​ប្រែ​សម្រួល : កញ្ញា​ដា​លី​ស (​ឆា​នែ​ល​ញូ​វ​អេ​ស៊ា​) ៖ ជំទាវ​ទី​មួយ​របស់​កូរ៉េខាងត្បូង​លោកស្រី គីម គី​អូន​ហ៊ី (Kim Keon-hee)​បាន​ក្លាយ​ជា​ឥស្សរជន​សាធារណៈ​ចុងក្រោយ​គេ​ដែល​បញ្ចេញមតិ​​ប្រឆាំង​នឹង​ទម្លាប់​ដ៏​ចម្រូងចម្រាស​របស់​ប្រទេស​ក្នុង​ការ​ទទួលទាន​សាច់​ឆ្កែ​។​

​ជា​អ្នក​ស្រឡាញ់​សត្វ​មួយរូប លោកស្រី​ត្រូវគេ​ស្គាល់​ថា​ជា​អ្នក​ជួយសង្គ្រោះ​សត្វ​ឆ្កែ​ដែល​គេបោះបង់​ចោល​ហើយ​កំពុង​ចិញ្ចឹម​ឆ្កែ​ចំនួន​បួន​ក្បាល​និង​ឆ្មា​ចំនួន​បី​ក្បាល​នៅផ្ទះ​ជា​មួយ​ស្វាមី​របស់​លោកស្រី​គឺ​​លោក​ប្រធានាធិបតី យូ​ន ស៊ុក​យ៉ូល (Yoon Suk-yeol) ។​

​លោកស្រី​គីម​បាន​និយាយ​នៅក្នុង​បទ​សម្ភាសន៍​តាម​ប្រព័ន្ធ​ផ្សព្វផ្សាយ​ដំបូង​របស់​លោកស្រី​ក្នុងនាម​ជា​ជំទាវ​ទីមួយ ដែល​បាន​ចុះផ្សាយ​ក្នុង​កាសែត​ក្នុងស្រុក Seoul Shinmun កាលពី​ថ្ងៃ​ចន្ទ ទី​១៣ មិថុនា​ថា “​ខ្ញុំ​សង្ឃឹម​ថា​រដ្ឋាភិបាល​រប​ស់លោក​យូ​ន​នឹង​បង្កើត​លទ្ធផល​ជាក់ស្តែង​ក្នុងករណី​រំលោភបំពាន​សត្វ ការធ្វេសប្រហែស​ចំពោះ​សត្វ​ឆ្កែ​ដែល​គេបោះបង់​ចោល និង​បញ្ហា​សាច់​ឆ្កែ​”​។​

“​នៅ​ទីបំផុត ការ​មិន​បរិភោគ​សាច់​ឆ្កែ​គឺជា​ទម្រង់​នៃ​ការគោរព​ចំពោះ​មិត្ត​ជិតស្និទ្ធ​បំផុត​របស់​មនុស្ស​និង​ការគោរព​ជីវិត​”​។​

​លោកស្រី​ក៏​បាន​ព្រមាន​ផងដែរ​ថា សត្វ​ឆ្កែ​សម្រាប់​បរិភោគ​ត្រូវបាន​ចិញ្ចឹម​ក្នុង​លក្ខខណ្ឌ​គ្មាន​អនាម័យ និង​បាន​ជំរុញ​រដ្ឋាភិបាល​ជួយ​ឈ្មួញ​សាច់​ឆ្កែ​ឱ្យ​ប្តូរ​ការងារ​ដើម្បី​បញ្ចប់​ឧស្សាហកម្ម​នេះ​។​

​ការបរិភោគ​ឬ​ការ​មិន​បរិភោគ​សាច់​ឆ្កែ​គឺជា​ប្រធានបទ​ដ៏​រសើប ដែល​បង្ក​ឱ្យមាន​ការជជែក​វែកញែក​រាប់​មិន​អស់​នៅក្នុង​ប្រទេស​កូរ៉េខាងត្បូង​ជា​កន្លែង​ដែល​សមាជិក​សភា​បាន​បរាជ័យ​ជាច្រើន​ដង​​ក្នុង​ការអនុម័ត​ច្បាប់​ដើម្បី​ហាមឃាត់ “​ទម្លាប់​ហួស​សម័យនេះ​”​។​

​មិន​មាន​ទិន្នន័យ​ផ្លូវការ​ទេ ប៉ុន្តែ​របាយការណ៍​ឆ្នាំ ២០១៧ ដោយ​ក្រុម​ការពារ​សត្វ​បាន​ប៉ាន់ប្រមាណ​ថា សត្វ​ឆ្កែ​រហូតដល់​មួយ​លាន​ក្បាល​ត្រូវបាន​ស៊ី​ក្នុង​មួយឆ្នាំ​៕

ជំទាវ​ទី​មួយ​របស់​កូរ៉េខាងត្បូង​លោកស្រី គីម គី​អូន​ហ៊ី និង​ស្វាមី កំពុងថ​ត​ជា​មួយ​ឆ្កែ​