វើ​ស​ស្តេត​ភាគខាងត្បូង​ក្រោយ​ពី​ហ្វូងមនុស្ស​ព្យាយាម​​រុលទៅមុខ​ដើម្បីអោយ​ដល់​កន្លែង​ចែក​ស្បៀង​។​

​ប៉ូលិស​រដ្ឋ​បាន​និយាយថា អង្គការ​ព្រះវិហារ​Kings Assembly​បាន​រៀបចំ​ពិធី​ចែក​ស្បៀង​និង​អំណោយ​សំរាប់​ជនក្រីក្រ​នៅ​ក្លឹប​កីឡា​មួយ​ក្នុង​ទីក្រុង​ព័រ​ហា​តកួត នៅពេល​ហ្វូងមនុស្ស​ប្រែជា​ច្របូកច្របល់​​លែង​អាច​គ្រប់គ្រង​បាន​។​សរុប​មនុស្ស​៣១​នាក់​បាន​ស្លាប់​ក្នុងការ​ជាន់និង​ប្រជ្រៀត​គ្នា​ដល់​ថប់ដង្ហើម​ស្លាប់​។​

​រូបភាព​បង្ហោះ​ក្នុង​បណ្តាញ​សង្គម​បង្ហាញ​គ្រួសារ​ជនរងគ្រោះ​យំ និង​ទៅ​មើល​សាច់ញាតិ​រងរបួស​ដែល​កំពុង​សម្រាក​នៅ​មន្ទីរពេទ្យ រួម​មាន​កុមារ ។​

​ប៉ូលិស​បាន​និយាយថា ការស៊ើបអង្កេត​ពី​បទឧក្រិដ្ឋ​មួយ​កំពុង​ធ្វើឡើង​ចំពោះ​ឧបទ្ទវហេតុ​នេះ​។​

​សូមបញ្ជាក់​ថា នី​ហ្សេ​រី​យ៉ា ធ្លាប់​ជួប​សោកនាដកម្ម​ជាន់គ្នា​ដោយសារ​ការចែក​ស្បៀង​បែបនេះ​ជាច្រើន​លើក​មក​ហើយ​នៅ​ប៉ុន្មាន​ឆ្នាំ​មកនេះ រួម​មាន​កម្មវិធី​ផ្តល់​ជំនួយ​មួយ​នៅក្នុង​រដ្ឋ​ប័រ​ណូ​ភាគ​ខាងជើង​​កាលពី​ឆ្នាំមុន​ដែល​ក្នុង​ហេតុការណ៍​នេះ​ស្ត្រី​ប្រាំពីរ​នាក់​ត្រូវ​បាន​ជាន់​ស្លាប់​។​

​ហេតុការណ៍​កាលពី​ព្រឹក​ថ្ងៃ​សៅរ៍​បាន​កើតឡើង​នៅ​ពេល​ពួក​មេដឹកនាំ​គណបក្ស​ប្រឆាំង ជួបប្រជុំ​នៅ​រដ្ឋធានី​អា​ប៊ូ​ចា​ដើម្បី​ជ្រើសរើស​បេក្ខជន​ម្នាក់​សំ​រាប់កា​រការ​​បោះឆ្នោត​ប្រធានាធិបតី​នៅ​ឆ្នាំ​២០២៣​ខាងមុខ​។​

​នី​ហ្សេ​រី​យ៉ា​ជា​ប្រទេស​មាន​ប្រជាជន​ច្រើន​បំផុត​និង​ជា​ប្រទេស​ផលិត​ប្រេង​ធំ​បំផុត​ផង​ដែរ​នៅ​អាហ្វ្រិក តែ​ទោះជា​មាន​កំណប់ទ្រព្យ​ប្រេង ប្រជាជន​នី​ហ្សរី​យ៉ា​៤​នាក់​ក្នុងចំណោម​១០​នាក់​រស់នៅ​ក្រោម​កំរិត​​ភាពក្រីក្រ នេះ​បើ​តាមរយ​ការណ៍​របស់​ធនាគារ​ពិភពលោក​៕