​ប្រែ​សម្រួល : កញ្ញា​ដា​លី​ស (​ឆា​នែ​ល​ញូ​វ​អេ​ស៊ា​) ៖ តំបន់​ដ៏​ធំ​នៃ​ភាគ​ខាងត្បូង​ប្រទេស​ចិន​ត្រូវ​បាន​វាយលុក​ដោយ​ព្យុះភ្លៀង​ដ៏​ធ្ងន់ធ្ងរ​ដោយ​បង្ក​ឱ្យ​មាន​ទឹកជំនន់​នៅក្នុង​ទីក្រុង​នានា​និង​ការ​រអិល​បាក់​ដី​​នៅតាម​តំបន់​ជនបទ ខណៈ​ជុំ​ដំបូង​នៃ​ភ្លៀង​រដូវក្តៅ​បាន​ឈាន​ដល់​កម្រិត​កំពូល​នៃ​ថាមពល​របស់​វា​រួចទៅហើយ​។​

​ផ្លូវ​នានា​បាន​ប្រែ​ក្លាយទៅជា​ទន្លេ ខណៈ​រថយន្ត​និង​ផ្ទះ​មួយ​ជាន់​ត្រូវបាន​ទឹកជំនន់​ទាញ​យក​ទៅ​បាត់​ក្នុងស្រុក​ចំនួន​ពីរ​ក្នុង​ខេត្ត​គួ​យ​ចូ​វ (Guizhou) ភាគ​និរតី​ប្រទេស​ចិន​កាលពី​ថ្ងៃ​សៅរ៍ ទី​១៨ មិថុនា នេះ​បើ​យោង​តាម​វីដេអូ​ដែល​ផ្សព្វផ្សាយ​នៅលើ​បណ្តាញ​សង្គម​ចិន​។

​ភ្លៀង​ធ្លាក់​នៅ​តំបន់​ខ្លះ​គឺ​មាន​សភាព​ធ្ងន់ធ្ងរ​បំផុត​មិន​ធ្លាប់មាន​ក្នុង​រយៈពេល ៦០ ឆ្នាំ​។​

​ប្រព័ន្ធ​ផ្សព្វផ្សាយ​រដ្ឋ​បាន​និយាយ​កាលពី​ថ្ងៃ​សៅ​រ៍ថា នៅក្នុង​តំបន់​ស្វយ័ត​ក្វាង​ស៊ី (Guangxi)​នៅ​ជិតខាង អ្នកភូមិ​ចំនួន​ប្រាំ​នាក់​ត្រូវបាន​សម្លាប់ នៅពេល​ដែល​ផ្ទះ​សង់​ពី​ឈើ​មួយ​ខ្នង​បាន​ដួលរលំ បន្ទាប់ពី​ត្រូវ​បាន​វាយប្រហារ​ដោយ​ភ្លៀង​ធ្លាក់​ខ្លាំង​។​

​ការ​រអិល​បាក់​ដី​និង​ការបាក់​ផ្លូវ​ក៏​ត្រូវបាន​រាយការណ៍​ផងដែរ​។​

​យោង​តាម​ការព្យាករណ៍​អាកាសធាតុ​របស់​រដ្ឋកា​លពី​ថ្ងៃអាទិត្យ ភ្លៀង​ធ្លាក់​ខ្លាំង​នឹង​បន្ត​កើតមាន​នៅក្នុង​ខេត្ត​គួ​យ​ចូ​វ ជាំ​ង​ស៊ី អាន​ហ៊ុយ និង ចឺ​ជាំង ក៏ដូចជា​នៅ​ក្វាង​ស៊ី​រហូតដល់​ដើម​សប្តាហ៍​នេះ​ខណៈ​​រដូវភ្លៀង​បើកឆាក ដែល​គេ​ស្គាល់​ថា “​ទឹក​ទូក​នាគ​” បាន​ឈាន​ដល់​កម្រិត​កំពូល​។​

​នៅ​ភាគខាងត្បូង​ប្រទេស​ចិន ប៉ុន្មាន​សប្តាហ៍​មុន​និង​ក្រោយ​ពិធី​បុណ្យ​អុំទូក​នាគ​នៅ​ដើមខែ​មិថុនា ជាធម្មតា​ត្រូវបាន​សម្គាល់​ដោយ​អាកាសធាតុ​មិន​ទៀងទាត់​និង​មាន​ភ្លៀង​ធ្លាក់​ច្រើន​ខណៈដែល​​ខ្យល់​ក្តៅ​និង​សើម​នៅ​ភាគខាងត្បូង​បាន​បុក​ប៉ះ​ជាមួយ​ម៉ាស់​ខ្យល់​ត្រជាក់​ពី​ភាគ​ខាងជើង​។​

​យោង​តាម​ការិយាល័យ​អាកាសធាតុ​ក្នុង​តំបន់​បានឱ្យដឹងថា ភ្លៀង​ដើម​រដូវក្តៅ​គឺ​មាន​កម្លាំង​ខ្លាំង​និង​អូសបន្លាយ​ពេល​យូរ​ជាង​ធម្មតា​នៅ​ឆ្នាំនេះ ដោយ​ទឹកភ្លៀង​នៅ​ក្វាង​ស៊ី ក្វាង​ទុង និង​ហ្វូ​ជៀនបាន​ស្ថិតក្នុង​កម្រិត​ខ្ពស់​បំផុត​ចាប់តាំងពី​ឆ្នាំ ១៩៦១៕

អ្នក​សង្គ្រោះ​កំពុង​ជួយ​អ្នកស្រុក​រង​គ្រោះ​ទឹកជំនន់​នៅ​តំបន់​ក្វាង​ស៊ី​កាលពី​ថ្ងៃ​សុក្រ​ទី​១៧​មិថុនា​ឆ្នាំ​២០២២