​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ មេដាយ​រង្វាន់​ណូបែល​សន្តិភាព ដែល​អ្នកកាសែត​រុស្ស៊ី ឌី​មី​ទ្រី មូរ៉ា​តូ​វ (Dmitry Muratov)​ដាក់លក់​ដេញថ្លៃ​ដើម្បី​រៃ​អង្គាស​ប្រាក់​សម្រាប់​ជនភៀសខ្លួន​​កុមារ​អ៊ុ​យក្រែន បាន​លក់​កាលពី​យប់​ថ្ងៃ​ចន្ទ​ទី​២០​មិថុនា​ក្នុងតម្លៃ ១០៣,៥ លាន​ដុល្លារ ដោយ​បំបែក​ឯតទគ្គ​ក​ម្មចាស់​សម្រាប់​ការលក់​មេដាយ​រង្វាន់​ណូបែល​។​

​កាលពីមុន ការបង់ប្រាក់​ច្រើន​បំផុត​សម្រាប់​មេដាយ​រង្វាន់​ណូបែល​បែបនេះ​គឺ​នៅក្នុង​ឆ្នាំ ២០១៤ នៅ​ពេល​លោក ជេ​មស៍ វ៉ាត់សុន (James Watson)​ដែលជា​អ្នក​បង្កើត​រួមគ្នា​នូវ​រចនា​សម្ពន្ធ DNA បាន​លក់​មេដាយ​រង្វាន់​ណូបែល​នៅ​ឆ្នាំ​១៩៦២ បាន​តម្លៃ ៤,៧៦ លាន​ដុល្លារ​។​

​បី​ឆ្នាំ​ក្រោយមក គ្រួសារ​នៃ​អ្នក​ទទួល​រង្វាន់​រួមជាមួយ​លោក​គឺ​លោក ហ្វ្រង់​ស៊ី គ្រី​ក (Francis Crick) បានទទួល ២,២៧ លាន​ដុល្លារ​ក្នុង​ការលក់​ដេញថ្លៃ​ដូចគ្នា ដែល​ដំណើរការ​លក់​ដោយ​ក្រុមហ៊ុន​ Heritage Auctions ដែលជា​ក្រុមហ៊ុន​ដូចគ្នា​ដែល​បាន​ដេញថ្លៃ​មេដាយ​របស់​លោក​មូរ៉ា​តូ​វ កាលពី​ថ្ងៃ​ចន្ទ ដែល​ជា​ទិវា​ជនភៀសខ្លួន​ពិភពលោក​។​

​លោក​មូរ៉ា​តូ​វ ដែល​ទទួលបាន​មេដាយមាស​នេះ​ក្នុង​ខែតុលា ឆ្នាំ ២០២១ បាន​ជួយ​បង្កើត​កាសែត​រុស្ស៊ី​ឯករាជ្យ Novaya Gazeta និង​ជា​និពន្ធ​នាយក​នៃ​កាសែត​នេះ​នៅពេល​ដែល​វា​ត្រូវ​បាន​បិទ​ក្នុង​​ខែ​មីនា​ឆ្នាំ​២០២២ ចំ​ពេល​ដែល​វិមាន​ក្រឹម​ឡាំង​ដាក់​ការគៀបសង្កត់​លើ​អ្នកសារព័ត៌មាន​ណា​ដែល​រិះគន់​ឬ​បង្ហាញ​ការមិន​ពេញចិត្ត​ជា​សាធារណៈ​ចំពោះ​ការ​លុកលុយ​របស់​រុស្ស៊ី​លើ​អ៊ុ​យក្រែន​។​

​វា​ជា​គំនិត​របស់​លោក​មូរ៉ា​តូ​វ​ក្នុង​ការដាក់​ដេញថ្លៃ​រង្វាន់​របស់គាត់ ដោយ​បាន​ប្រកាស​រួច​ហើយ​ថា​គាត់​នឹង​បរិច្ចាគ​ប្រាក់រង្វាន់ ៥០០.០០០ ដុល្លារ​ដល់​អង្គកា​រ​សប្បុរសធម៌​។ លោក​បាន​និយាយថា គំនិត​នៃ​ការបរិច្ចាគ​នេះ​គឺ​ដើម្បី​ផ្តល់​ឱកាស​ដល់​កុមារ​ជនភៀសខ្លួន​សម្រាប់​អនាគត​។​

​លោក​មូរ៉ា​តូ​វ​បាន​និយាយថា ប្រាក់ចំណូល​នឹង​បញ្ជូន​ដោយ​ផ្ទាល់​ទៅ​អង្គការ​យូ​នី​សេ​ហ្វ​ក្នុង​កិច្ចខិតខំ​ប្រឹងប្រែង​របស់ខ្លួន ដើម្បី​ជួយ​កុមារ​ដែល​ភៀសខ្លួន​ដោយ​សង្គ្រាម​នៅ​អ៊ុ​យក្រែន​៕

​មេដាយ​ណូបែល​សន្តិភាព​របស់​លោកមូ​រ៉ា​តូវ​លក់​ដេញថ្លៃ​បាន ១០៣,៥ លាន​ដុល្លារ​កាលពី​យប់​ថ្ងៃ​ចន្ទ