ដោយៈ បាយ័ន / សៀមរាបៈ នៅព្រឹកថ្ងៃទី១៣ ខែមិថុនា ឆ្នាំ២០២២ នេះប្រតិភូយោធភូមិភាគទី៧ ដឹកនាំដោយឧត្តមសេនីយ៍ត្រី ដូ វ៉ាន់បាញ់ អនុប្រធាននយោបាយយោធភូមិភាគទី៧ នៃកងទ័ពប្រជាជនវៀតណាម ក្រោមការស្វាគមន៍ ទទួលបដិសណ្ឋារកិច្ចយ៉ាងកក់ក្តៅ ពីសំណាក់លោក ឧត្តមសេនីយ៍ឯក ពៅ ហេង មេបញ្ជាការយោធភូមិភាគទី៤និងលោក ពិន ប្រាកដ អភិបាលរងខេត្តសៀមរាប បានអញ្ជើញអមដំណើរ ដាក់កម្រងផ្កា
គោរពវិញ្ញាណក្ខន្ធ នៅស្ថូបមិត្តភាពកម្ពុជា-វៀតណាម ស្ថិតក្នុងសង្កាត់ស្លក្រាម ក្រុងសៀមរាបខេត្តសៀមរាប។
ប្រតិភូយោធភូមិភាគទី៧ នៃកងទ័ពប្រជាជនវៀតណាម មកកាន់ខេត្តសៀមរាបនេះ គឺមានគោលបំណងសំខាន់ ដើម្បីរំលឹកគុណបំណាច់ ចំពោះវីរភាពកងទ័ពស្ម័គ្រចិត្តវៀតណាមដែលបានពលី ក្នុងបុព្វហេតុសង្គ្រាម នាប៉ុន្មានទសវត្សរ៍ កន្លងមក ដែលបានធ្វើពលិកម្មដើម្បីចូលរួមរំដោះប្រទេសកម្ពុជា និងឯករាជ្យ សន្តិភាព របស់វៀតណាម និងបានជួយប្រជាជនកម្ពុជា ឱ្យរួចផុតពីរបបប្រល័យពូជសាសន៍ ប៉ុល ពត ។
ក្រៅពីការអញ្ជើញដាក់កម្រងផ្កា គោរពវិញ្ញាណក្ខន្ធនោះ ប្រតិភូយោធភូមិភាគទី៧នៃកងទ័ពប្រជាជនវៀតណាម នៅបានជួបពិភាក្សាការងារ ជាមួយភាគីកម្ពុជា និងប្រគល់ថវិការបស់ រដ្ឋាភិបាល សាធារណរដ្ឋសង្គមនិយមវៀតណាម សម្រាប់ជួយឧបត្ថម្ភការងាររុករកអដ្ឋិធាតុកងទ័ពស្ម័គ្រចិត្ត និងជំនាញការវៀតណាម ដែលបានពលីជីវិត គ្រប់សម័យកាលសង្គ្រាមនៅកម្ពុជា ដើម្បីនាំអដ្ឋិធាតុនោះ ធ្វើមាតុភូមិនិវត្ត ទៅវៀតណាមវិញ៕/V
