​ប្រែ​សម្រួលៈ​បំណង​(ST)៖ ស្រី​លង្កា​ដែល​កំពុង​ខ្វះខាត​សាច់ប្រាក់​ខ្លាំង បាន​ទទួល​ទំនិញ​ប្រេង​រុស្ស៊ី​កាលពី​ថ្ងៃ​សៅរ៍ ដើម្បី​ចាប់ផ្តើម​ដំណើរការ​រោងចក្រ​ចម្រាញ់​ប្រេង​របស់​ប្រទេស​ឡើងវិញ នេះ​បើ​តាម​ការ​​បញ្ជាក់​ពី​រដ្ឋមន្ត្រី​ថាមពល​។​

​បើ​តាម​រដ្ឋមន្ត្រី​ថាមពល ស្រីលង្កា​ត្រូវ​បង់ប្រាក់​៧២,៦​លាន​ដុល្លារ​ដើម្បី​ទិញ​ប្រេង​រុស្ស៊ី​ចំនួន​៩០.០០០​តោន​ដែល​បាន​មក​ដល់​កំពង់ផែ​ក្រុង​កូឡុំបូ​នៅ​សប្តាហ៍​នេះ នៅពេល​ប្រជាជាតិ​ដែននេះ​ធ្វើការ​​ចាប់ផ្តើម​ដំណើរការ​រោងចក្រ​ចម្រាញ់​ប្រេង​តែ​មួយ​របស់​ខ្លួន​ឡើងវិញ​ដើម្បី​ដោះស្រាយ​វិបត្តិ​ខ្វះខាត​ថាមពល​ដ៏​ស្រួចស្រាល់​។​

​សូមបញ្ជាក់​ថា ស្រីលង្កា​កំពុង​ជួប​វិបត្តិ​សេដ្ឋកិច្ច​ដ៏​អាក្រក់​បំផុត​ចាប់តាំងពី​ប្រទេស​នេះ​ទទួលបាន​ឯករាជ្យភាព​ពី​អង់គ្លេស​នៅ​ឆ្នាំ​១៩៤៨ ដោយ​កង្វះ​ប្រេង​និង​ទំនិញ​សំខាន់ៗ​ដទៃ​ទៀត​បាន​និង​កំពុង​ធ្វើ​​អោយ​ជីវិត​រស់នៅ​របស់​ប្រជាជន​២២​លាន​នាក់​នៃ​កោះ​នេះ​ជួប​ការលំបាក​ខ្លាំង​។​

​រោងចក្រ​ចម្រាញ់​ប្រេង​CPC​តែ​មួយ​របស់​ប្រទេស​បាន​បិទ​នៅ​ខែ​មីនា ក្រោយ​រដ្ឋាភិបាល​ខ្វះ​សាច់ប្រាក់​ដើម្បី​នាំ​ប្រេង​ឆៅ​ចូល​។​

​តាមពិត​ទំនិញ​ប្រេងឆៅ​រុស្ស៊ី​បាន​រង់ចាំ​នៅ​កំពង់ផែ​ទីក្រុង​កូឡុំបូ​អស់​ជាង​មួយ​ខែ​មក​ហើយ​ដោយសារ​រដ្ឋាភិបាល​នៅ​មិន​ទាន់​ប្រមូល​ប្រាក់​បាន​គ្រប់​៧២,៦​លាន​ដុល្លារ​ដើម្បី​ទូទាត់​វា​។​

​រដ្ឋាភិបាល​ទីក្រុង​កូឡុំបូ​ក៏​កំពុង​ពិភាក្សា​ជាមួយ​រដ្ឋាភិបាល​ទីក្រុង​មូ​ស្គូ​ដើម្បី​ធ្វើ​ការផ្គត់ផ្គង់​ប្រេង​ឆៅ ធ្យូង​ថ្ម ប្រេងម៉ាស៊ូត​និង​ប្រេងសាំង​ពី​រុស្ស៊ី​មក​ស្រីលង្កា​ដោយផ្ទាល់​ទោះជា​រុស្ស៊ី​រង​ទណ្ឌកម្ម​និង​កំហឹង​ការ​​ទូត​ដោយសារតែ​ប្រតិបត្តិការ​យោធា​របស់​ខ្លួន​នៅ​អ៊ុយ​ក្រែន​ក្តី​។​

​ពួក​មេដឹកនាំ​សហភាព​អឺរ៉ុប​នៅ​ថ្ងៃ​ចន្ទ​ទី​៣០​ឧសភា​នេះ​នឹង​ជួបប្រជុំគ្នា ដើម្បី​ពិភាក្សា​ដាក់ចេញ​ទណ្ឌកម្ម​ជុំ​ថ្មី​មួយ​លើ​រុស្ស៊ី​ដោយសារតែ​សង្គ្រាម​នៅ​អ៊ុ​យក្រែន រួម​មាន​ទណ្ឌកម្ម​ប្រេង​។តាមពិត​ប្រេង​រុស្ស៊ី​បាន​រង​ទ​ណ្ឌ​​កម្ម​អាម៉េរិក​រួច​ជា​ច្រេច ហើយ​ប្រេង​រុស្ស៊ី​ឥឡូវ​លក់​ចេញ​ក្នុង​តំលៃថោក​ធៀប​នឹង​ប្រេង​នៅលើ​ទីផ្សារ​អន្តរជាតិ​៕

​ប្រជាជន និងអ្នកជិះ​យានយន្ត​ត្រូវ​រង់ចាំ​នៅ​តាម​ស្ថានីយ​ប្រេង ពេលខ្លះ​រាប់គីឡូម៉ែត្រ​ដើម្បី​ទទួលបាន​ប្រេង​ចាក់​យានយន្ត​និង​ហ្គាស​ចំអិន​អាហារ​