ប្រែសម្រួល : កញ្ញាដាលីស (ដេល្លីម៉េល) ៖ អឺរ៉ុបបានបញ្ជូរសារនិមិត្តរូបដ៏មានឥទ្ធិពលនៃសាមគ្គីភាពជាមួយអ៊ុយក្រែនកាលពីថ្ងៃសុក្រទី១៧មិថុនាខណៈទីក្រុងព្រុចសែលបានគាំទ្រសំណើរបស់ទីក្រុងគៀវសម្រាប់ឋានៈជាបេក្ខភាពសហភាពអឺរ៉ុប ជាការសម្រេចចិត្តមួយដែលប្រធានាធិបតីរុស្ស៊ីលោក វ្ល៉ាឌីមៀ ពូទីន និយាយថា គាត់ “គ្មានអ្វីប្រឆាំងទេ”។
ដោយមានការគាំទ្រពីគណៈកម្មការអឺរ៉ុប អ៊ុយក្រែនអាចចូលរួមក្នុងបញ្ជីប្រទេសដែលប្រជែងគ្នាសម្រាប់សមាជិកភាពនៅដើមសប្តាហ៍ក្រោយនៅពេលដែលមេដឹកនាំរដ្ឋសមាជិកជួបគ្នានៅឯកិច្ចប្រជុំកំពូលនៅទីក្រុងព្រុចសែលរបស់ពួកគេ។
មេដឹកនាំទាំង ២៧ រូបត្រូវតែយល់ព្រមចំពោះបេក្ខភាពនេះ ហើយប្រមុខនៃសមាជិកធំបំផុតរបស់ប្លុកនេះ គឺ បារាំង អាល្លឺម៉ង់ និងអ៊ីតាលីបានផ្តល់ការគាំទ្រយ៉ាងពេញទំហឹងចំពោះគំនិតនេះកាលពីថ្ងៃព្រហស្បតិ៍ ក្នុងដំណើរទៅកាន់ជាយក្រុងគៀវ ដែលហែកហួរដោយសង្គ្រាម។
កាលពីថ្ងៃសុក្រ គណៈកម្មការអឺរ៉ុបបានផ្តល់ការគាំទ្រជាផ្លូវការចំពោះការស្នើសុំនេះ ហើយប្រធានសហភាពអឺរ៉ុបលោកស្រី អឺស៊ូឡា វ៉ុន ដឺ ឡេយ៉េន (Ursula von der Leyen)បានបង្ហាញជំហររបស់លោកស្រីយ៉ាងច្បាស់ ដោយការពាក់អាវធំពណ៌ទង់ជាតិអ៊ុយក្រែន។
លោកស្រីបាននិយាយថា “យើងទាំងអស់គ្នាបានដឹងថាជនជាតិអ៊ុយក្រែនត្រៀមខ្លួនរួចជាស្រេចដើម្បីស្លាប់សម្រាប់ទស្សនៈអឺរ៉ុប។ យើងចង់ឱ្យពួកគេរស់នៅជាមួយយើងសម្រាប់សុបិនអឺរ៉ុប”។
ប្រធានាធិបតីអ៊ុយក្រែនលោក វ៉ូឡូឌីមៀ ហ្សេលេនស្គី បានស្វាគមន៍ភ្លាមៗចំពោះការសម្រេចចិត្តនេះថាជា”ជំហានដំបូងនៅលើផ្លូវជាសមាជិកភាពសហភាពអឺរ៉ុបដែលពិតជានឹងនាំជ័យជម្នះមកយើងកាន់តែកៀក”។
លោកបាននិយាយថាលោករំពឹងមេដឹកនាំសហភាពអឺរ៉ុបនឹងផ្តល់ឱ្យអ៊ុយក្រែននូវ “លទ្ធផលវិជ្ជមាន” នៅក្នុងកិច្ចប្រជុំកំពូលនៅថ្ងៃទី ២៣-២៤ ខែមិថុនា។
លោកពូទីនបាននិយាយថា រុស្សីមិនមានអ្វីប្រឆាំងនឹងអ៊ុយក្រែន ដែលចូលរួមជាមួយសហភាពអឺរ៉ុបទេ ដោយនិយាយថា វាគឺជា”ការសម្រេចចិត្តអធិបតេយ្យភាពរបស់ពួកគេក្នុងការចូលរួមសហភាពសេដ្ឋកិច្ចឬអត់” មិនដូចហានិភ័យសន្តិសុខដែលគាត់មើលឃើញក្នុងករណីរដ្ឋាភិបាលទីក្រុងគៀវចូលរួមជាសមាជិកអង្គការយោធាណាតូនោះទេ។
ប៉ុន្តែលោកបាននិយាយថា សមាជិកភាពនៃសហភាពអឺរ៉ុបនឹងប្រែក្លាយអ៊ុយក្រែនទៅជា “ពាក់កណ្តាលអាណានិគម” របស់លោកខាងលិច។
រុស្ស៊ីធ្លាប់បាននិយាយមុននេះថា លោកខាងលិចកំពុង “បោកប្រាស់” អ៊ុយក្រែនជាមួយនឹងការសន្យាអំពីសមាហរណកម្ម៕
ប្រធានសហភាពអឺរ៉ុបលោកស្រី អឺស៊ូឡា វ៉ុន ដឺ ឡេយ៉េនជួបលោកហ្សេលេនស្គីនៅទីក្រុងគៀវកាលពីពេលកន្លងទៅ