​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ មន្ទីរពេទ្យ​និង​គ្លីនិក​របស់​សហរដ្ឋ​អាម៉េរិក​បានចាប់ផ្តើម​ចាក់​វ៉ាក់សាំង​កូវី​ដ​១៩​ដល់​កុមារ​តូច​បំផុត​របស់​ប្រទេស​កាលពី​ថ្ងៃ​អង្គារ​ទី​២១​មិថុនា ជា​ព្រឹត្តិការណ៍​ដ៏​​សំខាន់​មួយ​ដែល​ត្រូវបាន​ស្វាគមន៍​ដោយ​ឪពុកម្តាយ​ដែល​អន្ទះអន្ទែង​ចង់​ការពារ​កូន​ពី​ផលប៉ះពាល់​ដ៏​អាក្រក់​បំផុត​នៃ​មេរោគ​កូរ៉ូណា​។​

​ការចាក់​រាប់​លាន​ដូស​កំពុង​ដំណើរការ​នៅ​ទូ​ទាំង​ប្រទេស ពោលគឺ ១៨ ខែ​បន្ទាប់​ពី​មនុស្ស​ចាស់​បាន​ក្លាយ​ជា​ក្រុម​ដំបូង​ដែល​មាន​សិទ្ធិ​ទទួល​ថ្នាំ​បង្ការ​នេះ​។​

​កុមារ ដែល​មាន​អាយុ​ពី​ប្រាំ​មួយខែ​ដល់​បួន​ឆ្នាំ មិន​មាន​ហានិភ័យ​ខ្លាំង​ដូច​ក្រុម​មនុស្ស​ពេញវ័យ​នោះទេ​។​ប៉ុន្តែ​កម្រិត​នៃ​ការឆ្លង​ខ្លាំង​នៅ​អាម៉េរិក​បានឃើញ​កុមារ​ជាង ៤៥.០០០ នាក់​សម្រាក​ព្យាបាល​នៅ​​មន្ទីរពេទ្យ​និង​ស្លាប់​ជិត​៥០០ នាក់​នៅក្នុង​ក្រុម​មនុស្ស​អាយុ ០-៤ ឆ្នាំ​នៅ​សហរដ្ឋ​អាម៉េរិក ចាប់​តាំងពី​ការចាប់ផ្តើម​នៃ​ជំងឺ​រាតត្បាត ដែល​តួលេខ​នេះ​អាច​បង្ការ​បាន​ភាគច្រើន ប្រសិនបើ​មាន​វ៉ាក់សាំង​។​

​លោកស្រី អា​មី​សា វ៉ា​គី​ល (Amisha Vakil) ជា​ម្តាយ​របស់​កូនប្រុស​អាយុ​៣​ឆ្នាំ​ចំនួន​ពីរ​នាក់ ដែល​ទើបបាន​ចាក់​ថ្នាំ​វ៉ាក់សាំង Moderna នៅ​មន្ទីរពេទ្យ​កុមារ​រដ្ឋ​តិច​សាស​ក្នុង​ទីក្រុង​ហ៊ូស្តុន (Houston) បាន​និយាយថា “​យើង​ពិតជា​រំភើប​ណាស់​”​។​

​កូនភ្លោះ​ម្នាក់​ក្នុងចំណោម​កូនភ្លោះ​ទាំងពីរ​បាន​វះកាត់​បេះដូង​ចំហ​ចំនួន​បី​ដង​ក្នុង​រយៈពេល​ប្រាំ​ខែ​ដំបូង​ពេល​កើតមក​។​

​លោកស្រី​វ៉ា​គី​ល​បាន​និយាយថា “​រូបគេ​មាន​ហានិភ័យ​ខ្ពស់​ណាស់ ដូច្នេះ​អ្នកដឹង​ទេ ពួកយើង​បាន​រស់​នៅក្នុង​ភាព​ជ្រួលច្របល់​ណាស់​។ ឥឡូវនេះ រូបគេ​មាន​អាវ​ក្រោះ​ការពារ ដែល​វា​ជួយ​បាន​ច្រើន​ណាស់​”​។​

​កុមារ​ភាគច្រើន​ដែល​ត្រូវបាន​នាំ​មក​ចាក់​ថ្នាំ​កាលពី​ថ្ងៃ​អង្គារ​បានកើត​បន្ទាប់ពី​ការ​រាតត្បាត ហើយ​ស្គាល់​ជីវិត​នៃ​ការ​រឹត​ត្បិត​៕

​ក្មេងប្រុស​អាយុ​៣​ឆ្នាំ​មក​ទទួល​វ៉ាក់សាំង​កូ​វីដនៅ​មន្ទីរពេទ្យកុមា​ររ​ដ្ឋ​តិច​សាស​កាលពី​ថ្ងៃ​អង្គារ